Monday, January 31, 2011

為 2 月 2 日農曆新年特別版作出準備...

之前提過,當換購 Sanrio 50th Crystal Charms 活動第一階段完結之時,我就會暫停換領 charms,因為要留番 d 『彈藥』去換農曆新年特別版既 Charmmy Kitty... 眼見 2 月 2 日換購特別版既日子迫近,都係時候要整理一下 d 印花存貨,咁到時就唔洗 "拿" 手唔成勢咁啦....


原來暫停換 Crystal Charms 之後,唔經唔覺自己都儲落唔少印花....


最初只係 keep 係個盒仔度,冇乜特別理過佢地,結果都花左我成半個鐘既時間,先貼好哂落 d 印花卡上... 原來我一共有 290 個印花未用嫁!


唔好以為就只係得呢 290 個印花喎,因為我到依家都唔係好捨得用 Pekkle 既印花,所以 Pekkle 既貼紙我會儲起唔用,其實我都已經冇儲起哂全部,只係儲左八成左右,費時嘥料嘛....


呢個就係我儲住印花既盒仔喇... 將其他 Sanrio 公仔既印花貼哂上印花卡之後,呢個盒仔入面既,就只係有 Pekkle 既印花喇!!



數一數,原來 Pekkle 印花都有 74 個!!



計一計,現時我既印花存量一共有 364 個,仲未計之前我係第一階段換 charms 時所用既印花喎...   睇黎呢個 12 月同 1 月,我其實係幫緊 7-11 打工囉...


由於之前賣出 + 送左 d charms 比親戚好友,依家 Crystal Charms 既現貨就只剩下呢 33 個,仲有另外收埋左既 3 個 Pekkle charms....



趁年尾黎個 "小結算",發覺自己其實都相當瘋狂下....


Sunday, January 30, 2011

Pekkle 隔熱墊

係 catalogue 都見唔到既 "意外之物"!係我印象之中,Pekkle 應該從未出過呢類水松木隔熱墊,就係我係 Sanrio 搵圍裙之時,無意中比我發現左,真係有 d 驚喜嫁!呢 d 咁實用既野,唔洗講野,即時買左三個啦....



呢個好似 "跳起" 既 Pekkle 造型,其實一 d 都唔創新,好多年前、係唔同既 products 上面都出現過,不過有個咁大個既兩層士多啤梨蛋糕,本身已經肥肥地既 Pekkle,食哂之後,仲跳唔跳得起呀?



原來一塊簡簡單單既水松木隔熱墊,都有咁多樣野要注意,用時都要小心 d,唔係一個唔覺意搞到 Pekkle "毀容" 就唔好啦!!



Pekkle 圍裙

呢條圍裙買左都有成個星期,不過因為年近歲晚,公事私事都好忙,所以都唔得閒 update blog....


其實早前係 Pekklebaby 既 blog 見到,已經心癢癢好想去買,可惜行左幾間 Sanrio 都冇貨,因為好想快 d 擁有,唸住退而求其次,唔儲分都去征服世界買,不過可能我選擇錯左間比較細既分店,佢地都未有貨.... 結果都係要等到今個星期一,番沙田先買到....



好得意既廚師 Pekkle,唔知係唔係因為要襯番個廚師 look,呢個造型既 Pekkle 好似比平常既 Pekkle 肥左半個碼....



backdrop 係好多唔同 post 既 Pekkle,好得意呀!搞到我呢個從來都唔入廚既人,都忍唔住買左兩條!!



Tuesday, January 25, 2011

全港至正七、十一便利店

隨著 Sanrio 50th Crystal Charms 第一階段〔Pekkle 階段〕係 11/01/2011 結束左,再加上我下一個目標吊飾係 Charmmy Kitty 既關係,呢兩個星期我已經暫停換領 Sanrio Crystal Charms,所以呢個 "類別" 既 blog 我都停左冇寫,相信最快都要等我換到 Charmmy Kitty 之後,先會再繼續換領其他 charms,到時我先會再寫番呢個 "類別" 既 blog.... 但係日前比我發現左一間超正既七、十一便利店,令到我忍唔住要寫番篇 blog 黎介紹一下呢間七、十一.....


究竟呢間七、十一有咩咁特別呢?


都係呢張 banner 姐.... 又有幾特別呀?不過... 大家有冇留意到係 banner 下面,有 d Sanrio 人物既公仔頭呀?



上圖睇得少少,下圖比個 "全相" 大家睇下....


Pekkle 呀!我就係離遠見到呢個 Pekkle,先由對面馬路 "飛奔" 過黎呢間七、十一,過到黎就發現呢間七、十一裡裡外外都貼滿 Sanrio 50th Crystal Charm 既裝飾,靚到癲呀!我即時拎部相機出黎係咁狂影....



由於呢間七、十一係正轉角位,面積都唔算細,而且擁有 "L" 形既兩邊門口,所以兩邊玻璃窗都貼滿 Sanrio 既 characters.... 超靚呀!


店外一邊



店外既另一邊



店內員工休息室 / 貨倉入口位



zoom 近 d 既 Pekkle...



店內另一角比顧客 "立食" 同擺放微波爐、汽水機位置既地方...



又將呢邊既 Pekkle zoom 近 d 先...



仲有唔可以遺漏既就係櫃面,收銀機位置既小小 Pekkle 單張,好想拎哂佢地番屋企呀!



我認為呢間係全港至正既七、十一,入到去之後,真係好似小朋友去到迪迪尼一樣,有種唔捨得走既感覺呀!我係咁舉起相機猛影、猛影,懶理舖內有好幾部閉路電視,佢地仲要將個 CCTV 擺左係門口既當眼處,我唸當晚行出行入既顧客都會清楚見到我拎住部相機係舖內隨處亂影,唔知佢地當時會唔會以為我係傻既呢....


Tuesday, January 18, 2011

Pekkle 隔熱手套

去到 Gift Gate,又點會只係買左利是封呃?Pekkle fans 們,又番左新貨喇!今次係廚房系列既精品 ---- 隔熱手套


"遠觀" 無乜大問題,但係一 "近睇" 就.... 個質素都好一般囉,無論係個設計、印功、定係質地都係麻麻.... 可能我唔入廚所以唔識啦!總覺得對手套既布質好粗糙,印係背景既屋仲有一撻撻既感覺,揀勻哂五個存貨,呢個已經叫做印得比較好.... 真係好有老翻 feel...



背面冇驚喜,仲要用我都幾唔鍾意既 "泥黃色" 添...



呢對手套既耐熱度約 150 度.... 恕我孤陋寡聞,唔識煮野食既我,好似依稀記得焗爐好似可以去到百幾二百度嫁喎....  咁... 呢對手套係唔係即係唔可以用黎拎焗爐岩岩整好既野呢



廚房系列,我始終都係等緊保溫杯同圍裙.... 睇 catalogue 個 design 就好正喇,希望見到實物時唔會令我失望啦!!


呢張就係我間唔中提起既 Gift Gate Service Card,每買滿一百蚊就會有一個貼紙,係開卡期起計三個月內,儲齊相關既貼紙,就可以換到唔同既禮物.... 你睇我... 一個月都未夠,就已經儲左 13 個貼紙,要留意,就算係買左 $199 都只係得 1 個貼紙.... 咁大家唸下,呢個月未計去 Manis、去七仔買野儲印花既錢,單單係 Gift Gate 我就已經買左幾多錢 Pekkle 既精品?我既血.... 相信都好快就會比 Pekkle 榨乾....