Pekkle 保溫瓶〔細〕

買得個大，無理由唔買埋個細嫁嘛？呢個細嘅瓶身設計就比較簡單，冇大嗰個咁色彩繽紛，不過簡單有簡單嘅好，我仍然係覺得無論係大瓶還是細瓶，個設計都比 Thermos 嗰個有心思好多囉... 

Pekkle 保溫瓶〔大〕

Pekkle 又出保溫瓶喇，上次喺一田買嘅 Thermos 都未用，今次 Sanrio Gift Gate 又出多兩款，原本唸住唔買嫁喇，但係睇到實物又覺得好靚，又忍唔到手呀！


 

Pekkle 層層疊

呢個 Pekkle 層層疊，可以話係 2018 年最伏產品... 只怪自己冇帶眼識『鴨』，一見到鴨樣就盲目地買咗落嚟，買完睇到喪 Vi『介紹』，先知自己中哂伏 ... @@

原先以為層層疊每一塊木頭都印咗 Pekkle，原來只係附上貼紙兩大張，想做到 Pekkle 層層疊效果，請大家 D.I.Y. 啦！=-=

Pekkle mouse pad

Ellon 又有新貨品，係韓國製嘅 mouse pad，個顏色同埋構圖都係頂呱呱，可惜太薄喇，用咗一陣個邊位已經開始有『繞』起咗嘅跡象...

Pekkle 日版鎖匙扣

呢個 Pekkle 日版鎖匙扣，雖然係 2018 年嘅產物，但係好有古物 feel... 因為係最『原始』嘅 Pekkle 姿勢同埋樣貌。

Sanrio Characters 飾物盒

呢個 Sanrio Characters 飾物盒應該都推出咗有兩、三個月時間，但係我遲遲都未入貨，原因係 Pekkle 真係太細、太小，而且個價錢都唔平，好多間精品店都要 $120 左右。估唔到喺聖誕節呢個假期，又比我重遇佢，仲要係折扣價 $100，終於都係忍唔住帶咗佢番屋企！

Pekkle 鐵罐連牛油曲奇及磁石貼

7-11 又有 Pekkle 新產品喇！真係追貨都追到癲...

好彩今次呢款產品又平又靚，買多幾個都唔覺肉赤。可能係聖誕假期，啲人唔係去咗外遊，就係掛住慶祝，唔得閒 check facebook，所以難得地我去到 7-11 時，齊款齊數。

