Saturday, June 27, 2009

Pekkle 2009 拉鍊袋

正當今日四出找尋 Pekkle『煎釀三寶』時,無意中比我發現左一樣 Pekkle 新貨,相信各位 fans 忙於找尋『三寶』之餘,又要出動 lu...


藍加紅既 Pekkle,再加上星星圖案,大家係唔係覺得好熟口熟面呢?無錯喇!就係今年新出縮骨遮果 pattern 囉!點解呢?之唔係因為兩樣 products 都係出自 Ellon 手筆囉!『一橋兩用』係就係冇乜 heart,不過呢個 pattern 我都幾鍾意,再加上佢又肯出番 Pekkle,就唔同佢計較咁多啦!



zoom 近 d 比大家睇清楚 d...


正面



背面



背面有個 logo 仔,係 Pekkle 個 best friend 魚仔 pichi 喎... 但係... 但係... 點解佢個樣咁『惆悵』既?



聽講 Pekkle 筆筒下星期就會番貨,一眾 Pekkle fans 記得密切留意喇!


Gift Gate Pekkle 新貨

之前都聽過好多 blog 友話 Pekkle 會出筆筒同麻布公仔,就係今日四出搜括 Pekkle 新貨之時,見到好多精品店都擺左 Gift Gate 2009 catalogue 出黎,我都唔執輸拎番本先...


根據 catalogue 既資料,其實會出 Pekkle 既新貨種類唔係太多,其中有 d 之前都已經出左!例如八達通卡套、A4 File、三個 size 既索袋同埋兩個 size 既黃色網袋...


萬眾期待既筆筒 --- 肥嘟嘟唱住歌仔既 Pekkle 造型,好 cute 呀!聽講話呢個筆筒係可以層層疊高唔會跌嫁喎!大家就拭目以待啦!



麻布公仔 --- 呢個系列只係做左三款公仔,估唔到咁都有 Pekkle 份!Pekkle 今次有新衫著,係一件好 sporty 既衛衣外套,當然唔少得有個 "P" 字標記係心口啦!不過就咁睇幅圖個比例好似怪怪地咁,尤其係個頭添.... 真係有 d 似當年 Trendyland 做果批 "怪頭 Pekkle" 咁 ,比較之下好似都係絹布潛水公仔得意 d 噃... 



另外,一年一度既 Sanrio 夏日嘉年華定左係 29/7 至 4/8 舉行喇,之前錯過左既 Pekkle fans 千祈唔好走雞,話唔定會好似上年一樣,又搞個 "最受歡迎 Sanrio 卡通人物" 選舉,可能就係 Yahoo blog 既號召力,令到 Pekkle 係上年既選舉中票數飈升,先得以令 Gift Gate 係 "順應民意" 之下,重新出番 Pekkle 咁多新貨咋!所以各位 Pekkle fans,記得唔好錯過咁重要既日子喇!



Sunday, June 21, 2009

Awfully Chocolate -- Dark Chocolate Ice-cream "hei"

一早都聽聞過呢間新加坡過江龍店,可惜佢地好有 "性格",一路都只有三款唔同口味既原個朱古力蛋糕賣,以我呢 d 對蛋糕麻麻地既人黎講,要 "完成" 一個睇起上黎咁 rich 既蛋糕,真係有 d 難度...



知道佢地會賣雪糕既消息,都已經係三、四個月前既事,一直唸住試唔到蛋糕,都可以趁機試下佢地既雪糕啦!望穿秋水,雪糕終於都 "到埗",梗唔會走雞,快快趣去試下先啦!


睇個門面,都知佢地呢期主打雪糕啦!反而佢地既 "招牌貨" 仍然係異常低調....唔知有咩咁神秘,連想睇下個蛋糕既實物都幾難....



舖頭既設計擺設同佢地既出品都係咁貫徹始終,一句 "簡單就是美" 可以總結!



無論舖裏舖外,都擺左雪糕既宣傳廣告...



單球 $28,雙球 $38,雙球抵咁多,梗係要雙球... 後來先知,原來有古惑,唔知係唔係我食呢次咁岩定係....



下面果個雪糕球係 "實心" 既,不過上面果個雪糕球一 "筆" 起,發覺原來係空心既... 可能只係我咁唔好彩既,應該唔係專登既...



講番最實際既食味先,呢種名為 "hei" 既黑朱古力雪糕, 係用上 70% 濃度既比利時黑朱古力所製,空氣含量少於 14%,拍得住 Gelato 喎!不過食完之後,講真,我覺得同 Haagen Dazs 既 Belgain Chocolate Ice-cream 冇乜分別,唯一分別在於 "哈根大師" 既比利時朱古力雪糕有係有朱古力碎係雪糕入面,而 Awkfully Chocolate 就冇囉!對於我呢個 "朱古力癡" 黎講,呢種黑朱古力雪糕既濃度無疑係 "淡" 左少少既!不過本著價錢又唔係咩天文數字既大前提底下,未食過既朋友去試下都無妨既....


