Sunday, January 24, 2010

草莓雜誌 2010 年 2 月號

為左搵 Pekkle 利是封行左幾間 Gift Gate,比我意外發現到今期草莓雜誌竟然有 Pekkle 份!二話不說,即買!!


從來未學過日文,不過『看圖識字』,估計呢期封面係有關慶祝 Sanrio 50 周年紀念,一個名為 "Small Gift Big Smile" 既活動。唔知大家見唔見到 Pekkle 既蹤影呢?







close up 比大家睇下啦!雖然 Pekkle 冇得好似 Hello Kitty、Melody 呢 d 主角咁坐係個貌似氫氣球既 "籃" 入面,不過加左對翼比 Pekkle 飛飛下,仲要係正 "創立 50 同年" 既字眼上面,都算係一個 "好" 位,好 sharp 嫁啦! 







經過我一輪驗屍咁驗,Pekkle 係內頁仲有兩次既 "出場" 機會...









呢段係 "編輯後記",又有 Pekkle 出現喇!可惜唔識日文,所以唔知佢寫乜.... 又唔知同 Pekkle 又有冇關係呢?





Pekkle 2010 年利是封

睇阿 Vi 既 blog 知道出左利是封,不過上星期番工都幾忙,又唸住應該唔會咁快賣哂,所以都唔急於去買。點知睇完可愛小 win win 既 blog 知道連吹先生間舖都只係得番少量貨,佢仲話 Gift Gate 已經賣哂貨... 我心唸:唔係咁誇呀?點知原來吹先生今次冇吹水,好多 Gift Gate 都真係賣到斷貨...


行左三間 Gift Gate,終於都搵到佢喇!



其實我冇咁既 "福氣",仲未有資格派利是住,所以最初唸住純粹儲買兩疊已經夠哂,不過因為搵左三間先搵到,仲要係剩番最後四疊... 為左 Pekkle,我既『瘋狂基因』又戰勝左理智喇!四疊買哂...



2010 年利是封 vs 2008 年利是封,各有各好!2010 年款熨金位多、又有魚仔、又有柑、又有賀詞咁,充滿新年氣氛;而 2008 年既就清清地,Pekkle 公仔就比較清晰、明顯,好 classic 囉!兩句講哂:各有各好,總之係有 Pekkle 就好!!



Sunday, January 17, 2010

鴨屎?!@__@

今日趁有時間,終於都可以出旺角買已出左有一段時間既 Pekkle 直身相機袋,咁岩又見到之前阿 Vi 預告左既八達通卡套,一次過買埋,唔洗走兩轉...


魔術貼型既袋,仍然係 2009 年 Ellon's standard 既 Pekkle pattern,麻麻地岩心水,不過既然係 Pekkle fans,又唔係太貴,梗要撐下場既...



2010 年既 design,Gift Gate 總算同 Pekkle 搞番個新形象 --- 雨中跳舞既 Pekkle...



拎住晴天公仔既 Pekkle...



依然係套摺形既八達通卡套,其實我比較期待 Pekkle 能夠出番最基本既單層八達通卡套囉...



係『吹先生』間舖竟然見到日本果套 Pekkle 餐具,眼睛即時發哂光啦!可惜個標價真係好鬼 "瘌脷",要好認真咁唸下值唔值得買先得... 


 


吸引我目光既,除左係呢套餐具本身之外,就係貼係上面既黃色 Memo 紙,可能大家睇得唔清楚個內容,等我打出黎同各位分享下:『鳴謝各鴨屎支持,現貨完售,歡迎再預訂。日本制,可進微波爐。90 年罕有製品。』除左呢 d 字之外,仲畫左個 Pekkle 公仔出黎添... 雖然誠意可嘉,不過我地只係支持 Pekkle 鴨仔既 fans,極其量我只會認自己係『鴨仔粉絲』,我一定唔會認自己係『鴨屎』囉!好唔鍾意咁肉酸既名囉,唔該『吹先生』改一改佢啦...


同場加映:『吹先生』新一輪搞作 --- 又有得訂 Pekkle 既衫喇,今次依然係 Kiosk 既出品,唔知係唔係『吹先生』自上一輪既 Pekkle 休閒服收穫『可觀』,食過番尋味,所以又做獨家呢?見到今次既 Pekkle 衫係短袖 tee + 短褲套裝,一共有四個色、兩個 design,混亂中唔記得影相所以冇得同大家 share,亦都因為當時『吹先生』好鬼忙,根本問唔到價,不過我相信阿 Vi 應該都有辦法問到『吹先生』個訂購價同拎埋個原稿上 blog 都唔定呢!


Sunday, January 10, 2010

庚寅年 Pekkle 賀年揮春

過左聖誕、新年呢 d 洗錢黃金檔期之後,各大百貨公司又要忙於為農曆年另外一個消費高峰期作準備,事實上前兩星期開始已經見到有賀年精品賣,Gift Gate 都唔例外,不過就只係賣番上年既貨尾,上星期開始見到陸續有新既賀年精品出現,已急不及待問店員 Pekkle 會幾時番貨,可惜冇一個 sales 可以比到答案我!今日行街經過 Gift Gate 時,終於都比我發現到 Pekkle 揮春既蹤影喇!


唔知係唔係 "餓" 左幾年冇出 Pekkle 揮春既關係,我覺得今年呢個 Pekkle 造型都幾得意嫁,連 Pekkle 既老死魚仔同鸚鵡都係埋一齊,好熱鬧呀!真係希望 Pekkle 可以好似 Hello Kitty 同大口仔咁,有多幾款唔同造型同唔同賀詞既選擇就好 lu... 咁我就一定買哂唔同款,貼到一屋都係 Pekkle...



雖然今轉 Pekkle 都只係出左揮春一個 item,不過依家距離農曆年都只係得番一個月多少少,我唸好快 Pekkle 利是封應該都會面世嫁喇!各位 Pekkle fans 要留意喇!尤其係已婚果 d 添喎!因為我唸用 Pekkle 利是封派利是,心情會靚上加靚囉....


Pekkle 枕袋

由於一向單人床笠就只會跟一個枕袋,所以當雅芳婷出左新系列 Pekkle 床品之後,我已經即時 send 左 email 去雅芳婷問會唔會有 Pekkle 枕袋散賣,可惜答案係令我失望既...


當我唸緊應該點樣先可以多個 Pekkle 枕袋襯番套床笠同被袋既時間,突然靈機一動,即時走去買多一套雙人床笠,除左可以多兩個原裝枕袋之外,多左出黎既雙人床笠,仲拎左去改衣店叫人幫我縫製多幾個 Pekkle 枕袋,咁將來又可以多個枕袋替換 lu...



將三個枕袋拍埋一齊擺,就可以將床笠既 pattern "還原" 喇!



整完三個枕袋之後,剩番 d Pekkle 床笠布碎都唔知用黎做乜好?可恨自己既冇小草咁既手藝、又冇喪 Vi 既 DIY 創意,搞到 d 布頭布尾掉左去又有 d 可惜,留低又冇乜作為咁,嘥料...