Wednesday, July 27, 2016

Happy Birthday to Pekkle

今日係 Pekkle 嘅生日,今年 Pekkle 應該過咗一個好開心、好特別嘅生日... 因為今年暑假,香港一間物業管理公司置富 Malls,喺佢旗下其中八間商場,打造成 Pekkle 主題商場... ^^

Pekkle 對上一次有幸出現喺商場作為主題人物,已經係 2009 年嘅地鐵青衣城商場,當年 Pekkle 化身成『郵差叔叔』,雖然只係眾多公仔其中一員,但係就足以令我地一班 Pekkle fans 瘋狂...

http://www.pekkle.hk/2009/11/sanrio-village-50_29.html

估唔到,今年喺會輪到 Pekkle 擔大旗,化身為多個商場嘅推廣活動主角,成為全場焦點。呢次活動簡直就係我地一眾 Pekkle fans 喺 2016 年大事回顧之中,最『重中之重』嘅事項。=D

而剛過去嘅星期日〔24/7/2016〕,置富 Malls 於旗下紅磡置富都會為一連串以 Pekkle 作主打嘅暑期推廣活動舉行咗一個『開幕禮』,當日除咗邀請歌星陳柏宇參加之外,仲有 Pekkle『真身』出現,大會仲為 Pekkle 舉行咗一個簡單而隆重嘅生日會,見到 Pekkle 喺台上與一眾嘉賓及 Pekkle fans 一齊切蛋糕,令到台下嘅我都覺得好開心、好興奮...

Monday, July 25, 2016

置富 Malls Ahiru No Pekkle 夏水禮 - 將軍澳都會駅

因為有舊同事住喺呢個屋苑,所以之前都有嚟過呢度,一次咁多啦... hahaha...

呢個商場嘅 Pekkle 擺設係立體造型,熱愛游泳嘅 Pekkle 衝緊浪,真係型到爆呀!


置富 Malls Ahiru No Pekkle 夏水禮 - 觀塘麗港城商場

如果唔係因為有 Pekkle 擺設,我唸我係完全冇機會踏足於麗港城商場...

麗港城商場係平面擺設,主題係雪糕屋.,.



置富 Malls Ahiru No Pekkle 夏水禮 - 紅磡置富都會

呢個暑假,相信一眾 Pekkle fans 都忙於港九新界周圍走,我當然都唔例外... 十二個參與活動商場之中,其中有八個商場都有 Pekkle 裝飾擺設,包括香港區嘅和富薈、九龍區嘅置富都會、麗港城商場、都會駅,同埋新界區嘅置富新一城、馬鞍山廣場、銀禧薈、置富嘉湖。

就等我由九龍區龍頭商場開始...

置富都會係立體擺設,主題係沙灘滑浪、日光浴...

Sunday, July 24, 2016

置富 Malls Ahiru No Pekkle 夏水禮開幕禮 - 攤位有獎遊戲〔限量版 Pekkle 膠扇及 Pekkle 貼紙〕

其實我最初覺得呢個開幕禮好似好無謂咁,所以都唸住唔參加... 好彩最終都係去咗,仲要好好彩一早就去到,結果就喺我閒逛打發時間之際,無意中發現有兩個有獎攤位遊戲,擺放咗喺開幕禮舞台嘅另一邊,咁我先可以有機會贏到限量版嘅 Pekkle 扇同埋 Pekkle 貼紙咋...


置富 Malls Ahiru No Pekkle 夏水禮限量版禮品 - Pekkle 冰袋

對於我嚟講,置富 Malls 呢個『Ahiru No Pekkle 夏水禮』最重之重嘅推廣活動,首推就梗係換領限量版禮物啦。

根據可靠消息,十二個參與活動嘅商場,可供換領嘅禮物都有數量限制,而最多數量嘅商場就係馬鞍山廣場,就係咁,我為咗換到心頭好,去咗呢個從未消費過嘅商場消費...

換領限量版禮物分兩個階段,每個階段嘅換領條件同埋禮物都唔同,首先第一次係 7 月份換嘅冰袋,唔知係唔係置富 Malls 少搞呢 d 推廣活動,由於我務必要換到 Pekkle 限量版精品,所以我都好小心咁事先向唔同嘅商場職員查詢,就連開幕禮當日,我都唔怕醜咁捉住在場嘅工作人員問換領詳情,結果每位職員所答嘅版本都有出入,搞到我非常惆悵...