Pekkle 1997 年絕版『沙丘堡壘』陶瓷筆座

2018 年收到嘅第一份聖誕禮物，係由一位移民美國嘅親友所送，估唔到遠至美國都比佢搵到 Pekkle 嘅蹤跡，仲要寄番嚟香港比我添！真係又開心、又感動呀！

Ahiru No Pekkle Cafe - 聖誕期間限定套餐

純粹係為咗對 Pekkle 聖誕襪，令我無辦法唔訂呢份『聖誕大餐』~~

其實個期間限定餐牌內容冇乜特別野，同平時嘅主餐牌一樣，所以如果唔係因為隻萌爆嘅粉藍色 Pekkle 聖誕襪，我應該都唔會幫襯呢個『聖誕大餐』。

食呢個餐嘅最大目的就係為咗隨餐附送嘅限定非賣品，所以梗係要介紹咗啲精品先啦！首先嚟個『大合照』！

山下菓子『伴您食得環保』系列 - Pekkle 鐵罐連草莓乳酪脆脆朱古力

個鐵罐做得好靚呀！取貨時細心檢查，並冇發覺印歪、刮花嘅情況，不過個罐比我想像中細咗少少，如果可以再大個啲，咁就更加理想喇！

山下菓子『伴您食得環保』系列 - Pekkle 環保飲管連玻璃樽

終於都等到番貨喇！一收到電話通知，就急不及待放工即刻衝去拎！

買玻璃樽係連買日本蘋果汁，其實我反而唔想要，因為唔想佢整污糟我個 Pekkle 樽，不過都未及阻止，店員已經第一時間斟咗啲蘋果汁入去個 Pekkle 樽入面。

Pekkle Cafe x APF 愛培自閉症基金慈善義賣

愛培自閉症基金 APF 個 Pekkle 慈善聖誕花圈其實係好靚，不過可能因為係慈善關係，售價 $495 實在太貴喇，再加上最近真係買 Pekkle 新產品都買到窮，所以我冇買到個聖誕花圈。不過咁，Pekkle 咁叻仔做到 APF 嘅『慈善大使』，點都要去捧下場嘅，所以當 APF 第一日喺 Pekkle Cafe 擺義賣 counter 就已經去支持下...

Pekkle 旅行用品系列 -- 眼罩

眼罩，純粹買嚟儲，一定唔會用，我驚自己對眼『被綁住』之後，會更加瞓唔著囉... hahaha

Pekkle 旅行用品系列 -- 吹氣頸枕

呢個頸枕係唯一一樣同千色店嗰套 Pekkle 旅行同品系列係有分別嘅。千色店嗰款係記憶枕，而呢個就係吹氣枕。

Pekkle 旅行用品系列 -- 一套三件收納袋

一套三件旅行用收納袋


 

Pekkle 旅行用品系列 -- 行李牌

就算唔用嚟做行李牌，就當係 Pekkle 吊飾咁用都 ok 啦~

 

 

Pekkle 旅行用品系列 -- 護照套

連護照套都特別靚過人~


 

Pekkle 旅行用品系列 -- 摺疊式旅行袋

摺疊式大旅行袋。個人覺得呢個系列嘅 Pekkle，比千色店嘅款式靚啲~


 

Pekkle 旅行用品系列 -- 拖鞋

最近千色店換購嘅 Pekkle 旅行用品系列，我一件都換唔到，仲要『出賣』哂我啲親朋好友嘅資料，只係過咗一星期左右，正當儲夠分想去換購時，竟然全部款式都已經換罄，啲會員積分仲要去到 31/12/2018 就到期，唔換就會取消哂...

為免令自己再一次失望，所以當我一見到 AEON 推出同類唔同款嘅 Pekkle 旅行用品，仲要做會員八折再九五折，梗係拿拿聲去買啦！

Pekkle 膠摺凳

Pekkle 膠摺凳，已經好耐冇過同類型產品出喇，對上一張應該係粉藍色嗰張....

Pekkle LED 小夜燈連飾物架

尋日知道 7-11 將會推出呢款 LED 小夜燈連飾物架，可惜收工去搵咗幾間七仔都唔見有，今朝早咗少少番到公司，唸住都去附近 7-11 碰下運氣，原本個店員都話未番貨，叫我晏啲先再去睇，唸住轉身離開時，個店員又突然叫住我：等一等，等我入倉睇下新到嗰啲貨，有冇你想買嘅嘢先...

等佢拎咗一大包物件出嚟，心唸：唔係咁大個呀？後來先發現原來係迪士尼嘅掛牆燈，我同個店員講：唔係呢個，應該係細啲，係 LED 燈嚟嘅...

店員唸一唸：應該仲有一包...

見佢喺倉行出嚟，手中拎住一包六件嘅物件，一眼就比我見到 Pekkle 喇！我即刻同店員講：係呢款喇！

好彩店員落力幫我入倉搵，終於都比我買到喇！

Ahiru No Pekkle Cafe - 精品篇 - 毛毯

由於我買唔到簽名會 + 抱抱會入場卷，所以當日入唔到場、買唔到呢張毛毯，但係喺店外望入去時，我仲以為係毛巾，仲唸住一定要再去掃多幾條，後來先知原來係毛毯，購買意欲即刻大減，不過大減還大減，都係要買嘅，差在係只買一條作收藏之用，抑或去排多幾日隊、買多幾條嘅分別姐...

