Tuesday, October 29, 2013

搬遷啟示

數數手指,原來我由 2006 年已經開始寫 Pekkle blog,雖然,計埋呢篇 blog,總數都只係得 484 篇,以七年嘅時間嚟講,產量唔算多。不過,由最初我好被動咁接受同事邀請之下去開始寫呢個 blog,到後期認識咗一班 "志同道合" 嘅 blog 友之後,就開始將寫 blog 視為交換 Pekkle "最新動態" 嘅方法。自此,寫 blog 嘅心態都變得積極咗。

喺呢度,除咗好意外咁認識咗一大班 Pekkle fans 之外〔寫 blog 初期,當時嘅 Pekkle 其實已經算係 "被淘汰" 一族,真係冇唸過原來仲有咁多人鍾意 Pekkle 嫁 〕,仲認識咗一 d "好朋友",佢地未必係 Pekkle fans,但係出奇地可以透過呢個 Pekkle blog 嘅平台做到 "好朋友".... 雖然,我未曾見過任何一位因為呢個 blog 而認識嘅朋友,不過唔知點解,個心就係覺得大家好似已經建立咗一份友誼咁...

可惜,當大家叫做熟絡咗之後,Yahoo blog 竟然要關閉.... 兩年前,先啱啱叫做完成咗 upgrade 嘅工作,記得當時都用咗一段時間去 "搬" blog,仲要喺辦公時間上埋 Yahoo 個 office 核實身份先搞得掂!以我咁懶散嘅性格,都會不厭其煩咁去做,無非都係想繼續維持住呢個可以同大家溝通嘅方法... 估唔到只係過咗短短兩年嘅時間,今日 Yahoo 竟然要將成個 "部落格服務" 摺埋...

為咗表達我對 Yahoo blog 嘅不滿,我係唔會選擇由 Yahoo 新收購公司嘅平台去繼續寫我呢個 blog,我決定將我嘅 blog 遷移到 Google blog,新嘅網址如下 -

http://www.pekkle.hk/

大家亦都可以經以下網址 "訂閱" 我嘅 blog -

http://www.pekkle.hk/feeds/posts/default

又或者經呢個電郵地址與我保持聯絡...


不過請大家比少少時間我整理一下個新 blog 先。無論係曾經喺呢度留過言,又或只係 "到此一遊" 嘅朋友,我都好希望可以喺我嘅新 blog 度同大家繼續保持聯繫嫁...

Sunday, October 27, 2013

天平庵和果子 x Sanrio Characters

家姐由日本帶番嚟嘅手信 -- 天平庵和果子 crossover Sanrio Characters


日本限定!




著重包裝嘅日本人,又點會只係喺盒面印有幾位 Sanrio characters 咁 "小兒科" 呃?所以除咗每件和果子以印刷精美嘅包裝袋獨立包好之外,盒入面亦印有日本東京市五大 landmark,仲要係日文、英文對照!果然係好符合作為手信嘅 "條件"!





個人覺得細盒裝〔五個裝〕比大盒裝〔十個裝〕嘅印刷仲要精美,因為可能細盒裝個盒 size 比較細,所以佢地將東京市五大地標嘅英文版印咗落去墊底嘅卡紙上,真係一絲不苟!





和果子一共有五款包裝,不過味道就係一樣嘅。


唔洗問,呢盒和果子之所以能夠吸引到我嘅眼球,梗係因為 Pekkle 啦!睇下 Pekkle 喺 Tokyo Skytree 下走嚟走去幾得意。





隨盒附送產品說明一份,而內頁就印上有份出場嘅 Sanrio 人物介紹!






講番個真正主角〔不過對於我嚟講,Pekkle 先係真正嘅主角
〕---- 和果子。外型就有 d 似我地去酒樓飲茶時食嘅炸奶黃包,不過個口感就啱啱好相反,係好軟糯嘅。至於個味道嘛... 絕對唔係我杯茶囉!我發覺所有日式和果子都係有一個通病,就係實在太甜啦!當我食緊呢件和果子嘅時候,令我覺得自己好似食緊個純正蓮蓉月餅咁囉〔其實係比月餅仲要甜〕!所以,如果唔係因為有 Pekkle 嘅 "出現",唔好話要我買,就算係請埋我食,我都未必會賞面囉!

Pekkle 2013 年床上用品

24/10/2013 - 28/10/2013 係 AEON 百貨會員購物吉日嘅日子,收到佢地 send 嚟嘅宣傳單張,"驚見" 雅芳婷今年再一次為 Pekkle 推出咗新系列嘅床上用品!會員喺吉日期間購買,仲會有照價九折嘅優惠,咁抵買,唔洗唸啦,星期六就即刻去咗 AEON 入貨!




今次 Pekkle 嘅造型係 "廚師 look",戴住淺藍色嘅廚師帽、著上同色系嘅廚師服,再以淺黃色作為背景嘅底色,映得 Pekkle 好 sharp 醒喎~~



由於之後仲有其他地方要去,唔方便拎住咁多嘢,所以暫時都只係買咗單人床笠、枕袋套裝及被袋各一套。如無意外,我應該都會一如以往,再買多一套雙人床笠用嚟整多幾個枕袋,同埋買多一套單人床笠作收藏之用!









後記:之後再入貨,依家存貨係兩套單人床笠、一套雙人床笠加一個被袋...



Monday, October 21, 2013

2013 年日本 Sanrio 最受歡迎卡通人物選舉系列精品 - 八達通卡套

千呼萬喚始出來... 有睇開草莓雜誌 or 去開征服世界買嘢嘅一眾 pekkle fans,都應該有留意呢款精品其實喺幾個月前嘅草莓雜誌已經介紹過,而征服世界亦都接受預定咗幾個月,上星期終於都番咗貨 lu~

呢個係 2013 年日本 Sanrio Characters Ranking 系列嘅產品,其實個選舉都已經完咗差不多有三個月啦,唔知點解呢樣產品要拖到今時今日先推出市場呢?

拆包裝盒前






拆包裝盒睇得清楚 d...

正面,好經典嘅 Pekkle 造型...





卡套背面






隨卡套附送一條都幾墜手嘅吊鍊








中間位置啱啱好 "攝" 到一張八達通卡...





卡套背面印住大大個 "Sanrio 2013 Character Ranking" 字樣,無花無假... Pekkle 當然就係我心目中嘅 Number One 喇!






呢個八達通卡套成個都係硬膠做成,製作雖然好精美,奈何個 size 都幾大,而且都幾墜手,好似唔多實用咁囉,不過呢個產品應該係推出哂全部有份候選嘅 Sanrio 卡通人物,所以為咗支持 Pekkle,買個嚟儲下都唔錯嘅!