Monday, May 26, 2008

Mr. Steak Buffet a la minute

拉車邊都叫做牛癡一名既我,終於都去試左呢間享負盛名〝以任食和牛〞掛帥既 Mr. Steak buffet lu~



基本上我算係叫做揀飲擇食既人,所以 buffet 一向都唔係我杯茶,因為計落條數唔易回本嘛.... 今次我之所以去幫襯,都純粹係因為佢做緊 special,由即日起至另行通知,凡以現金埋單,再加上 7:15p.m. 前離座,都可以享有買一送一優惠.... 計落二百零蚊一位,就算係名過其實,呢個價錢都叫做仲可以接受既.... 



優惠 buffet 由 5:30p.m. 開始,大概 5:15p.m. 去到,已經見有人係度等緊入座,不過佢地就四散係各處,我就企左係 reception desk 前面等,結果我係第一個被安排入座既人!仲以為今次第一個入去實冇走雞啦!點知我只係坐左一陣、飲左一啖水咁大把,出到去已經見到有人排緊隊拎燒和牛!!真係誇張!既然你地咁心急,就比你地食住先,我趁個 floor 都仲未〝人山人海〞前,偷雞影幅相先....


近鏡頭呢邊就係 Salad Bar、擺壽司、湯同少量 cold cut 既地方,離鏡頭遠 d 有 waiter serve 既檯呢,就係擺長腳蟹、翡翠螺同魚生等呢類貴價少少既 cold plate....



另外一邊就係甜品檯,都叫 ok 多野揀啦!反正甜品對我黎講,只有雪糕先係我既首選!!



影完相,梗係唔執輸去排隊拎和牛啦~


第一 round,先黎大烘宮崎牛肉拼鹿兒島黑毛牛辣椒旋風腸.... 個名係唔係好勁呢?食味?ok 啦!二百零蚊一位任食既話,算叫有交待嫁喇!



第二 round,長腳蟹!其實我唔多食冷盤既!不過唔食又回唔到本,點都要食番兩件既!



記住要拎〝架生〞先好食長腳蟹,唔係都會幾狼狽下....



第三 round,豬骨湯煮鹿兒島 A5 和牛胸... 個名就夠哂好聽,個碗都夠哂大.....不過得果兩片.... 差 D 見到芽菜都見唔到牛肉.....



食完呢三 round... 望一望 d 熱盤,什麼菠蘿炒飯、炒烏冬、白灼蝦、小籠包、煎魚柳.... 完全提唔起興趣食..... 結果一樣都冇食過....


咁樣食法,唔單只蝕本,仲會唔飽添!!所以唯有再食多一 round 大烘牛肉啦!呢次排排下隊見到有薯仔煮宮崎 A5 和牛〝添貨〞,當然唔執輸拎番 D 啦!不過搵極都唔見薯仔,唯有退而求其次係熱盤既焗薯仔片度拎番幾件補數!再加幾件翠肉瓜,主菜果 part 就此畫上句號.....



順帶一提,第二 round 既大烘牛肉同第一 round 食時既質素比較,已經遜色不少!係幅相都可以見到,d 牛肉好可能係煮得過熟既關係,牛肉已經唔似第一 round 咁有半生熟 feel!大家都知,牛肉最大忌就係食 well done!well done 既牛肉貴一貴都係假!真係不敢恭維.... 所以如果大家想食口感好 d 既大烘牛肉,應該一開始就要食.....


甜品梗係首攻〝賣飛弗〞既雪糕啦!一共有四款選擇,都係 Dreyer's 既.... 不過.... 竟然冇我既至愛 ---- 朱古力味!真係晴天霹靂!!即係連雪糕都冇得食....


食 buffet 唔食番 d 甜品,總覺得好似有 d 野未完成咁.... 唯有退而後其次啦.... 最後,食左一件紅豆燒餅同香蕉 pancake....



埋單兩位 $502,以二百零蚊一位既價錢,都仲可以接受既,不過如果要以原價 $418 一位黎講,未免係貴左 d 囉!尤其係對我呢 d 揀飲擇食既人黎講,更加係唔多值得添!


Tuesday, May 20, 2008

一方有難,八方支援


2008 年 5 月 12 日〔星期一〕,下午 2:28,四川既八級地震,唔單只對四川人,仲有全中國既人,甚至全球既華人黎講,都係一個令人傷痛、難以忘記既日子...


本來,我呢個 blog 既宗旨係報喜不報憂,從來只會講〝吃喝玩樂〞,甚至地震至今已經發生左一個星期有多,係尋晚之前,我依然係冇唸過要寫一篇有關呢次地震既 blog,原因係呢件事實在係太沉重啦!過去個多星期,無論係走係街上、睇電視、睇報紙、聽收音機、番到公司,都可以接收到唔同既地震消息!對於一個一向冇乜抱負、冇乜責任感既我黎講,呢個課題討論得越多,實在只會感到更加透唔過氣。所以好多時我寧願選擇去〝逃避〞接收呢 d 新聞資訊,安安樂樂咁繼續去做一隻駝鳥!直至尋日...


