Friday, May 25, 2012

Pekkle 再一次吐氣揚眉,上到『頭條』喇...

鍾意左 Pekkle 咁多年,以為 Pekkle 同我一樣都係 d 好低調既人,但係自從 2006 年開始寫 yahoo blog 之後,先發現原來自己並不『孤單』,鍾意 Pekkle 既人係大有人在既,呢幾年唔單只識到一班同樣鍾意 Pekkle 既人,仲因為龍頭 Vi 既關係,令到已幾近『絕跡』既 Pekkle,係本地 Sanrio 精品市場再次『活躍』起黎...

2009 年係 Sanrio 50 周年既慶典,一向係 Sanrio characters 之中,Pekkle 都算係籍籍無名既『大配角』,但係當年地鐵係旗下商場青衣城為 Sanrio 50 周年舉行既主題活動之中,Pekkle 竟可搖身一變,成為當年既主角之一,亦因為呢個活動,再加上抵得唸既龍頭 Vi,Pekkle 終於都吐氣揚眉,第一次登上
報紙專訪
...

估唔到係兩年幾三年後既今日,Pekkle 又再一次登上報紙,今次仲要唔再係 B 版,係真真正正既『頭條 A 版』...

雖然係叼左『一田購物優惠日』既光,但係呢段新聞僅有既三幅相之中,就有兩幅出現左 Pekkle 喇!睇下 Pekkle 幾叻仔!






睇唔清楚?唔緊要,zoom 大 d 比大家睇清楚... 首先係掛左係雅芳婷專櫃天花既 Pekkle 宣傳板...





其次就係有位內地遊客拖住既 Pekkle 旅行喼... 當堂覺得呢位先生好有品味~~




今朝番工前一睇到呢段報導就急不及待剪低佢留念,唔知各位 Pekkle fans 又有冇留意到呢?希望你地都可以 keep 得番呢份報紙收藏啦!因為網上版係冇呢位內地遊客拖住 Pekkle 喼既相嫁!

Thursday, May 24, 2012

2012 年一田購物優惠日 --- 號外



 
一如以往,我又趁 lunch time 去一田打左個白鴿轉,先去睡衣部睇下有冇新款 Pekkle 既睡衣,可惜 Pekkle 只得一款舊既休閒服,之前已經買左,所以即時轉陣去到中間展銷場,因為每次 Uji 既 counter 都係擺係呢個位置,今次佢地 counter 既情況好似稍為好左,冇之前咁混亂、人山人海,可能 Uji 推出 Pekkle 雪狐絨系列實在太密卦?每半年都有一款,所以係食 lunch 既時間,都仲有 Pekkle 既雪狐絨被賣。當然,根據佢擺係 counter 上既四疊手寫單〔分別代表唔同款式〕睇黎,係四款雪狐絨被之中,Pekkle 依然係最多人買既一款,因為係四疊單之中,Pekkle 嗰疊係剩番最少既!可惜今日 Uji counter 唔多人,因為驚會比 Uji 既 staff 鬧,所以都唔敢影低張被同疊手寫單比大家睇。

睇完睡衣,再睇埋張被,就梗係去今次一田購物優惠日既重點推介 Pekkle 產品 ---- 行李喼。根據宣傳單張上所示,Pekkle 行李喼只有 29" 一個 size,原來仲有 20" 同 25",一共三款,售價由細至大分別為 $499、$599 同 $699。




好可惜,係我發現有三個 size 選擇既同時,亦都見到掛係天花位置宣傳廣告上兩個大字 ---『售罄』...





有冇快成咁呀?九點鐘開始,一點鐘已經賣哂?!雖然之前已經『說服』左自己,個喼唔等洗兼嘥地方,唔會買!但係見到佢話賣哂,個心不期然又有 d 失落喎!我都係犯賤,可以擁有時就唔會珍惜,到冇左時又會好後悔... 

每次一田購物優惠日,係來回一田與沙田火車站之間既地方,總係會出現『人喼爭路』既情況,今次亦都唔例外。由於 Pekkle 有份,我比以前更加『金精火眼』想睇下有咩人會買左 Pekkle 喼。結果,係行去一田既路程之中,十個有買喼既人,有八個都係買左鬆弛熊既款式,全程路就只見到一名女士拖住個 Pekkle 喼,個喼既高度大概都去到呢位女士腰部對上少少既位置.... 心唸,如果我買左,究竟點樣先可以拎到呢個『龐然大物』番屋企,而又唔會整污糟 / 整花佢既呢...  去到一田之後,係恆生既 counter,又再一次比我見到 Pekkle 喼喇,呢次係一位男士,佢拖住 Pekkle 喼排緊隊換禮品,既然佢企定定排緊隊,正正就係我影相既大好機會啦!





原本以為只係得一、兩個人買左 Pekkle 喼,應該都仲有大把存貨乏人問津啦!點知原來已經售罄,仲要『消失』得無影無蹤添... 究竟係邊個咁犀利呢?腦海之中,忽然『浮現』左喪 Vi 同埋佢既"御用掃貨速遞軍團"... 會唔會真係佢呢...

Monday, May 21, 2012

2012 年一田購物優惠日

半年一度一田購物優惠日將於星期四開始喇!前幾日收到一田寄黎既宣傳單張,二話不說梗係要睇下有冇 Pekkle 新產品買喇,唔睇由自可,一睇不得了,今年 Pekkle 有激罕產品賣,仲要係限量發售,fans 們又要部署一下掃貨行動喇!





