7-11 x Hello Kitty & Friends Sweet Delight 公仔 - 最終回

上星期，終於都拎埋最後一批一共 15 個嘅 Sweet Delight 公仔。好好彩，15 個之中，一共有 2 個係 Pekkle，而且都唔係有太多重複嘅公仔，就算有重複，都係比較『受歡迎』嘅公仔，總算叫做有交代啦。

今次換購嘅 Sweet Delight 公仔都算係好精美，不過實在係太大個，連個盒都大過人，好阻地方囉... 依家屋企有幾十盒公仔，大紙袋都要裝滿咗兩個，正頭痛緊點樣處理佢地好...

今年開始，『Pekkle 界』似乎靜哂落嚟，三間獲日本 Sanrio 授權嘅本地持牌公司都冇再幫 Pekkle 推出新產品... 唔通 Pekkle 又要進入佢嘅『低潮期』？咁我呢個網誌豈不是要『關門大吉』？！

7-11 x Hello Kitty & Friends Sweet Delight 公仔 - 第十一週戰績

今次 Hello Kitty & Friends Sweet Delight 公仔換購行動都算係好順利，一早已經換到兩款 Pekkle 公仔，仲要每款都換到 2 隻，而特別版都好好彩比我換齊一套六個，對比起上次換 Sanrio Crystal Charms 嘅成績嚟講，今次都算係叫做有交代，已經好滿足嫁喇！

想換嘅公仔都已經換到哂，冇哂壓力 lu... 剩番落嚟嘅印花，可以隨意去換公仔... 目前手頭上一共有 153 個印花『存貨』...

唔少得嘅當然就係 Pekkle 印花貼紙嘅珍藏啦！儲咗咁耐，先儲得 40 個 Pekkle 印花咋！

提提大家，印花派發日期只係去到下個星二〔26/02/2013〕，而換公仔嘅時間就去到再下個星期二〔05/03/2013〕。仲有印花喺手嘅，記住要喺截止日期前去換公仔呀！已經咁多人換唔到情人節特別版公仔，大家千祈唔好連印花都蝕埋比 7-11 呀！

7-11 x Hello Kitty & Friends Sweet Delight 情人節特別版

7-11 x Hello Kitty & Friends Sweet Delight 情人節特別版喺 13/2/2013 上晝 8:00 開始換，有部份分店，喺半個鐘頭內就已經被搶購一空，有同事用咗四十五分鍾行勻佢所屬地區嘅 7-11，先比佢換到一隻！而我，好好彩地有位朋友一早幫我去換，結果就比佢換到該店最後兩隻情人節特別版公仔！

Kitty 同 Daniel 共用同一條頸巾，幾咁溫馨！睇下 Kitty 個樣幾冧，而 Daniel 紅粉緋緋嘅臉頰，唔知係因為天氣太凍乾燥所致，定係怕醜所以臉紅呢？

情人節特別版連個盒都寧舍 fancy 過人，有好多個心心圖案呀...





一對主角出場！四四正正咁擺喺度，感覺上好似日本嘅結婚公仔呀！對我嚟講，如果 Daniel 同 Kitty 換上 Pekkle 同 Ruby 就 perfect 喇！





情人節特別版公仔大特寫 - Hello Kitty





情人節特別版公仔大特寫 - Dear Daniel

原本以為六個特別版加埋一齊，係可以組成一架列車，實物到手後，先發覺原來係唔可以嫁！『高炒』之下，就可以知道點解會咁，其實係因為當你將兩個情人節特別版公仔拼埋之後，就會出現一支箭貫穿兩個心嘅圖案，勁 sweet 囉！試問喺心連心嘅情況之下，仲點可能容納到第三者呢？

Hello Kitty 即係 Hello Kitty，不愧為 Sanrio 嘅大家姐，龍頭地位果然係冇人可替代！照我估計，應該未到中午時份，全線 7-11 已經換罄！相信呢款特別版有好多人都換唔到。唔知係唔係有好多 7-11 店，內部已經一早 hold 住咗 d 貨呢？不過聽到 7-11 嘅店員講，今次情人節特別版只係番咗兩箱，比之前兩次特別版嘅數量為少，所以好快就換哂！呢 d 唔知係唔係 7-11 嘅市場策略，想掀起一個換購熱潮呢？

不過唔知 7-11 又有冇細心唸過，喺長假期當中，一個好應該可以舒舒服服、冚被大覺瞓嘅早上，好多人選擇寧願犧牲休息時間，一大清早就爬起身去排隊換公仔，可惜最後都係換唔到嘅話，佢地係會有幾咁失落呢？喺新年呢個高高興興嘅日子，為乜要搞到人地狼狼狽狽、東撲西撲、大費周章之後，結果都係換唔到公仔，令到大家都怨聲載道、失望而回呢？呢個情況，又係唔係 7-11 預期想見到嘅呢？喺鋪天蓋地嘅投訴聲之中，佢地呢個銷售安排，究竟仲算唔算係成功呢？希望 7-11 嘅市場部職員，會好好檢討一下啦！

