Sunday, December 30, 2007

Pekkle 首飾盒

都未到 2008 年,就收到家姐送比我既新年禮物喇....  係最新既 Pekkle 首飾盒呀!靚到爆...... 係無出好耐 Pekkle 產品既 Grandsmart 出品〔即係 Trendyland 啦!〕.... 唔通真係好似其他 Pekkle blog 友話齋..... Pekkle 真係復活




 


可惜我冇首飾可以放啦!相信不久既將來,佢又會比我封箱入〝倉〞lu...... 如果 Grandsmart 真係有心出番 Pekkle products 既話,希望佢將最近出既 Sanrio characters 麵碗、有耳杯碗套裝都出埋 Pekkle 就正喇!咁就既可以用、又可以比我日夜都見到 Pekkle 啦!


Friday, December 28, 2007

MOS Burger

MOS Burger 限量非賣品湯碗同咖啡杯呀!經過我努力經營之下,用左幾個月時間,食左四百幾蚊,再等左半個月有多,終於都可以將佢地〝據為己有〞喇!


 



 



 


Wednesday, December 26, 2007

Electronic Arts Games Centre

舊年同今年既聖誕節,都上左山頂走一轉.....  無啦啦〝老襯亭〞就變左我慶祝聖誕節既指定地方.....


 


其實開左凌霄閣之後,都已經唔係第一次上山頂,所以感覺上都冇乜大分別,唯一係上次遊覽時,EA Games Centre 尚未開幕,今次上到去,已經開始營業。外型設計好 cyber 既 EA Games Centre,電子遊戲款式包羅萬有,仲安裝左唔同既平台,免費供遊客任玩。


 



 


可能由於位處山頂既關係,連聖誕節呢 d 假期,玩機、霸機既人都唔多,我同朋友玩左一輪 NDS 版既 The Simpsons games 之後,又再去玩 console 機版,直情玩到你攰、玩到你唔想玩,後面都唔會出現排隊等打機既人龍.... 心唸,如果 EA 係旺角、銅鑼灣呢 D 地方開 games centre,相信 d 遊戲機不出一個月,就全部都要報銷喇!


Tuesday, December 25, 2007

DIY Pekkle 產品

年初時,收到家姐送黎既禮物,係兩件 DIY 既 Pekkle 精品,非常特別,亦好有心思,估唔到香港都有 d 咁有創意既〝藝術家〞..........


水晶球型既座檯燈,仲可以調較光暗度嫁!



同座檯燈既物料一樣,可以用黎擺放小飾物......



提起 DIY 既 Pekkle 精品,又唸起 blog 友慨嘆依家已經冇 Made in Japan 既 Pekkle 貨品,不期然就唸起放係床頭既正宗日本 Pekkle 貨!



雖然三件都係日本貨,不過就只有下面果盒先係 DIY 作品,聽講係日本工匠用人手做嫁,對藝術一竅不通既我,唔知真定假呢?


Merry Christmas & Happy New Year

 



 


祝大家有個難忘又愉快既聖誕節..... 並祝 2008 年事事順利,身體健康!!


http://good-times.webshots.com/album/561782710hAWyis


Friday, December 14, 2007

雀巢奇趣杯

雀巢出左奇趣杯系列都有一段日子,其實只係一杯普遍既雪糕杯,特別之處就係加左一件玩具係雪糕杯入面,就好似日本既玩具果子咁,又似出奇蛋,有得食、又有得玩  ,仲要係睇唔到入面既咩公仔,先夠哂〝刺激〞嘛。


 


記得之前出過好多款公仔,有小熊維尼、飛天小女警、蠟筆小新、超人、叮噹、軍曹、孖寶兄弟.... 當然最緊要就有 Sanrio 既公仔啦!雖然推出 Sanrio 火車系列已經係兩年前既事,不過既然可以令到我為佢寫 blog 既,就梗係有 Pekkle 份嫁啦!


 



 



 


唔好睇個火車軌好似好掂咁,其實一開掣,必出軌!就算唔出軌,都會甩車卡,總之就從未試過完完整整咁行完一個圈..... 我唸,呢 D 就係名副其實既〝可遠觀而不可褻玩〞....


