Sunday, July 29, 2018

Pekkle 油燈鎖匙扣

呢款 Pekkle 油燈鎖匙扣一推出就被搶購一空,我之前已經行咗好多間 Gift Gate 都係搵唔到,好彩因為 Pekkle 生日大貼紙嘅關係,有好多 Pekkle fans 報料邊間 Gift Gate 仲有貼紙未換哂、邊間 Gift Gate 會有啲咩 Pekkle 產品可以買,我先知道原來佐敦分店仲有貨...

結果今朝十點半都未夠,就已經去到店舖門口等佢開門,尤其當我隔住塊玻璃門見到真係仲有貨喺貨架上,個心情就更加緊張,因為好驚會有人嚟同我搶呀〔大家應該都知我地呢班 Pekkle fans 有幾瘋狂嫁喇 😝〕!嗰一個鐘頭嘅等待,我覺得好似等咗成日咁漫長,不過皇天不負有心人,結果都比我買到喇!


Pekkle 水樽

今年 Gift Gate 同埋 Manis 分別推出咗新款嘅 Pekkle 水樽,但係我既唔做運動,亦都冇自備飲用水出街嘅習慣,所以七、八年前買咗 Pekkle 出嘅水樽同埋保溫水壺之後,都係純粹得個『儲』字,從來冇用過...  亦都係因為咁,我本來都冇打算再買今年出嗰幾款水樽,不過就係為咗 Pekkle 張生日大貼紙,冇計啦!冇用都一樣要買呀!好彩嗰間 Gift Gate 咁啱賣剩我比較鍾意呢款,如果唔係,真係買番嚟既浪費、又阻地方呀!


Saturday, July 28, 2018

Sanrio Characters A4 plastic folder

同 Sanrio characters 花紙同系列嘅仲有呢款 A4 plastic folder,都係港貨。


Sanrio Characters 花紙

Sanrio Characters 花紙雖然只係本港貨,不過 Pekkle 都好耐冇出過花紙喇,再加上為咗 Pekkle 張生日大貼紙,所以都係要照買囉!


Sanrio Characters 貼紙

由呢一篇 blog 開始,會陸陸續續咁講下我喺 Sanrio Gift Gate 買咗啲乜,先可以比我儲到六張 Pekkle 生日大貼紙。

最新嘅 Sanrio characters 貼紙,雖然 Pekkle 貼紙只係得一小個,不過為咗 Pekkle,為咗張限量版 Pekkle 生日大貼紙,都一樣係會照買嘅!



 

Friday, July 27, 2018

7 月 27 日 Pekkle 生日紀念貼紙

2018 年真係 Pekkle 嘅豐收年!Pekkle 除咗勇奪 2018 年度 Sanrio 最受歡迎卡通人物大賞香港區冠軍之外,香港 Sanrio Gift Gate 更藉住 Pekkle 7 月 27 日生日呢個大日子,為一眾 Pekkle fans 帶來驚喜!

從來都未見過 Sanrio Gift Gate 為 Pekkle 做過主題推廣,可能見 Pekkle 今年氣勢強勁,所以就趁住 Pekkle 生日呢個日子搞咗個推廣活動,只要喺 Sanrio Gift Gate 購物滿 $50,就可以免費獲得精美嘅 Pekkle 貼紙一張。


Sunday, July 15, 2018

草莓雜誌 - 2018 年 8 月號〔第 606 期〕

曾經講過,我覺得依家草莓雜誌真係越嚟越難買,尤其係如果嗰一期係有 Pekkle 嘅資料同埋贈品,就更加唔洗旨意可以喺香港買得到... 當知道家人 10/7/2018〔草莓雜誌出版日期〕會喺日本,一早已經托佢幫我留意,如果見到有 Pekkle 就一定要買。

果然,今期贈品係把扇〔年年呢個時候,草莓雜誌嘅贈品好似都係扇,屋企都已經有幾把呢啲扇〕,其中一款雜錦款又有 Pekkle 呀!唔洗自己喺香港周圍撲就可以買到,好開心呀~

Pekkle 2018 年新款眼鏡布 (Manis)

呢個系列嘅 Pekkle 產品,除咗呢款眼睛布之外,仲有一個膠水樽。不過幾年前買咗太多 Pekkle 水樽同埋保溫瓶,買咗都只係得個擺字,都冇用過,好阻地方。所以今次我冇買到個水樽,見呢塊眼鏡布平平地、又唔阻地方,雖然我冇戴眼鏡用唔著眼鏡布,不過點都要支持下 Pekkle 啦!


北海道手信 - Pekkle 貼紙/便條紙套裝

家人唔知我喺香港已經買咗三盒同款產品,所以喺日本又帶咗兩盒番嚟比我。


北海遁手信 - Pekkle 2018 年款船襪

Pekkle 2018 年款船襪


 

北海道手信 - 日式和果子軟膠公仔

相信一眾 Pekkle fans 對呢個日式和果子軟膠公仔一啲都唔陌生嫁喇?我唸有部份鴨迷一早就已經經 facebook fans page 預定咗,係我呢個古老石山,總覺得網上交易好麻煩,又好似有啲危險咁,所以我都極少經網上買嘢,原本唸等香港入貨先買,點知 Gift Gate 一上架,Pekkle 就已經賣哂,其他精品店係有,但係定價又貴 Gift Gate 好多,正猶豫緊買唔買貴貨時,家人就帶嚟呢份手信比我喇!仲要一買就買咗三個添,勁開心呀!


北海道手信 - Sanrio characters 麻布 tote bag

Sanrio characters 麻布 tote bag

雖然唔係太襟用,但係手工都算係幾精美,個個公仔都繡〔車?〕都好靚。當然,最得意就梗係 Pekkle 喇!


北海道手信 -- 新千歲機場 Gift Gate 限定品

家人剛由北海道賞花回港,帶嚟一大堆新千歲機場 Gift Gate 限定店手信,雖然呢個系列已經推出多時,不過我一路都冇買過,今次終於都可以得到喇! 

一向以包裝靚聞名嘅日本,估唔到連一個小小嘅紙袋,都要有『最低消費』先可以拎到。 


Saturday, July 7, 2018

Pekkle 2018 年新款單行簿

可能太耐冇見過 Gift Gate〔Daniel & Co.〕推出 Pekkle 嘅新貨喇,今次呢套大、小鐵圈單行簿好似又整得幾靚咁喎...

Tuesday, July 3, 2018

Sanrio Character Ranking 2018 - 香港區冠軍

一個極之令人振奮嘅消息!

Pekkle 榮登日本 Sanrio 最受歡迎卡通人物選舉香港區嘅冠軍!好彩日本 Sanrio 總公司今年改變公佈投票結果嘅方式,除咗列出日本區嘅所有排名之外,仲首次公佈埋海外唔同地區嘅頭三甲位置。就係咁,Pekkle 終於都可以威番次,榮登『國際舞台』,令到世界各地關注呢個投票嘅人士,都可以透過呢次報告,認識到 Pekkle!真係好開心呀!:)

香港 Sanrio 呢個 Pekkle 冠軍造型實在係無懈可擊,太靚太型仔喇,連支權杖都係 Pekkle 其中一位嘅 best friend Pitchi 魚仔!呢次係我第一次覺得香港嘅設計比日本更優勝!如果香港 Sanrio 就住呢個設計推出一系列精品就正喇!唸起都流哂口水呀!^^