為免到時換唔到會好失望,我唯有用咗個最『守規矩』〔即係跟足宣傳單張上嘅要求〕嘅方法去消費。我喺兩間唔同嘅舖頭用電子消費嘅方法買嘢,兩張單之中,其中一張係用咗 $500 或以上,而另外一張就係用 $100 或以上... 咁守規矩,梗係比我換到啦!^^

置富 Malls Ahiru No Pekkle 夏水禮 - 開幕禮

我好相信,今年嘅暑假,係一眾 Pekkle fans 最難忘嘅一年!由1990 年 Pekkle『出道』至今,我相信佢都未試過有今年咁『威風』嘅日子...

置富 Malls 市場部同事真係好有 taste,今年揀選咗 Pekkle 成為佢地旗下商場嘅暑期宣傳活動大使。不過因為咁,就令到我地一班 Pekkle fans『疲於奔命』,雖然係攰,不過都攰得嚟都好開心囉!

由置富 Malls 負責管理嘅屋苑、商場,遍佈於港、九、新界各地,而有份參與今次 Pekkle 推廣活動嘅商場一共有十二個,以新界區嘅商場為主,而當中八個場地仲有 Pekkle 美侖美奐嘅裝飾布置添。

為隆重其事,置富 Malls 今日喺紅磡都會搞咗個開幕禮,除咗邀請咗歌手陳柏宇〔我覺得應該請鄧麗欣比較洽當,因為 Stephy 都係 Pekkle fans 嚟嫁!〕出席之外,唔少得嘅梗係我地一班 Pekkle fans 最重視嘅 Pekkle『真身』啦!聽講話係專程由日本邀請 Pekkle 出席嫁!


Thursday, July 21, 2016

Pekkle 又上報紙喇

唔知係唔係有 Pekkle fans 加入咗置富 Malls 做高層呢?今年暑假,置富旗下八個商場,將會以 Pekkle 作為商場嘅主題公仔。今日,有關推廣活動仲喺頭條日報第 15 頁賣咗個四色全版廣告!勁呀!




記得 Pekkle 第一次上報紙已經係 2009 年11月嘅事,又係有關商場宣傳活動,當年係為咗慶祝 Sanrio 50 周年,地鐵旗下商場舉辦咗一連串嘅慶祝活動,雖然嗰次推廣活動並唔係以Pekkle 作主打,但係唔知係唔係地鐵公關嘅安排,多份報紙同時以專題形式,訪問咗當年嘅 Yahoo blog Pekkle fans group 龍頭 『喪 Vi』,因為『喪 Vi』嘅專題訪問,我當年都專登買咗份報紙,剪低留念...

http://www.pekkle.hk/2009/11/blog-post_29.html

而 Pekkle 第二次上報紙,就係有關一田購物優惠日嘅新聞,雖然嗰次上報唔係以 Pekkle 為主題,不過咁啱有兩幅相影到顧客爭相搶購 Pekkle 推廣產品〔包括床上用品同埋旅行喼〕。Pekkle 見報喎,點可以唔做剪報留低呀?

http://www.pekkle.hk/2012/05/pekkle.html

今次就係 Pekkle 第三次上報紙喇,亦都係 Pekkle 最叻叻嘅一次,因為除咗係全版彩色 Pekkle 廣告之外,仲有歌星陳柏宇同埋電視藝員陳庭欣伴住 Pekkle 出場喎,Pekkle 係唔係仲叻過啲明星先?

30/7, 31/7, 13/8 同埋 14/8 仲會有 Pekkle 限量精品換購,相信到時一眾 Pekkle fans 又會瘋狂搶購嫁喇... 希望到時可以順利換得到啦!

Tuesday, July 19, 2016

Sanrio characters 2015 年日版貼紙

上星期六行街,無意之中比我發現嘅日版貼紙,可能呢款貼紙已經出咗有一年時間,當我喺貨架上發現時,只係剩最後一張,店員亦都話已經冇哂存貨,可惜...

貼紙正面。日本貨即係日本貨,特別有 heart、特別精美,普普通通一張貼紙,都要喺右下角整個透明嘅『窗口位』,雖然冇乜大作用,不過呢啲咪就係日本貨主張嘅細緻/精美地方囉...