 


記得初初一見到有奇趣杯有 Pekkle 公仔送時,真係發哂狂咁食,差不多隔日就買兩杯番屋企,日日飯後都食杯雪糕,可惜依然未能抽中 Pekkle,心灰意冷之下,赫然發現其實只要將雪糕杯舉高,係燈光底下將雪糕杯稍為傾斜,再搖晃幾下,再根據各款公仔既車卡顏色、衣著顏色,就不難發現內裡係咩公仔款!如是者,我用左比預期短既時間儲齊一套之餘,仲先後開到三個 Pekkle 公仔添~


Wednesday, December 12, 2007

床單....

都唔記得左由幾時開始,每逢農曆新年都習慣要換新物品.... 總之,每年既十二月至翌年一月呢段時間,都係我四出去搜羅新床單既日子....


 


記得十多年前,雅芳婷曾經先後出過三款 Pekkle 既床上用品,以當時既我黎講,二百幾蚊一套床笠加枕袋,都咪話唔貴.... 不過由於 Pekkle 太得意既關係,我實在忍唔住買左落黎... 不過都要分開左幾次先買得起,而且只係買左床笠、枕袋,多用途冷氣被及被袋,我都只係捨得買其一款咋...可惜當年不懂珍惜、又冇 DC 既我,冇幫佢地全部留低〝倩影〞,所以今時今日,我都只係可以影到兩款 〝尚在人間〞既款式..... 其餘一款退役多年既 Pekkle,印象已經開始模糊,只係記得好似係沙灘 look,並以天藍色為主色 ..... 真係好後悔呀.....


 



 



 


其實最初我只係用白色果套〔上圖〕同已經掉左既藍色果套,作交替之用,之後再買左當年最新出啡色果款〔下圖〕,後來發覺雅芳婷唔再出 Pekkle 既床品,所以呢套啡色,我都只係用左三幾次已經收埋冇再用。不過之前果兩套,經過時間既洗禮,已經一套報銷左,另外白色果套亦都係時候退役...... 


 


由於正牌冇再出,近四、五年,我轉戰假貨...   發覺其實除左係 d 布質差 d 之外,個公仔印花同價錢都非常合心水,不過由 2006 年開始,發覺連假貨 Pekkle 既布都唔再出.... 點算呀?我今年仲可以點呢?


 


呢 d 就係 fake print Pekkle 喇!咁多年黎,其實我都唔只用左咁少款,不過因為布質差既關係,掉左唔少,之前又冇影低留底,所以只係剩番依家仲用緊既呢三款.....



 



 



 


唉... 依家行經百貨公司,見到雅芳婷 counter 不時擺出 Sanrio 既公仔床品,仲要經常有 promote 價,HK$99 一 set.....究竟,雅芳婷幾時先會再將 Pekkle 重新投產呢?好期待呀~


Tuesday, December 11, 2007

agnes b. Delices

agnes b. Delices 係香港都開左一段時間,終於都有機會去〝拜訪〞一下......


 



 


裝修有如一間珠寶店,朱古力一排排的、整齊地陳列係玻璃飾櫃內,大概有十多種款式,如果以一間朱古力專門店黎講,選擇並不算多;而以 HK$16 一粒既售價,再以平均 100g 有五、六粒既數量計算,價格與一般中、高級既品牌朱古力相若。雖然選擇不多,不過〝千里迢迢〞咁黎到 apm,無理由就咁睇完就空手而回嫁?所以酌量都要買少少黎試下既.......


 



 


買左三粒散裝朱古力外,仲買左一罐原味既鳥結糖。講真,食味同口感真係一般,雖然不至於難食,不過就普普通通囉!唔好期望會有 after taste 既感覺....  係絕對冇添呀    至於鳥結糖,可能要切合近年個個都話既健康飲食啦,味道係偏淡,一丁點甜味都欠奉,唯一可取就係唔黐牙,仲因為佢係 crispy 既關係,都真係幾脆口既,但係脆卜卜既鳥結糖,會唔會失左少少真呢?


 


我相信大部分去嘗試食呢間朱古力既人,所抱既心態會同我一樣囉!就係慕著 agnes b. 既名而來,我唸 agnes b. 既 fans 會好滿足,因為有好多款朱古力都印左佢街知巷聞既 logo 係上面,唔鍾意食朱古力既人,都會被呢個精緻既外型所吸引,所以就算食味一般,都應該不愁冇客路既!


