Monday, January 26, 2009

2009 年〔己丑年〕快樂

                        


祝大家牛年進步、心想事成!!


最緊要就係身體健康!!


恭喜!恭喜!


Sunday, January 18, 2009

解構 Pekkle 賀年掛飾

上星期收到 blog 友大寶寶同雪藍通知,Pekkle 出左新既賀年掛飾,個心已經不時記掛住,希望快 d 到 weekend 可以去買,就係等待既呢一個星期內,眼見好多 Pekkle blog 友已紛紛入貨,恐怕到 weekend 已經斷市,所以更加心急想買到。剛好星期五約左友人到佐敦晚飯,唸住路過旺角就去美寶入貨。根據以往既經驗所得,我都係應該打電話去美寶 check 左貨先,以免又失望而回,白行一趟...


以下就係我同美寶老闆娘既對話...


我:想問下鴨仔係唔係出左賀年掛飾呀?


老闆娘:係呀!


我:咁請問仲有冇貨?我想今晚黎買...


老闆娘:你係邊個呀?


我:下?我係邊個?


老闆娘:係呀!你叫乜名呀?


我:我想黎買個掛飾咋喎,都要問名嫁?


老闆娘:係呀!因為 check 下你係唔係之前訂左貨既人嘛...


我:咦?訂左貨?我之前冇訂貨嫁喎.... 乜你地冇現貨咩?


老闆娘:我地依家有貨係度,不過全部都係之前落左 order 留嫁!


我:下.... 乜要訂先有貨既咩?咁我依家訂囉!


老闆娘:無嫁喇喎!你想訂都冇嫁喇!


我:下!!唔再有貨?!


老闆娘:係呀!冇嫁啦....


一聽到老闆娘咁講,唯有收線啦!心唸都係要去番玩具街買嫁喇!今日咁岩又同朋友出左去旺角整手提,整完手機之後經過瓊華,順便上去睇一睇,當時老闆兩公婆都係舖,又係『男主外、女主內』咁,我抱住明知冇既心態就咁企左係門口問老闆,係唔係出左鴨仔賀年掛飾,老闆二話不說就行番入舖拎出黎比我睇,仲好細心咁講埋兩款有咩唔同、咩價錢,仲要試埋炮仗聲比我聽添... 當時老闆娘呆在 counter 前面,完全冇出過聲,其實我當時都有少少唔高興,真係想出聲 "話" 老闆娘... 當然最後我都係冇出過聲啦!其實只要比我買到 Pekkle,條氣都已經即刻順番哂啦! 



今年同舊年既賀年掛飾比較,大家都一樣有炮仗響聲,不過無論係 Pekkle 個樣定係整體造型,都係今年果個靚好多!雖然今年果個明顯係細個 d... ...



記得可愛小 winwin 話,美寶老闆娘堅持自己既掛飾有別於玩具街之流,仲硬撐佢自己賣既貨係原裝日本貨... 不過當我買左呢件掛飾之後,已經即刻對美寶老闆娘之說有所保留...


雖然我唔識日文,但以一向支持開 Pekkle 既我黎講,係呢張卡上面印既每一個日本字,係同 Sanrio Puroland 出產既貨品一模一樣既,不過 Sanrio Puroland 出品又偏偏只會印有 Sanrio Puroland 而唔係 Sanrio Smiles 既字樣嫁喎;若以 Sanrio Smiles 字樣出既日本正貨,又唔會印埋地址、電話呢 d 資料落去,甚至連個網址都唔同囉... 再者,絕大部份既日本貨,都習慣將價錢印係貨品卡上,呢張卡又係搵唔到有呢個 "特徵" 既...


而最令我費解既係:點解日本人出既產品,會識得用中國人既祝福語呢?真正係日本出既賀年掛飾,點都應該係以日文為主,而唔係印 d 咁港式既新年祝福語卦?



根據以上種種 "疑點",我有理由相信個老闆娘只係死撐話自己賣日本貨囉,若以係玩具街開宗明義咁賣冒牌貨黎比,玩具街反而係有誠信得多.... 其實一向冇乜新 products 既 Pekkle,無論件貨係真定假,只要做得似模似樣,價錢合理,我相信大部份 Pekkle fans 都唔介意買冒牌貨囉!


Monday, January 12, 2009

老翻 Pekkle

最近氣溫驟降,連 check blog 既意欲都冇乜,所以連 Pekkle 出左賀年掛飾都唔知,今個 weekend 買唔到,唯有等下星期先去買啦!不過今日係一個舊屋村閒逛,又無意中比我係一間舊式文具店入面,搵到 d 老翻 Pekkle...


呢個膠銀包,真係幾可亂真,不過因為冇任何 Sanrio 字眼,再加上佢既售價,都知佢應該係 "老翻"...



呢個八達通卡套明顯係假野,d 顏色係印到出哂界既!不過見 Pekkle 戴住 "太陽超" 既造型都幾 cute,成個盲俠咁,所以都照買....



