7-11 x Sanrio Hello Party 2013 - 最終回

望穿秋水，拖咗個幾月，終於都換埋最後十個公仔喇...

估唔到我機關算盡，結果都係強差人意，最後十個公仔，冇一個係我至愛嘅『天皇 Pekkle』，唔好話 Pekkle，搵個屬於第一階段嘅 12 款公仔都冇呀！十個公仔全部都係第二期嘅款式，真係冇乜心機逐個影.... 就將佢地嚟一次大合照就算數喇！


 
水平線影埋去好似唔多清楚？再『高炒』一張睇清楚 d 啦！



其實自己只係抽到一隻 Pekkle 咋，好彩同朋友交換咗幾個公仔之後，最後都可以儲到四隻 Pekkle，都算叫做有交代啦！

7-11 x Sanrio Hello Party 2013 - 最後一擊

由於之前已經抽到兩個 Pekkle 天皇，再加上第二輪公仔已經冇 Pekkle 份，所以儲『印花行動』一早都已經放慢哂手腳。

心中早有打算，唸住喺第二期公仔出籠之後，要喺我經常出沒嘅旺區 7-11，再可以換到第一期公仔嘅機會係微乎其微，所以由第二期開始時，都已經暫停冇再換公仔，唸住等到最後登記時先一次過去換。因為有咗幾次喺 7-11 換 Pekkle 嘅經驗，估計佢地大概嘅 practice 會係喺最後兩星期左右，就會回收哂各分店所有公仔嘅『剩餘物資』番 HQ，然後根據顧客喺唔同分店登記嘅數目，再分發比唔同嘅店舖，亦唯有咁，我先有可能換得番第一期嘅公仔。

因為 25/2/2014 就係派發印花嘅最後一日，為免再要儲多 16 個印花，所以當我儲夠 160 個印花，可以免費換到 10 個公仔之後，就已經停止冇再喺 7-11 買嘢喇...

估唔到 23/2/2014 拎印花去登記，要等到 10/4/2014 先有貨可以拎，仲有冇耐 d 添呀？！我驚到時連張 receipt 都甩哂色囉...

7-11 Sanrio Hello Party Roadshow @ Causeway Bay MTR station

上一次 7-11 嘅 Hello Kitty & Friends Sweet Delight 系列，就安排咗架流動廣告車周街行去做推廣，今次 Hello Party 系列就擺咗呢個 roadshow counter 喺銅鑼灣地鐵站...



其實呢篇 blog 我想寫好耐，奈何工作實在係比較忙，所以拖咗個幾兩個月時間都無法完成...正好就趁住農曆新年呢幾日假期，『的』起心肝去完成埋呢個『工作』喇！

7-11 x Sanrio Hello Party 2013 - 第六週戰績 (8/1/2014 - 14/1/2014)

有咗兩個天皇 Pekkle 喺手，就越嚟越無心機儲，所以印花同公仔亦都越嚟越少 lu...

7-11 x Sanrio Happy Party 2013 主題店

位於灣仔嘅 7-11 主題店，一如以往『打扮』得好『靚仔』，我又點會錯過呢？

7-11 x Sanrio Hello Party 2013 - 第五週戰績 (1/1/2014 - 7/1/2014)



第五週成績 - 『天皇』在手，冇哂壓力，所以越嚟越懶.... 今個星期只係得 Little Twin Stars、Kerokerokeroppi 兩款公仔同埋 34 個印花....

7-11 x Sanrio Hello Party 2013 - 第四週戰績 (25/12/2013 - 31/12/2013)

第四週戰績，可能因為已經有兩隻『天皇 Pekkle』喺手，所以連儲印花都變得懶懶閒，今個星期只係儲到 30 個印花咋！

而隨著第一階段嘅『華麗慶典系列』接近尾聲，加上已經換咗好幾個公仔，所以依家換到嘅公仔款式都開始重覆 lu~

No. 8 天皇 Pekkle

今次真係好好彩，"Hello Party" 換購活動只係開始咗兩個幾三個星期，就已經比我換到兩個『天皇 Pekkle』公仔喇！

兩個 Pekkle 排排坐，好似孖公仔...

zoom 近 d 比大家睇清楚『天皇 Pekkle』！

正面

背面，睇下 Pekkle 件衫，印滿咗代表 Pekkle 嘅 "P" 字嫁！

再 zoom 近 d，就可以睇下 Pekkle 嘅『後尾枕』，係清楚咁印有 "Hello Kitty 40th Anniversary - Ahiru No Pekkle" 嘅字樣嫁！

7-11 x Sanrio Hello Party 2013 - 第三週戰績 (18/12/2013 - 24/12/2013)

第三個星期換嘅四個公仔之中，估唔到又有一個係『天皇 Pekkle』喎！既然已經有兩個『天皇 Pekkle』在手，更加安樂哂喇，可以唔洗驚換唔到 lu~

所以，今個星期儲印花嘅數目，隨著換到兩個 Pekkle 公仔嘅情況之後，即時驟降！今個星期儲得 48 個印花咋... hahaha

7-11 x Sanrio Hello Party 2013 - 第二週戰績 (11/12/2013 - 17/12/2013)

第一週嘅 92 個印花，我一共換咗 5 盒公仔，估唔到第一輪就可以抽得中『天皇 Pekkle』喇！可以放下心頭大石，唔洗再瘋狂咁亂買嘢去儲印花喇！正！

第一輪抽到嘅五款公仔為：Pekkle、Tuxedosam、Kerokerokeroppi、XO 同埋 Little Twin Stars... 而第二個星期就一共儲到 69 個印花。



7-11 x Sanrio Hello Party 2013 - 第一週戰績 (4/12/2013 - 10/12/2013)

由於 Pekkle 只會出現喺第一階段嘅『華麗慶典』系列，所以要努力儲印花，儘快喺第二期開始之前就可以抽到『天皇 Pekkle』啦！

4/12/2013 - 10/12/2013，一共儲到 92 個印花，唔知可唔可抽到『天皇 Pekkle』呢？



7-11 x Sanrio Hello Party 2013

4/12/2013 開始，七、十一便利店又同 Sanrio 合作，推出 "Hello Party" Sanrio 公仔系列，相信一班 Sanrio characters fans 又要幫七、十一便利店打工喇！

Hello Party 系列一共有三十款公仔，撇開『聖誕節』、『新年』及『情人節』共六款『節日特別版』公仔之外，餘下二十四款公仔分兩期推出，每期十二款；包括由 4/12/2013 開始換購嘅『華麗慶典系列』及由 15/1/2014 開始換購嘅『快樂童話系列』。

第一期 - 華麗慶典系列，至愛嘅 Pekkle 只會出現喺呢個系列！

第二期 - 快樂童話系列。

今次仲有 facebook 貼紙可以 download，可惜我冇 facebook account 喇！所以雖然見到戴哂黑超嘅 Pekkle 又 cool 又搞笑，都係得個『恨』字！