Monday, December 10, 2007

Pekkle 係香港既命運......

以我所知.... 現時香港共有三間公司,係正式向日本 Sanrio 買版權生產 Sanrio characters 既貨品.....


〔一〕位於青衣既 Daniel & Co. -- 瑞華行,係香港玩具公司既老大哥,亦係香港 official 既日本 Sanrio Dealer,除左代理日本既 Sanrio 精品於本港出售之外,仲會係香港生產 Sanrio 公仔既產品。Daniel & Co. 亦即係由細陪到我大既 Sanrio Gift Gate 專門店既母公司。


〔二〕位於觀塘既 Ellon Gift Products Ltd.,出產琳瑯滿目既公仔產品,大家成日見到既 Thomas 火車頭、多啦 A 夢、姆明等等,就係呢間公司出既。不過佢同 Gift Gate 最大既分別,就係只會自己生產,並冇代理日本 Sanrio 既貨品。而佢既 outlet 就係大家經常係大型百貨公司都會見到既 Manis 勒!目前 Manis 應該只有一間專門店位於上水,其餘都係以 consignment counter 形式於各大百貨公司駐場。


〔三〕位於長沙灣既 Grand Smart,主力係生產 Disney 貨品,以香港自家生產 Disney 貨品黎講,可以話係一哥!而佢既 outlets 相信都係冇人唔識既,就係梗有一間係左近既 ---- Trendyland。


第一間版權持有人,似乎係最有實力同資源去出產或搜羅 Pekkle 既貨品係香港出售,可惜近幾年都鮮有 Pekkle 既貨品出現!可喜既事係,係佢新出既  12 款 2008 年既 Date Book 當中,竟然都預左 Pekkle 成為一份子,連 Schedule Book 都有 Pekkle 份,係我印象之中,上一次佢地幫 Pekkle 出 Schedule Book 已經係 for 2005 年用,即係 2004 年既 products lu..... Date Book 就更加係第一次見..... 真係值得令人興奮既事呀!



至於第二間,相信佢拎 Sanrio license 都係近十年既事,不過佢出既 products,係最實用既,例如鬧鐘啦、magazine file 啦、相薄啦、passport holder 啦、八達通卡套啦、磁石啦、雨傘啦!我全屋有十把以上 Pekkle 既直遮同縮骨遮,都係呢間公司既出品,雖然實用,不過實在太靚啦!真係唔捨得用呀!佢曾經係瘋狂咁出 Pekkle 唔同類型既產品,差 d 要破產,不過近呢兩、三年,又好似靜哂落黎,一年之中,只係偶然先會見佢出一、兩樣 Pekkle 既 product!除左最基本既 Sanrio character 之外,反而主力出番 Kerokerokeroppi 既 products,有時見到 d 好實用又靚既 products 時,都抱怨點解唔出埋 Pekkle 呢?



最後既 Trendyland,近兩、三年可以講得係冇出過 Pekkle 既用品,曾經都瘋狂一時出 Pekkle products 既 Trendyland,記得係 2003 年,佢地有一系列係以黃色做主色既 Pekkle 產品,竟然將〝Ahiru No Pekkle〞既名,寫錯成〝 Aniru No Pekkle〞,作為超級 fans 既我,當然係好痛心啦!仲記得當時我向 Trendyland 既 sales 反映佢地印錯左個名,個 staff 回應我話會同公司反映喎... 不過最後都係冇改到... 我當然唔係咁天真,以為佢真係會幫我向佢公司反映啦!只係作為 Pekkle fans 既我,見到有錯,又點可以〝啞忍〞呢? 其實 Trendyland 都偶有佳作,好似係 2003 年出品既杯墊,一盒有四件,真係好靚嫁,我當時都忍唔住買左 3 盒嫁!



Pekkle 係香港可唔可以長存落去?佢既命運會係點?真係好睇呢三間拎左 Sanrio licnese 既公司既取向,如果佢地唔再生產 Pekkle 既 products 既話,Pekkle 好快就會係香港絕跡嫁喇!希望佢地會繼續推出 Pekkle 既產品啦!