Ahiru No Pekkle Cafe X 山下菓子 Kingsley Cafe @ T.O.P. Mongkok - 餐廳篇

無論大家係屬於邊個『黨派』，係『食樹皮協會』又好、係『西北風同學會』又好，甚至係同時加入咗唔同派系、『身兼數職』嘅『會員』都好啦！Pekkle 喺香港開 Cafe 喎，仲要係全球第一間，你唔係話我知你唔去呀？

所以，就算最近大家為咗追 Pekkle 精品追到筋疲力竭、油盡燈枯又好，年近聖誕、新年呢啲洗錢尤如倒水嘅日子即將蒞臨都好啦，就算係滴住血都要爬去 Pekkle Cafe 朝聖，咁先算係 Pekkle 忠粉囉！

對一個唔鍾意 Pekkle 嘅人嚟講，呢間 Cafe 咪就係一間普通 Cafe 嚟囉！但係對於一眾 Pekkle 忠粉嚟講，呢度簡直就係一個天堂，未行到入去，齋企喺門口，已經係難掩興奮、開心嘅心情，簡直就係有一種唔想離開嘅感覺！所以好明白點解咁多 fans 為咗 Pekkle Cafe，係會開心到失眠囉！




『門神 Pekkle』... 想攬住佢唔放手呀~~



入到門口，就會有鴨仔腳印為你引路~~







連地下都打埋燈，邊捨得踩落去呀？







 







廚房門口塊門簾都好靚呀！可惜冇得賣...

 

 

啲牆紙靚到... 如果我屋企都係貼呢啲牆紙就正喇！







餐廳內有個小型展覽箱，展出多款歷史悠久，已經絕哂版嘅 Pekkle 精品。唔知係邊個借出嚟嘅呢？係日本 Sanrio？抑或係問最有實力嘅會長喪 Vi 借嘅呢？hahaha...



牆上面仲掛咗多張 Pekkle 作者伊藤先生嘅手稿，唔同年份，有彩色、有黑白... 好珍貴嫁！













連餐廳小貨倉嘅門口都整到咁靚，想引死我地一班 Pekkle fans 咩？









有冇見過咁靚嘅餐廳枱面呀？



呢啲就係只限餐廳發售嘅 Pekkle 精品一覽表。





呢間只係期間限定嘅 Pekkle Cafe，由 30/11/2018 至 28/2/2019 為止。所以千祈唔好唸住自己仲有大把時間可以遲啲先去呀，要珍惜當下，唔好等到無得去先嚟後悔呀！到時已經太遲，補救唔到！真正嘅 Pekkle fans 應該要唸下，喺呢個僅有嘅三個月時間，應該要去幾多次先足夠~~