呢張係 Pekkle "刮字貼",我之前都見過其他人有,但係自己就從來未見過實物,今次見到,發覺 Pekkle 既像真度都幾高,仲要係幾平添,所以就算明知係老翻都照買....



呢張貼紙我又係完全搵唔到佢似 "正版" 既痕跡,不過老細堅持話呢張一定係正牌日本貨,佢持既理由只有一個:呢張貼紙對比起其他既貼紙,係貴一倍咁多既!!.... 老細,你咁都得?都出左咁多年啦!仲記得?而且個價錢都係你自己定嫁咋嘛....



因為係舊式文具店既關係,d 貨都擺得幾亂,同埋都幾污糟,我 "尋寶" 完畢,對手已經黑哂,搞到要即刻搵地方洗手,好彩都叫做有 d 收鑊,算係 "犧牲" 得有價值啦....


Saturday, January 3, 2009

Le Salon de Thé de Joel Robuchon

Le Salon de Thé de Joel Robuchon 既牛角酥堪稱係全香港至正既牛角酥,我呢個 "大胃王",當然要去 "朝聖" 下啦!


之前經過呢度無數次,不過因為位處角落位,一直都未有入內 "參觀" 過,今次終於都 "的" 起心肝去睇睇...


因為呢層只係麵包部,並唔係餐廳範圍,所以睇起黎門面比較狹窄....



走唔甩,第一選擇係牛角酥....真係幾好食,雖然唔係新鮮出爐,不過一樣鬆脆可口.... yummy...



第二選擇,亞蘇之前係節目 "蘇 Good" 都有介紹過既 Danish... 呢件係 apricot... 都好好味!



呢個朱古力牛角酥就麻麻地勒,冇上面兩款咁鬆脆之餘,連 d 朱古力餡都比想像之中遜色...



買左一包 walnut brownie 同一粒朱古力... brownie 既質地始終都唔係我杯茶,純粹個人喜好問題,所以覺得麻麻地.... 至於粒朱古力,對於我呢個 "黑朱古力怪" 黎講,朱古力味唔夠香濃、幼滑,果仁就夠脆口,可惜加左 d 應該係柑既 "物體" 係入面,果種甘澀味,就唔多岩我胃口 lu...



雖然買既只係 d 麵包小點,不過都一樣可以用佢地擺係商場既檯凳享用外賣。有數張檯沿住商場走廊位擺,坐係度可以望到成個商場既中心位置,有少少 "居高臨下" 既感覺,比城中出名既 cafe "景觀" 仲要開揚同 "四正",果一刻覺得自己好似變左 "上等人",好優閒咁嘆緊 afternoon tea 一樣... 就當住係 "上等人" .... 一陣咁多啦!



總括黎講,牛角酥既質素真係唔錯,danish 都唔差.... 再加上以咁既環境同服務,價錢都尚算合理,係值得一試既,不過都只限於牛角酥同 danish。


Thursday, January 1, 2009

2008 年 "大事" 回顧


霎下眼,又過左一年喇!回顧過去,日子年年都係咁樣過,而係 2008 年有一件事係同以往有 d 唔同既,就係寫 blog 既習慣。之前都提過,呢個 blog 係 2006 年中,一位舊同事幫我開既,目的只係為左提供一個平台比大家用黎保持聯繫之用,所以一路以黎我都冇乜 update 過呢個 blog.... 不過係機緣巧合之下,睇到 Korean Pekkle 既 blog,就係咁開始左我踏上呢條寫 Pekkle blog 既 "不歸路"...


其實最初我都只係定期 check 下兩、三位有寫 Pekkle 既 blog,睇多寫少,完全唔係積極寫果隻... 由係 2008 年識到雪藍開始,一切就得改寫.... 我覺得雪藍既 "出現",對一班 Pekkle fans 既影響真係好大,佢將我地一班四散既 Pekkle fans 凝聚一齊,我之所以可以認識到一大班 Pekkle fans,雪藍真係功不可沒.... 亦都係因為識到一大班 Pekkle blog 友,先知道原來網上都一樣可以交到好有質素既朋友....


我所認識既 Pekkle fans 都係好無私,無論係見到新貨、絕版貨,都會第一時間上 blog 通知大家;遇到有 blog 友買唔到 Pekkle products 時,又會有其他 blog 友義不容辭咁代為購買再交收埋;有 blog 友甚至會 "不辭勞苦" 咁由老遠既地方帶 Pekkle 既精品番黎比我地,仲要安排交收、包裝呢 d 瑣碎事!要知道做咁多野都係不收分文嫁喎!再加上見到有 blog 友之間經常都會相約見面,傾既野亦都唔只單單係有關 Pekkle,而係可以實實在在咁 share 生活上既開心同唔開心既事.....雖然係 "鴨會社團" 入面,我係一個 "見光死" 既 "會員",從未曾 "親身" 同大家見過面.....不過以上種種都令我深受感動!


希望係未來既日子,我地 "鴨會社團" 會繼續 "發揚光大",依然可以 keep 得到今時今日已經好難再有既真友誼!!趁住新一年既開始,我衷心咁祝福大家健健康康、開開心心,有個豐盛既 2009 年!