尋日,寫字樓響應中央呼籲,係下晝 2:28 全體同事默哀三分鐘,各同事可以自願性質到大廈地下大堂聚集一齊默哀,亦可以選擇留係工作崗位自行默哀,一向係 office 都唔多理野既我,當然係冇落到地下一齊默哀啦,只係〝瑟縮〞係自己個位,仲要好似好怕比其他同事見到咁款,默默咁合上眼,為遠方既災民禱告左三分鐘.... 儀式完畢,同事陸續返回工作崗位,聽到佢地講,有超個二百名同事一同聚係地下大堂默哀,雖然我唔係其中一個,恍惚都可以感受到當時既氣氛。晚上,係無線電視晚上十點三十五分既新聞特備節目『四川大地震』中,睇到一段有關拯救被瓦礫壓住超過七十小時既災民陳堅一幕時,真係天地動容....


單憑對家人既思念作為生存動力既陳堅,只有二十六歲,佢就係憑住自己對太太同仲未出世既 BB 既掛念,不停咁〝催眠〞自己,要自己支持落去,無論身邊既救援人員同佢講咩都好,佢口中只係吐出佢想念太太同 BB 既說話,看似堅強既佢,在我眼中,佢好似已經開始有 D 神志模糊,只係不停咁講一 D 無意識既說話,以圖令自己唔好倒睡過去一樣.... 雖然最終都可以將陳堅救出黎,可惜未落到救護站,陳堅已經返魂乏術... 由活生生既一個人,睇住佢由不停講野,到救出後既一句說話〝我想我不行了,因為實實在在的痛....〞,至到佢既離開,雖然係幾個鐘頭既事,但係係電視畫面,就變成得幾分鐘.... 人生就係咁無常,生命就係咁脆弱!我唸係呢件事上面,唯一值得高興既係,救護人員係佢仍然〝清醒〞既時候搵到佢,可以幫佢聯絡到屋企人,傾左一次電話,總叫做了左一個心願...


就係經過上述兩件事之後,令我終於都忍唔住寫左呢篇 blog,依家四川除左要面對可能隨時決堤帶來既洪水災禍之外,仲有一連串既餘震威脅,其中有 d 餘震仲預測到係達到黎克特制 5 級以上!希望有緣睇到呢篇 blog 既人,可以盡一點點力!有錢出錢,有力出力,捐款唔在乎多少,只要有心便可!無能力捐款既人,都可以默默地為遠方正在受天災威脅既人送上祝福,只要係誠心誠意去做,相信佢地一定會感受得到!


有意思作出捐款既朋友,可瀏覽以下網址:http://www.had.gov.hk/tc/whats_new/sichuan.htm


Monday, May 12, 2008

出生於日本 Hello Kitty Land 既 A 仔 Ahiru No Pekkle

實在有一段好長既時間冇寫 blog,其實有好多野想 update,不過總係提唔起勁,可能今日經〝福榮街一役〞,令我突然好興奮,一係唔 udpate,一係就一口氣寫兩篇 blog....

前一排,見好多 Pekkle blog 友都拎呀〝A〞仔出黎 show off,咁岩我家姐上個月又去左日本,我梗係唔會執輸,托佢幫我同〝A〞仔搞移民黎香港啦!

唔覺唔覺,〝A〞仔都移左民黎我屋企有一段時間,兩個先後係日本 Hello Kitty Land 出世既兄弟,今日竟相遇係香港我既屋企,仲同我同床共枕添,睇我地幾有緣.....



唔知係唔係對得〝P〞仔耐 d,硬係覺得細佬〝A〞仔個樣有 d 怪怪地咁,比例又好似冇〝P〞仔咁得意,兩兄弟連個尾巴都唔同嫁!!個人黎講,雖然〝A〞仔夠〝嫩口〞,不過始終都係覺得〝P〞仔靚仔 d....



為減慢佢地污糟既速度,我將佢兩兄弟包埋一齊,〝A〞仔初黎報到,都應該要同〝P〞仔溝通下、培養下感情既.....





意外收穫@福榮街

今日係佛誕長假期既第二日,亦係母親節既日子,媽咪臨時有約,只係有時間同我食晚飯..... 下晝冇事可做,百無聊賴咁落左深水埗一趟,估唔到就比我有〝意外收穫〞......

大家估唔估到係咩黎呢?



開估.....



以我呢個酷似山東人咁既身型,size 就唔多岩,最緊要係唔夠長,遮唔到我個〝豪華臀〞,所以呢件 T-shirt,都係買黎儲,唔係買黎著既....



如果唔係呢間鋪頭既老細咁有唸頭,將所有 T-shirt 款式都掛左係門口當眼處,我就無可能離遠已經睇到,更加好大機會就咁就錯過左 Pekkle 呢樣新貨嫁喇〔at least 我當佢仲係新貨,因為我對上一次去福榮街時,已經係農曆新年前去買 Pekkle 揮春...〕



再行過幾間鋪,又見到另外一樣 Pekkle 新貨....



雖然手工一流,但係睇上黎係唔係好平凡呢?唔怕,等我幫 Pekkle 搞搞〝新意思〞啦!



識變色嫁!仲要有成五種轉變色添呀!係唔係超靚呢?其實之前已經見過有小販檔賣呢 d 變色公仔座嫁喇,不過當時搵極都冇 Pekkle 份,估唔到今日去深水埗走一轉,就有意外收穫喇!真係開心~