印象之中,Pekkle 係從來未推出過旅行喼,有 29" 高,都相當大個下,成個喼都印滿 Pekkle 頭,如果當年吹先生同喪 Vi 講既野係事實既話〔即係 licensee 推出每件自家設計既產品時,係會以每件產品上逐個公仔樣去計錢〕,咁呢個佈滿 Pekkle 頭既喼都只係賣 $699,係唔係超級抵先?仲要之前 Pekkle 係從來都未推出過同類型產品,再加上每店限售 50 個,以上種種『條件』,真係會令人覺得就算係冇須要,都會忍唔住去買番一個... 完全係捉到正典型消費者“唔好執輸”既心態... 我作為一個典型既消費者,究竟最終會係隻魔鬼話事,定係天使會取得最後既勝利呢?




Uji 今年又會推出 Pekkle 單人雪狐絨印花毛氈,仲要又係一次過要買兩張.... 之前問極 Uji 都話唔會出 Pekkle 被,依家就連續兩次一田購物優惠日都有 Pekkle 既雪狐絨床品推出,乜被鋪咁易爛,成日都要換新既咩?唔買,又驚將來買唔番會後悔,但係買得咁密,幾時先用得哂?香港寸土呎金,邊有咁多空間擺咁多『大型產品』呀?





最後一樣 Pekkle 貨品就係復活節已經推出左既床品,價錢冇變,而我又已經買左,所以對我黎講冇乜吸引力。如果未買既 Pekkle fans,純粹係為左呢款床品而去一田購物優惠日既話,我奉勸你地一句:無謂單單為左呢一樣貨品而去同人迫囉!因為呢個系列係任何一間百貨公司既雅芳婷專櫃,都係賣緊同一個價錢,與其辛辛苦苦同人迫,不如舒舒服服去 d 冇咁多人既地方先買仲好啦!





根據以往一田購物優惠日人山人海既情況,希望今次各位 fans 都可以順順利利買到心頭好啦!

Sunday, May 20, 2012

日本 Sanrio 2012 年最受歡迎卡通人物選舉


一年一度日本 Sanrio 既最受歡迎卡通人物選舉又黎喇,Pekkle fans 記得唔好錯過喇!


上年選舉既『宣傳海報』,係以 2010 年既頭十名卡通人物為主,而今年就大堆頭,一百位卡通人物放埋一齊,Pekkle 雖然細細隻,不過都算好 sharp,一眼就認得到!唔知各位 Pekkle fans 又搵唔搵到 Pekkle 呢?





投票日期為 10/5/2012 10:00 至到 19/08/2012 23:59。今年將會係六月尾有個『中期報告』,而最後結果既揭曉日期為 01/09/2012。希望 Pekkle 可以由頭帶到尾,一路 keep 到頭十名位置喇!




 去年選舉排第十五位既 Pekkle,估唔到今年既候選編號係 93... 排到咁後既...







至於投票程序就比以往嚴謹,要輸入電郵地址及少量個人資料...


 




投票完成之後,會出現呢個畫面,講到明每人每日只可以投每位卡通人物一次,因為今年要輸入埋電郵地址,所以好難係一日之內不停咁投票比 Pekkle... 




如果同一日之內,重複投票一次或以上,畫面就會出現呢個『訊息』,叫你聽日先再投過...



 

雖然今年投票既方式複雜左少少,不過希望各 Pekkle fans 唔好嫌煩放棄,因為要保持 Pekkle『名列前茅』既紀錄,就要靠大家一同努力,每一日都要上網投票比 Pekkle 喇!

Friday, May 18, 2012

Sanrio Pekkle memo pad


Sanrio 早前推出左兩款 Pekkle memo pad,我覺得今次既 memo pad 真係做得好有 heart,無論係紙張款式既設計、定係 size、都係又靚又實用既... 值得一讚!

先黎睇睇細 size,大概係 3.5" x 5"。



又同女朋友仔 Ruby 一齊喇!今次 Pekkle 變身做 cameraman,而 Ruby 就負責採訪。




世界難撈,連 cameraman 都要『粉墨登場』...




內頁一共有八款唔同既設計,每款各有七張,一本一共有五十六張 memo 紙,設計都係圍繞番拍電視 / 電影既主題,真係靚到唔捨得用呀!












跟住就係睇下大 size,呢本約係 4" x 6"。




大、細 size 都係一樣靠膠封面上既『彩光』營造出閃粉既效果,係唔係令到平平無奇既 memo pad 即刻『閃耀、高貴』哂呢?





既然我鍾意既係 Pekkle,咁佢既產品梗係出現得越多 Pekkle 就梗係越好嫁喇!呢款大 size 既 memo pad,無論係封面或內頁,都有好多 Pekkle 做 backdrop 嫁,好正呀~~

大 size 一樣係八款設計,每款七張,一本一共五十六張。雖然呢款 memo pad 冇主題,但係見到咁多 Pekkle 都已經好滿足!








呢款紙又係有 Pekkle 做『佈景版』嫁!




影得唔係好清楚,呢款紙 backdrop 個 outline,其實都係 Pekkle 黎嫁!




呢兩款 memo pad 真係又靚又平又實用,唯一可以彈既地方就係紙質比較粗劣,有少少似再造紙,不過每張 memo 紙上面都已經印有七彩繽紛既公仔,所以偏黃左既紙質其實都唔係好覺眼,再加上賣得咁平,我覺得已經係物超所值喇!