Saturday, March 29, 2008

Godiva Belgian Dark Chocolate Ice-cream

3 月 28 日,一個平凡既日子... 不過.... 我終於都等到呢個日子既來臨喇....


早於去年底,睇雜誌得知,一向只於日本及歐洲地區發售既 Godiva 比利時黑朱古雪糕,將於今年 3 月至 4 月間正式引入香港,一直等緊呢一日既來臨!終於係月頭睇報紙知道,黑朱古力雪糕將於 3 月 28 日正式在香港發售,推廣期內,買第二杯雪糕更可獲半價優待!呢個消息對於我呢個黑朱古力 + 雪糕怪黎講,簡直係天大既喜訊,就係果時開始,就倒數今日既來臨!!


一放工,即刻飛奔去 Godiva 專門店,果然係有比利時黑朱古力雪糕賣!我二話不說即刻就買左四杯番屋企.... 因為第二杯半價既關係,所以以三杯既價錢就可以買到四杯,抵呀~


 

雖然有保溫紙加乾冰包好,估唔到番到屋企〝解封〞時,乾冰已經揮發左唔少,只係得番好少咋... 估唔到半小時既車程都足以消耗左大半包既乾冰... 乜依家天氣真係咁熱咩?犀利....




雖然佢地專門店買雪糕都有提供乾冰服務,唯一美中不足既係冇冰袋送囉!用上次買雪糕送既冰袋袋住,應該都會好 d 既...



拿,真係逢買第二杯就會有半價優惠嫁!仲要係全部口味都一樣有呢個優惠添!店員仲話暫時都未有終止呢個推廣優惠既日子,即係話,大家暫時都仲可以買到平價既 Godiva 雪糕喇!有興趣試既人,真係不容錯過喇.....


可惜我因為感冒未清既關係,今晚都仲未可以試到味。期望咁大,希望個結果唔會令我失望啦!


Friday, March 14, 2008

富豪雪糕車

自從番左呢份工之後,係午膳時間,間中都會停左架富豪雪糕車係公司附近,不過礙於好多因素,咁多年黎都未幫襯過。係大概年半前,停泊雪糕車既位置,進行左一個大規模既修路工程,加上有一條專線小巴既加入,我已經再冇見過富豪雪糕車既蹤影...


道路維修工程終於都係上星期尾完成,就係尋日,熟悉既富豪雪糕車又再出現係同一個位置!當時心唸:可惜依家番緊工,如果係屋企見到你,我一定會幫襯.... 就係咁,我同富豪雪糕車又再一次〝擦身而過〞.....


當晚,正安坐家中等待食晚飯期間,耳邊又傳出一陣陣熟悉既音樂聲..... 探頭外望,竟然真係有架富豪雪糕車停泊左係度,唸一唸,搬入黎呢度都已經有七年幾,從未見過有雪糕車入黎.... 心中不禁唸:唔通個天真係聽到我今日晏晝講既野? 如果真係咁,我更加冇理由一再推卻上天〝善意〞既安排卦?! 所以唔理係唔係要食飯,都一個箭步就衝左落街買.....



究竟幾耐冇食過富豪既軟雪糕呢?我唸最少都有十年.... 已經唔記得當年既售價,不過以依家賣七蚊一杯睇黎,應該都係以倍數增長左!不過鬼叫依家潮流興〝集體回憶〞咩?我都要趁下熱鬧、支持一下既!



個賣相麻麻地....食味又唔係咁好,而且以咁既價錢,其實可以話唔值!不過加埋份童年回憶係入面呢?就變左無價囉!



咁難得比我遇到架雪糕車,無理由只係食一個軟雪糕咁少嫁嘛,點都要買番 D 野既!睇個價目表,有樣叫〝珍寶橙冰杯〞,相信係類似 sorbet 既野,本來想買,點知話賣哂!唯有退而求其次,買左甜筒囉!一共有三種味:雲呢拿、朱古力同蜜瓜,覺得蜜瓜味好似好怪咁,所以只係買左前兩款,依家都仲未食,唔知食味會唔會有驚喜呢?


Tuesday, March 11, 2008

Pekkle 直遮

原本唸住影埋 d 縮骨遮,先寫一篇〝Pekkle 雨具巡禮〞既 ,不過可能因為 d 縮骨遮實在太易於收藏,我記得係用一個盒裝住哂 d 縮骨遮,依家搵極都搵唔番個盒,相信好大機會呢個盒已經係入左〝倉〞,所以唯有 post 左 d 直遮上黎,同一眾 Pekkle fans 分享下先啦!


