Thursday, July 31, 2008

Sanrio Summer Festival 2008

一年一度既 Sanrio Summer Festival 又舉行喇!過去幾年,因為 Pekkle 無出新貨,所以去到都係空手而回,07 - 08 年度都出左幾樣 Pekkle 新貨,唔知 d 新貨會唔會都有做特價呢?希望大家都可以執到平野啦!



下個星期二就會完嫁喇!要出血就要快手喇!


同場加映:放血就要放盡 d,對於一 d 好日都唔會去銅鑼灣既人黎講,難得出城去銅鑼灣,就梗係唔只去 Sogo 啦!2/8 - 10/8 Trendyland 會係時代廣場 13/F 既 Bazaar 搞個特賣場,大家記住行多幾步,放多 d 血啦!


Thursday, July 24, 2008

又有新貨...

對於之前係日本 Hello Kitty Land 已經入左貨既 Pekkle fans 黎講,應該對呢樣 product 一 d 都唔陌生!不過好歹都係 Pekkle 2008 年既原裝日本貨,係香港發現左佢既蹤影,當然就要第一時間同一眾 Pekkle blog 友報料啦!


呢樣 product 其實之前係好多位 Pekkle fans 既 blog 都出現過〔當然包括本人在內啦〕,亦都有 Pekkle blog 友講過,係旺角既精品店見過有得賣,不過索價五十幾蚊一本!都幾貴!前幾日無意中比我係 Gift Gate 見到,仲要只係賣 $18.5 一本,各位同好,記住去掃貨喇!


我呢兩本都係 Hello Kitty Land 買既。細就係細本左 d,不過扣除機票、運費等,係香港用 $18.5 買一本其實都唔係貴喎.....



因為簿仔細細,所以大家要落足眼力搵呀! 不過 Gift Gate 係用一個大膠盒裝住唔同款既簿仔既,應該都唔難搵!成個盒大大話話都裝住十幾款唔同既簿仔,不過 Pekkle 就只係得一個 pattern。基本上係呢個 Hello Kitty Land 袋上面既所有 characters,都有出呢款簿仔。今次可以話係一網打盡,Sanrio 既 fans 唔洗驚會失望,大家都可以各取所須喇....



呢樣 product 係 2008 年 Pekkle 原裝日貨既好開始,希望 Sanrio 日本總公司會發現 Pekkle 係〝可造之材〞,繼續推出 Pekkle 既產品啦!


Monday, July 14, 2008

Sanrio 繽紛鐵盒 2〔連糖〕

感激 blog 友雪藍係七、一回歸紀念日報料,得知 7-11 代售 Sanrio 鐵盒糖第二彈,係一套 24 款當中,竟然有 Pekkle 份,一眾 Pekkle fans 先唔會錯過入貨既機會!係呢度,真係要多謝雪藍!


最初可能貨源唔多,搵左 10 間 7-11 都只係買到一盒,情急之下惟有廣邀親朋戚友幫手,結果原本以 12 盒為〝收購目標〞,最終有 16 盒既成績,超額完成! 


望穿秋水,尋日終於都等齊 Pekkle 糖果盒〝回歸〞,可以一家團聚喇!



因為有糖係盒入面,驚會變壞,無奈忍痛要拆哂 d 包裝紙。就係拆開包裝之前,黎張前、後幅對比照先。



拆左都有好處既,就係盒底個 Pekkle 公仔一樣係超得意既...



16 盒既糖拆哂出黎既下場.... 就梗係入左垃圾桶啦!係佢地為左 Pekkle〝壯烈犧牲〞之前,都幫佢地留番個〝倩影〞紀錄低佢地既〝功績〞先!



其實一見到個糖盒,已經覺得熟口熟面,記得之前既 Pekkle products 當中,都有同樣用過呢種『突變』既設計手法,相信各位 Pekkle fans 應該一 d 都唔會覺得陌生啦!


相同既設計分別係 2003 年出品既杯墊,同埋 2004 年出既檯墊。



將佢地擺埋一齊比較下,係唔係好似失散左既兄弟呢?



杯墊同檯墊都係 Grandsmart〔即係 Trendyland〕既產品,而呢個糖盒就係一間叫〝Multizen Asia Limited〞出既,咁究竟係佢地買左 Grandsmart 既 design 再出呢款糖盒?定係當年係呢間公司幫 Grandsmart design 既呢?


不過無論如何,對於我地呢班 Pekkle fans 黎講,源自邊度根本都唔重要,最重要係乜野 products 都要預埋 Pekkle 份姐...


Monday, July 7, 2008

無心插柳

上個週末,去 The Grand Cinema 睇完戲之後,百無聊賴唔知做乜好,又唔想落尖沙咀人多車多,結果近近地落左佐敦。去到寶靈街,無意之中比我見到 Pekkle 既新睡衣,當然係老翻既街邊貨啦!檔主掛齊同花既睡裙、短袖短褲同短袖長褲出黎,各款均有紅、藍兩色。問下檔主價錢,短褲 $65、長褲 $75,我立時雙眼發光,因為之前係花園街問過同款要 $90 一套!!因為我唔鍾意著短褲,所以即係就叫檔主比套藍色長褲我,點知搵呀搵、搵呀搵.... 檔主翻箱倒籠咁都搵唔到長褲睡衣,一句〝賣哂〞,就將我火熱既心冷卻哂.....


就係心情跌落谷底之前果一秒鐘,比我〝目及〞到佢果綑短袖長褲睡衣裡面,有 Pekkle 既蹤影,雖然個 pattern 唔係今年既款式,而我之前亦都已經買左相同 pattern 既冬季長袖長褲睡衣,不過買到舊 pattern 既夏季睡衣,都總好過空手而回嘛,所以結果就買埋佢碩果僅存既一套....



拎住套睡衣好滿足咁唸住離開寶靈街,竟然都仲比我標番個尾會,係附近比我發現 blog 友雪藍之前買左既浴帽,$10 一個咁抵,雖然我從來都唔用浴帽,不過之前都唸住會去雪藍講既深水埗買嫁勒!既然依家咁就手,梗係二話不說就將 Pekkle 帶番屋企喇!連搭車去深水埗既錢都慳番呀!



P.S. 唸住買但係冇貨買唔到既新款 Pekkle 睡衣,原來 Pekkle blog 友懿行貓貓係一個月之前都已經買左,就係呢套喇!


http://hk.myblog.yahoo.com/ianlauyihang-2006/article?mid=772