 
貼紙背面



因為係雜錦公仔款,整張貼紙只有兩個 Pekkle,不過我都好滿足嫁喇...





因為呢張貼紙係如假包換嘅日本貨,標明係 "Made in Japan" 之外,仲要係 "For sale in Japan only"... 張貼紙只係賣廿幾蚊,我就覺得值回票價喇!



Monday, July 18, 2016

草莓雜誌 - 2016 年 8 月號

2016 年 7 月 10 號出版嘅 8 月號 Sanrio 官方刊物草莓雜誌,今期嘅贈品係一把包咗膠嘅紙扇,共有五款選擇,而其中一款雜錦公仔,又有 Pekkle 份喇!正~~










雖然 Pekkle 只係好似粒豆豉咁嘅大細,但係好難得有 Pekkle 呀,又點可以錯過呢?^^



至於雜誌內頁,揭勻全本,只係搵得呢一幅圖有 Pekkle 囉,仲要係好似『幾千年』前嘅版本咁... 唔識睇日文,唔知講乜,不過既然有 Pekkle〔雖然係樣衰咗啲〕,點都要介紹下嘅...





『樣衰』版嘅 Pekkle,唔只 "封咗" 個咀角,個頭頂三條毛同個身形比例都好似出咗少少問題咁... 如果唔係喺草莓雜誌入面搵到,一定以為係老翻... =P

Wednesday, July 6, 2016

2016 年 Sanrio Characters Ranking


今年 Sanrio 最受歡迎卡通人物選舉嘅投票已經告一段落喇...日本、台灣兩地同日截止投票...

日本官網


Saturday, July 2, 2016

Godiva 90 週年扭蛋吊飾及匙扣

有睇開我網誌嘅人,應該都知道除咗 Pekkle,我最大嘅興趣就係食,主力係朱古力同雪糕,所以,當我知道 Godiva 為咗慶祝九十週年而搞嘅推廣活動,又點會錯過呢?

要首先喺 Godiva 消費滿 $200 以上,就可以加 $30 換一個玩扭蛋嘅代幣,每個扭蛋均內藏一款製作精美嘅『Godiva 夏季系列甜點』吊飾,吊飾一套共有四款,儲齊四個吊飾〔不限款式〕,可憑換購扭蛋時附上嘅密碼紙,於網上登記後,就可到門市免費換取一個精緻嘅匙扣,可作扣上吊飾之用。

2016 年最新推出嘅夏季系列甜點 -- Duette。一共有兩款口味,識我嘅都知我當然係會選擇榛果蓉嗰款啦!榛果蓉朱古力醬流心蛋糕,蛋糕內有朱古力餡,配上 Godiva 黑朱古力軟雪糕口味,綴以香脆的巧克力餅乾碎或、濃郁的朱古力醬, 口感好似好豐富咁囉。不過,我就覺得呢款甜品唔係太合我口味,可能我唔太喜歡食蛋糕,加上呢個蛋糕係偏向有少少 muffin 嘅質地,唔夠幼細、軟熟,我只可以講呢款甜點並『唔係我杯茶』囉.... 不過,既然係 Godiva 嘅新產品,試一次都冇壞嘅...




湊夠 $200,即刻先換四個代幣啦!睇下自己有冇咁好彩,一抽四個即刻中哂四款,唔洗再嘥錢抽過...

連代幣都靚過人,印哂 Godiva 嘅 logo...



結果我都係玩咗兩次,扭咗八個扭蛋先可以儲齊一整套... 不幸中之大幸係,另外一套亦都只係重覆咗其中一款,仲要係我至愛嘅軟雪糕添〔無論係吊飾,或者實物,軟雪糕都係最得我心〕。



三個軟雪糕吊飾



兩個雪糕杯吊飾





兩個朱古力凍飲吊飾



一個 Duette 吊飾



八個吊飾嚟張大合照先



憑附上嘅密碼紙於網上登記,可於 Godiva 門市免費換取匙扣一個,個匙扣不比吊飾差,製作都一樣係非常精美。



盒面有熨金字及 logo,厚身絨面紙盒,連個盒都好『靚仔』呀...



將八個吊飾放番入盒內,整齊又美觀。雖然要用 $120 先可以換到四款吊飾,感覺上好似有啲貴,但係就細緻度、精美度去衡量嘅話,我就覺得物有所值囉。