2002 年 Sanrio Gift Gate 出既塑膠遮,呢款遮既 size 比較細小,應該係比小朋友用既,同一款兩種顏色,分別係白〔即係透明〕同藍色。



睇下個遮柄幾靚!係個水晶膠立體 Pekkle 黎嫁!我就係因為呢個公仔而買,仲買左兩把,唸住一把儲、一把用.... 點知後來又有一位舊同事送多左一把比我,所以依家我有三把呢 d 遮....



都係 2002 年既出品,不過就係 Ellon 出既!



2003 年 Ellon 都出左一把小童用既膠遮。




都係 2003 年 Ellon 既出品。不過呢把就係大人用既木柄遮...



2004 年 Sanrio Gift Gate 既出品,呢把遮好記得係又一城既 Gift Gate 買既,佢地發售時,專程將把遮打開,再掛起係天花板既位置,離遠已經見到成把都係 Pekkle 公仔既遮,靚到真係唔買唔得,我果次真係即刻衝入舖頭買嫁!唯一美中不足既地方就係有閃粉囉!如果拎黎用,係有少少浮誇既,不過我依家都用緊嫁喎....


見唔見到個手柄位同扣鈕位都做得好仔細呢?手柄就印滿 Pekkle 公仔,個扣鈕係一個立體 Pekkle 頭黎嫁!


 


2005 年 Sanrio Gift Gate 既出品,個 style 有 d 似上面 2004 年藍色果一把,個手柄位一樣係印滿 Pekkle 既公仔,分別在於變左粉紫色之外,亦都係唯一一把,係八瓣既遮布之中,一共有五個唔同既 pattern,工序應該會比造一般同 pattern 既遮款多囉,所以應該都幾須要手工嫁!而且,仲有一個 Pekkle 吊飾隨遮附送添呀!係稍嫌隻顏色 fancy 左 d,不過都係一樣咁正!



2007 年 Ellon 既出品,係目前最新既 Pekkle 雨具,唔知遲 d 會唔會再繼續出呢


以顏色同圖案而論,Ellon 既設計係比較低調同沉實,會較適合大人用;而 Gift Gate 既 design 就比較粉色同花巧,適合一 d 童心未泯既人用.....  不過可能係因為設計較為實用,所以 Ellon 既直遮一路以黎,都係比 Gift Gate 既賣得貴少少既。不過有兩個唔同既 style 都好呃,咁樣大家就可以隨住自己既喜好,各取所需囉。至於我,我係 Pekkle 既 fans,只要唔係超貴既話,當然係一概都買左先算啦!


遲 d 等我搵番盒縮骨遮出黎時,再 upload 埋上黎同大家分享啦!


Saturday, March 8, 2008

鼎泰豐

睇雜誌介紹,台灣鼎泰豐直營店係新港中心開幕,仲要講到無論午飯或晚飯時間,都例必座無虛設!對於一個從來都未踏足過台灣既人黎講,都想慕名試一試,睇下佢既菜式到底有幾好?點解會由台灣紅遍世界各地都有分店咁巴閉....


為左避免人多擠迫,當然要快人一步到場啦!所以我就揀左星期六上晝既十一點幾既時候去到,相信可以慳番唔少排隊時間...


可能真係因為十二點都未到,果然唔單只未有人龍出現,d 位仲多到可以任我揀,我就選擇左近門口對正一大缸金魚既位置,魚缸真係好大,入面養住既應該係叫獅頭魚,我唸應該都有五十條以上,魚缸既位置又當眼,真係幾靚嫁!其實我係好想影低缸金魚 upload 上黎比大家睇下既,不過礙於小小既 area,都已經有三位服務生 serve,佢地係咁行黎行去,我根本都冇辦法影到...


裝修雖然唔算堂皇華麗,不過都好舒服、整潔,服務生服務都算好勤快同周到,係環境同服務呢兩個環節,已經算係中上。



至於食物方面,因為我其實唔食小籠包既,不過因為係蟹粉既關係,蟹粉小籠包就例外囉! 所以就叫左一客蟹粉小籠包、一客清炒豆苗、一碗排骨麵、一客小食牛肚.... 價錢其實唔算貴,所以份量都相對偏細,可能我太大食既關係啦!如果一大班人黎食,我相信都要樣樣開雙先夠分!



食完主菜,甜品當然就唔少得啦!叫左一客豆沙小包,做法其實同小籠包一樣,只係餡料換轉成紅豆蓉,雖然紅豆蓉塞滿整個包〔佢個皮都算薄,幅相都應該隱約睇到滿滿既紅豆蓉啦〕,幸好都唔算太甜,唔會食一個已經有飽滯既感覺!



當我離開鼎泰豐時,都已經係差不多下午一點鐘,人龍已經結集左係舖外,多人多到有少少誇張!其實總括黎講,我覺得整體食味一般,並唔係十分之出色,不過係服務方面,倒係值得一讚!學我舊同事話齋,如果想慕名去試下都無妨既!