千色店換購 -- Pekkle 飛行棋

上次 Citistore 會員積分換購 Pekkle 多款旅行用品，無論係千色店 App，抑或係職員都聲稱，呢個系列嘅精品『有排換』，喼套都仲要話遲啲先番貨，再加上又撞正一田購物優惠日，喺唔想自己太辛苦、太頻撲嘅情況之下，我好『理所當然』咁唸住等多幾日先去千色店換，結果係點，相信好多 Pekkle fans 都知啦... 其實我都只不過係遲咗幾日先去，一星期以內嘅事，竟然所有 Pekkle 精品都搶購一空，其餘公仔都仲有貨，唯獨 Pekkle 冇哂... @@

由於受咗呢一次咁沉重嘅教訓，基於同一個錯誤唔可以連犯兩次嘅『原則』之下，今次真係不敢怠慢，拿拿聲星期五收工就即刻要去千色店買野換 Pekkle 飛行棋.... 終於都比我換到喇！

Pekkle 大散紙包

又一樣係為咗副 Pekkle 飛行棋，明知係貴咗都仍然要買嘅最新款 Pekkle 大碎銀包。其實都幾實用嘅，啱哂多零錢、多卡、多『垃圾』嘅我用啦... 不過唔知呢啲尼龍質地襟唔襟用嘅呢？


 

2018 年 Ellon Saniro characters 花紙

上次買咗 Pekkle 單人款，今次正好買埋 Sanrio characters 款式。

Pekkle 大啤牌

為咗要換到 Pekkle 飛行棋，點都要去千色店掃貨啦！其實最近買 Pekkle 都買到有少少麻木，不過無論幾麻木都好，見到 Pekkle 都總係忍唔住手要買...


 

山下菓子『伴您食得環保』系列

除咗鮮果卷連印花木板、竹蓋陶瓷保鮮盒之外，仲有 Pekkle 環保飲管連玻璃奶樽，同埋 Pekkle 罐裝蝴蝶酥，不過呢兩樣都係冇現貨，依家接受預訂，貨到再通知。

山下菓子『伴您食得環保』系列 - Pekkle 竹木蓋陶瓷保鮮盒連蝴蝶酥

我買嘅時候，連蝴蝶酥都賣哂，所以只係可以拎個吉盒，包蝴蝶酥就要等番貨。


 

山下菓子『伴您食得環保』系列 - Pekkle 印花木板連鮮果卷

最近 Pekkle 真係停不了咁推出唔同嘅產品，相信我地一班 Pekkle fans 喺追貨追到疲於奔命、食哂西北風嘅同時，都好戥 Pekkle 高興，因為 Pekkle 終於都有吐氣揚眉嘅一日喇！呢個十年難得一遇嘅機會，我驚依家放棄唔再追貨，將來會後悔呀！所以，當我知道今日山下菓子開售一系列 Pekkle 食品及用具之後，真係忍唔住又要去買喇！

雖然喺 fb 成日都見到好多人話希望『停一停、抖一抖』，但係觀乎最近無論係 Pekkle Cafe 開幕、有咩新產品開售、都會引嚟一條排隊嘅人龍，似乎 Pekkle fans 嘅購買力真係好高喎！

一田購物優惠日 eShop 預購 - Uji 918 針 Pekkle 絲般綿活性印花床品套裝

呢個 pattern 我覺得係近年佳作，色彩繽紛，見到都開心...

用哂成 set，瞓覺都會發個甜夢~~

一田購物優惠日 eShop 預購 - Uji 918 針 Pekkle 絲般綿活性印花四季被

呢張 Uji 918 針 Pekkle 絲般綿活性印花四季被，剩係裝住張被個環保袋，都已經值回票價！


 