Saturday, June 20, 2009

美心西餅 -- 魔鬼蛋糕

對於我地呢個冇乜人鍾意食蛋糕既家庭黎講,要『消滅』一個睇起上黎起碼有磅半以上既蛋糕,真係有 d 難度,不過我體內既 "朱古力魔鬼" 比一句『以 70% Valrhona 朱古力製成』既宣傳句語『喚醒』左,忍左個幾兩個星期之後,呢隻 "魔鬼" 始終都戰勝左理智,本著買左先算,唔理食唔食得哂既心態,終於都係前日買左黎食...


食野最緊要係味道,其次包裝都好重要,係未嚐呢個蛋糕之前,以價值而論,呢個包裝都算唔錯嫁喇!



唔知點解,天使蛋糕有對『天使翼』做 logo,魔鬼蛋糕就以對『蝙蝠翼』做 logo,唔知魔鬼同蝙蝠有咩關係呢



外型都算 ok 啦!其實除左個宣傳語句之外,呢個外型都係吸引我想試既原因之一...



呢盒係隨蛋糕附上既『魔法脆脆』,同之前美心出既天使蛋糕一樣,都係 gimmick 黎姐,講穿左咪係脆卜卜既糖粒,仲要係甜到漏果隻!係先要自己整碎,再灑係蛋糕上面食,但係當我用佢隨盒附上既膠棍企圖壓碎時,彈到一檯都係之後,結果仍然係無辦法將 d 糖粒整碎既....失敗!



切開左個樣都叫 ok 既,好有朱古力 feel 囉!不過一刀切下之時,都知知地出事嫁勒... 不過當時希望係自己估計錯誤啦!



上碟之後,加埋 d 整極都唔碎既糖粒,齋睇個樣都仲 ok 既,可惜一食就出事!對於我黎講,呢個蛋糕實在偏甜左 d,唔知係因為厚厚既朱古力 cream 累事,定係果 d『魔鬼脆脆』出事?總之食完呢一片之後,已經感覺到好膩... 雖然我唔多鍾意食蛋糕,不過係我心目既海棉蛋糕,應該係又鬆又軟,好有彈性,呢個蛋糕係呢方面既表現,明顯係差少少先合格,唯一既好處就係都算有香濃既朱古力味囉!當然,相比係食 Valrhona 既 plain dark chocolate,就算冇 70% 既濃度,都比呢個蛋糕更香濃囉!不過對於一 d 唔多喜歡略帶甘苦既 dark chocolate 味既人黎講,呢個蛋糕就岩岩好囉! 



呢個蛋糕我結果要分三日,仲要撥開哂 d cream 先可以食得哂!最後一次食時,蛋糕既邊位已經開始變硬,口感比第一次食時仲要差 d...


百四蚊一個蛋糕都唔算貴,對於我呢個朱古力怪黎講,都叫做『完』左個心願啦!如果對於一 d 鍾意食朱古力,但又唔喜歡太濃可可味既人黎講,都可以一試既!


Sunday, June 14, 2009

Pekkle 2009 年最新縮骨遮

早幾日一收到喪 Vi 通知出左 Pekkle 縮骨遮,個心就掛住掛住咁,咁岩之前我用開果把 Pekkle 縮骨遮又退左役,正好依家可以買番把新既黎補上,可惜一田既 Manis counter 又冇呢把遮,『受盡煎熬』咁終於都等到假期喇!仲唔第一時間仆出去買咩!


一把儲、一把用!



打開把遮,感覺上好似比之前果 d 縮骨遮大把 d...



一把遮,八張布共三款 pattern...


今年既設計比較破格,用上左 Pekkle 比較少用既紅色,仲要係遮邊綑上紅邊,叫做有 d details 位咁啦!



呢格暗花造型,唔知會唔會好似係 2003 年出果把深藍色縮骨遮咁,即係當濕左水之後,公仔位置會凝住小水點,其餘位置就係跣水既,所以當你遠望時,就形成左一個一個 Pekkle 形狀既水點公仔凝住係把遮上面嫁喇!好得意嫁!唔知一眾 Pekkle fans 之前有冇留意到呢?



呢把就係我頭先所講 2003 年出既縮骨遮喇!



 


特別消息:之前鴨會龍頭喪 Vi 話會出既複古版 Pekkle Memo Pad,我今日係征服世界見到實物啦!原來比我想像中大本,約 4R 既 size 左右,封面有塊膠卡,入面既 memo 紙七彩繽紛咁,好靚嫁!可惜職員強調話呢 d 只係版,唔會公開賣住,最快都要 20 號左右先有得賣喎!定價 $25。好期待呀!