Wednesday, August 22, 2012

Sanrio Gift Gate 2012 - 2013 年度入會禮物

每年既七至八月,都係 Sanrio Gift Gate 招收會員既日子,因為 Pekkle 都有一排冇乜新產品推出,仲唸緊今年好唔好續會,不過係七、八月 Pekkle 又一口氣推出左好多新產品,再加上見到 Sanrio Gift Gate 今年既入會禮物都幾靚,所以結果都係續左會。

好難得今年既會員卡主題係以六位卡通人物為主角,只可惜都係冇 Pekkle 份,記得之前我都已經 send 過 email 比 Sanrio Gift Gate,提議佢地既會員卡加上 Pekkle,相信會有助增加會員數目,不過可能我人微言輕啦,連續幾年 Sanrio Gift Gate 既會員卡都係冇 Pekkle 份,唔知仲要等多幾多年,先可以見到 Pekkle 再次出現係 Sanrio Gift Gate 既會員卡上面呢?

由於今年既主題係六位卡通人物,所以入會禮物都係以六位卡通人物為主,而份禮物就係全套都入得微波爐既瓷杯連矽膠杯蓋、隔熱杯套套裝。











以陶瓷杯黎講,呢個杯既手工都算係唔錯嫁喇,而且成套都入得微波爐,真係好方便喎!如果係杯上面都印有 Pekkle,就更加完美喇!




Tuesday, August 21, 2012

Pekkle 2012 年三摺縮骨遮

講完直遮,輪到縮骨遮,款式其實係一樣,只係 size 細左,得 50 cm x 6 瓣遮葉。






因為呢把縮骨遮得 6 瓣遮葉,所以公仔 pattern 都會相對地少左一瓣。





雖然把遮係細 d,公仔 pattern 亦因而少左一瓣,不過三摺縮骨遮就比直遮多左個遮袋同包裝袋囉!

正面




背面


Pekkle 2012 年直遮

終於都推出左岩哂我呢個『雨遮屠夫』既產品 --- 雨傘,唔洗唸啦!一於直遮、縮骨遮各買一把先啦!



直遮:60 cm x 8 瓣




四瓣『遮葉』分別印上兩款公仔,每款兩瓣。

第一款:





第二款:




遮身綁帶位都印有 Pekkle 全名同埋佢既『嘜頭』....





遮柄都一樣印左 Pekkle 既全名....



Tuesday, August 14, 2012

草莓雜誌 - 2012 年 9 月號

自從之前試過買唔到有 Pekkle 贈品既草莓雜誌之後,依家都習慣左每個月既 10 號都會上 Sanrio 官方網頁 睇下最新一期草莓雜誌會送 d 咩贈品,今期既贈品雖然係冇 Pekkle 份,不過中間大頁有喎,而且內文又有少少提到 Pekkle,所以急不及待,係 11/8/2012 就去左征服世界買。

下晝去到銅鑼灣分店,d 草莓雜誌都係剛剛送到,連包裝紙箱都未拆、贈品都未包好。原本售貨靚姐姐話只會賣比之前已預留雜誌既客,不過好彩因為我唔洗選擇贈品款式,所以佢地都好好人肯優先賣左一本比我!


 


中間大頁,唔識睇日文,我估係類似日本既咩祭典卦?咁多檔口,係唔係好熱鬧呢?見唔見到 Pekkle 呀? 

 




zoom 近 d 比大家睇.... Pekkle 好似負責章魚小丸子既 counter 喎! 




內頁仲有個迷你版中間大頁,可能係詳細介紹有關既節慶,可惜我唔識日文,唔知佢寫乜...







除左大頁之外, 出現 Pekkle 既地方仲有:

呢個係唔係指 2012 年下半年既運程呢?乜原來 Pekkle 係屬於『八白土星』?







日本年號、年份同『星座』對照表,原來日本人占卜只會睇出生年份,唔會好似我地中國人咁,分埋年、月、日咁詳細....  唔知大家又屬於咩『星座』?會唔會係同 Pekkle 一樣呢?




另外, Pekkle 仲出現係....

又係一味『靠估』,相信係藉著 2012 年最受歡迎卡通人物選舉而推出既新產品,咁就當然有『候選人 93 號』既 Pekkle 啦!






Pekkle 船襪!好得意呀,可惜家人剛剛七月尾先去完日本,幫唔到我買,唔知遲 d 征服世界會唔會入貨呢?





放大版...





仲有就係購物袋喇!雖然企係 Kiki 同 Kuromi 附近既 Pekkle 細粒左 d,不過可以同一時間齊集哂咁多公仔,都算好難得啦!




老貓燒鬚之 Pekkle 三層 A4 文件夾

好靚嘅三層 Pekkle 文件夾,雖然公仔嘅造型就冇乜新意,但係大大個 Pekkle 印咗喺 folder 嘅正面同背面位置,又真係好 sharp、好得意喎!望到個 folder 都覺得好開心呀!






顏色又襯得好,Pekkle 望落真係好 sharp 醒嫁!





唯一美中不足嘅地方係又串錯咗 Pekkle 個名呀!Gift Gate 身為老大哥,估唔到佢都會有老貓燒鬚嘅一日.... 

間間 licensee 都係衰咗呢樣,之前 Trendyland 同埋 Manis 嘅出品,都試過幾次串錯咗 Pekkle 嘅全名,乜真係咁難記咩?咁難記不如就用番 Pekkle 咪算囉!反正 Pekkle 先係佢嘅正名,據我朋友所講,Ahiru 喺日文係解作『家鴨』 ,所以 Pekkle 應該先係佢嘅名嚟囉!