7-11 x Hello Kitty & Friends Sweet Delight 公仔 - 第九週戰績

換齊兩款 Pekkle 同埋兩套特別版之後，都冇乜特別意欲再去換公仔，所以今個星期都只係換咗一隻，估唔到換多一隻，又比我多一次驚喜喎！！

兩隻『啫喱 Pekkle』同埋兩隻『朱古力 Pekkle』，兩款都湊夠一雙，對我自己嚟講，已經算係超額完成嫁喇！好開心、好滿足呀！

唔知 Pekkle fans 覺得『啫喱 Pekkle』得意 d、定係『朱古力 Pekkle』得意 d 呢？

7-11 x Hello Kitty & Friends Sweet Delight 新年特別版

今次換 Pekkle 公仔都尚算順利，因為只係用咗好少時間，就已經換齊『啫喱 Pekkle』同埋『朱古力 Pekkle』，仲要唔洗好似上次換 Crystal Charms 咁，又要出街買、又要人送... 今次純粹係靠印花喺 7-11 換番嚟，雖然數量就一定唔及龍頭 Vi 咁多，不過我都已經好滿足嫁喇！

因為已經達標，又仲有印花剩，所以我又心思思想換齊一套特別版，湊成一架火車，就係咁，1/2/2013 又要努力過喇...

尋日朝早番工之前就去 7-11 換公仔，嗰間 7-11 嘅店員已經好好人，比咗成八、九盒公仔任我揀，奈何我將幾個盒反覆咁又按又摸，個感覺都係一樣，心唸 "出事喇，應該係同款"，不過見個店員咁好人，又唔好意思唔換，所以結果都係換咗兩隻公仔，拆開嚟睇都真係兩個相同嘅大口仔！



好彩今日屋企團年出街食飯，去咗另外一區嘅 7-11，終於都比我換埋隻新年特別版嘅布甸狗火車頭喇！





zoom 近 d 睇清楚，喺比較之下，我覺得大口仔靚 d，所以我都唔介意用多咗 16 個印花，去換多一個大口仔番嚟！

依家尚欠情人節特別版嘅 Hello Kitty 同 Dear Daniel，就可以儲齊六個特別版，湊成一架火車！由於 Hello Kitty 同 Dear Daniel 嘅體型相若，而今次特別版佢地兩個嘅造型亦都好類似，所以今次要換到一對嘅難度，應該會比之前兩次特別版為高，希望到時可以順利換到啦！

7-11 x Hello Kitty & Friends Sweet Delight 公仔 - 第八週戰績

換購第二期公仔嘅第二週完結之前，終於都比我換到 No. 14 嘅朱古力 Pekkle，雖然只係得一隻，不過都好滿足嫁喇！而今週嘅成績亦都比上週好，起碼唔會再重覆四隻布甸狗咁悽涼，叫做有交代啦！

No. 14 朱古力 Ahiru No Pekkle

進入第二期換購糖果系列嘅第二週，喺幾『驚險』嘅情況之下，終於都換到『朱古力 Pekkle』喇...

上星期提到，剛剛開始換第二期公仔時，7-11 嘅職員會問你想換第一期嘅甜品系列定係想換第二期嘅糖果系列，當時我仲讚揚 7-11 呢個安排好好...言猶在耳，呢個星期再去換時，已經冇咗呢支歌仔唱，間間 7-11 嘅職員都表示：唔知嫁喎！依家兩期已經撈亂哂嫁喇！

聽到佢地咁講，個心即時冷咗一截，心唸：我都仲未換到『朱古力 Pekkle』，冇得揀第二期公仔，咁抽中嘅機會咪會細咗？！不過都冇計啦！既然去咗四、五間 7-11 都係咁講，應該都係冇辦法...

係『患得患失』嘅心情之下去換，店員拎咗一個個盒凹咗嘅公仔比我，當時我真係好唔想要，好想開口同個店員講，叫佢換過另外一個比我...

正面四角都有哂摺痕...





zoom 近 d，連個盒中央位置，大口仔嘅上、左邊位置都係凹咗嘅...

跟住就係個盒嘅兩邊，四角位置都一樣係有摺痕...

如果換轉係平時嘅我，我唸我真係會換過另外一盒，不過唔知點解當時個心又係度唸：算啦！可能整定要我換到呢盒公仔，唔換喇！

為咗『營造』緊張氣氛，已經習慣咗換完公仔之後，首先係會摸下、估下，最後先會剪開個袋。當我摸第一下呢個公仔時就覺得，點解呢個公仔好似又細個、又咁平滑咁嘅？摸下摸下好似『感覺』到有個長方形嘅『物體』，心想唔通就係『朱古力 Pekkle』？跟住就即刻喺黑色膠袋上嘅窿 "裝" 下... 不得了喇！仲唔係你？仲唔係『朱古力 Pekkle』？！

Pekkle 頭頂嗰 "三條毛"...





Pekkle 嘅精靈大眼加黃色鴨咀...





忍唔住要剪開個黑膠袋，終於都得償所願，抽中咗 Pekkle 喇！

正面





背面





一如以往，Pekkle 嘅 "後尾枕" 位置，都一樣印有 Pekkle 嘅全名。





打開咗儲物格位置，正如 blog 友可愛小 win win 所言，呢個儲物格比『啫喱 Pekkle』 大，比較實用，但係以公仔嘅造型嚟講，似乎就係『啫喱 Pekkle』嘅樣比較得意 d 囉...





真係好『驚險』，好彩我冇因為個盒凹凹凸凸而要求更換咋，如果唔係，就會換走咗我期盼已久嘅『朱古力 Pekkle』嫁喇！