一田購物優惠日 eShop 預購 - Pekkle 童裝衛衣

明知呢件童裝衛衣一定唔啱著，就算啱著亦都唔會著，不過咁難得咁順利就上到一田 eShop，點都要買下野、高興下嫁喇... hahaha

一田購物優惠日 eShop 預購 - Pekkle 縮骨遮連環保袋

之前喺一田購物優惠日 eShop 預購嘅貨品，今日開始有得拎喇！

Ahiru No Pekkle Cafe - 限量非賣品襟章

於餐廳惠顧食物或飲品每滿 $200，就可以獲得限量版非賣品襟章一個，一套六款，多買多送，送完即止。

Ahiru No Pekkle Cafe - 精品篇 - 8寸陶瓷碟

呢隻陶瓷碟真係好靚，靚到唔識形容，所以就算食緊樹皮，都要買兩隻先得！hahaha

Ahiru No Pekkle Cafe - 精品篇 - 牛仔布袋

呢個牛仔布袋設計同埋手工都好精美，如果可以有番個闊度，咁呢個袋就更加完美喇！


 

Ahiru No Pekkle Cafe - 精品篇 - 手提電話指環

其實我冇用手機指環嘅習慣，而我朋友亦都話呢啲好似淘寶貨式，成本價可能只係需要幾蚊... 雖然如此，我都忍唔住要買，不過就冇買哂兩款，兩款揀一款，結果我係揀咗呢款...


 

Ahiru No Pekkle Cafe - 精品篇 - 陶瓷杯

其實呢款陶瓷杯，係隨某啲熱飲附送，不過，由於 Pekkle 玻璃奶樽係非賣品，而自己又唔係好鍾意飲熱野，所以選擇咗用餐時叫凍飲，再另外買走呢個陶瓷杯...


 

Ahiru No Pekkle Cafe - 精品篇 - 熱香餅抱枕

啱啱去到餐廳時，抱枕已經全部售罄，好彩一路食飯一路等，終於都等到佢番新一輪貨，可以買到喇！

雖然呢個抱枕比較大件，都幾阻地方，不過質地好柔軟、好好攬，仲整得好靚添，真係忍唔住唔買囉...

Ahiru No Pekkle Cafe - 禮品篇

Ahiru No Pekkle Cafe 除咗有要錢買嘅精品之外，餐廳內有部份物品都係可以免費拎走嘅...

包括自己位嘅墊枱紙啦！當然你用餐之前要收起，唔係食野時整污糟咗就冇辦法喇！每張餐枱上面都有一個裝餐具嘅滕藍，入面會有幾張印咗 Pekkle 嘅餐巾，咁梗係寧願用自己嘅紙巾啦，Pekkle 餐巾都要第一時間收起...

當你叫凍飲時會有兩支紙飲管附送，飲管上面會套住個 Pekkle 小卡紙，咁靚，點捨得用呀？同時都會有 Pekkle 杯墊，當然亦都唔可以比佢擺個杯上去啦，一擺咗杯凍飲，個杯墊就要『報銷』，仲有喺每一款食物上，都會插咗唔同大小、造型嘅 Pekkle 小卡紙，記住要拎埋呀！

Ahiru No Pekkle Cafe X 山下菓子 Kingsley Cafe @ T.O.P. Mongkok - 餐廳篇

無論大家係屬於邊個『黨派』，係『食樹皮協會』又好、係『西北風同學會』又好，甚至係同時加入咗唔同派系、『身兼數職』嘅『會員』都好啦！Pekkle 喺香港開 Cafe 喎，仲要係全球第一間，你唔係話我知你唔去呀？

所以，就算最近大家為咗追 Pekkle 精品追到筋疲力竭、油盡燈枯又好，年近聖誕、新年呢啲洗錢尤如倒水嘅日子即將蒞臨都好啦，就算係滴住血都要爬去 Pekkle Cafe 朝聖，咁先算係 Pekkle 忠粉囉！

對一個唔鍾意 Pekkle 嘅人嚟講，呢間 Cafe 咪就係一間普通 Cafe 嚟囉！但係對於一眾 Pekkle 忠粉嚟講，呢度簡直就係一個天堂，未行到入去，齋企喺門口，已經係難掩興奮、開心嘅心情，簡直就係有一種唔想離開嘅感覺！所以好明白點解咁多 fans 為咗 Pekkle Cafe，係會開心到失眠囉！