Sunday, January 27, 2008

Pekkle 衣履

前幾日,見到有 Pekkle's fans post 左〝Pekkle 睡覺篇〞上 blog,咁岩我之前已經打算影低番 d Pekkle 衣履嘅相黎留念,不過一來 d collections 又多、又雜亂,而且仲要好多都唔係擺係屋企,好難搵得齊;二來成日都無事忙咁,始終冇〝的〞起心肝去搵!依家多得呢篇 blog,正好推動我進行既決心!


 


http://hk.myblog.yahoo.com/jw_lemontea/article?mid=223


 


冬天睡衣 --- 仲有一套著緊太皺冇影到! 當中只有左下角果套先係 Sanrio 自己出嘅貨品,其餘都係普通舖頭買嘅.... 不過又唔好睇少呢 d 老翻野呀,店主話係台灣貨,d 料係又厚又軟熟嫁!公仔 print 又像真又得意,都唔錯嫁!



夏天睡衣 --- 呢組就有兩套都係 Sanrio 出嘅貨,仲有 d 係過去嘅夏天著過,不過因為著得太殘,基本上都唸住退役,費時獻醜啦....



深水埗超級老翻單睡衭一條.... 質地超薄仲〝嚡〞手添嫁....從未著過都已經殘殘舊舊咁, 不過見佢個公仔都幾似樣,仲係好平添〔唔記係十蚊定十五蚊〕,買黎儲都抵.....



童裝 --- 背心〔96 年既出品〕同晨褸〔05 年既出品〕都係童裝黎嫁,當年見到覺得好靚,唔買唔得啦!當時專登買到最大既 size,搏自己可以著得到嘛..... 影之前都試過上身,估唔到都仲著得落喎,真係扣得埋鈕嫁....



內衣 ---- 估唔到 Pekkle 都有內衣呢?呢套都係堅嫁!Sanrio 既出品,睇番個包裝袋,應該係喺當年嘅尖沙咀東急百貨買嘅....都係純粹買黎儲,唔會著,買嘅時候都唔會理佢嘅 size 岩唔岩....所以你地都唔好有歪念,休想從中知道我嘅身材喎!



搵下搵下,竟然比我搵到有兩件老翻內衭添喎.... 完全唔記得幾時同係邊度買,個 pattern 仲要係唔著衫嘅 BB Pekkle 添!依家睇番都仲覺得好 cute 呀!



背心 T 恤 --- 我都唔知係真定假.... 不過我直覺覺得係做得好真嘅假野囉....



拖鞋 --- 記得之前都買過一對同 blog 友同款嘅拖鞋,不過搵唔到,好大機會係已經比我著殘左掉埋添,而下面藍色果對布質拖鞋,係 2003 年嘅貨,不過因為依家間唔中都仲見到 Manis 擺出嚟散貨,所以我前前後後都買左好多對嚟替換,呢對.... 應該已經係我買同款嘅第四對 lu....



 


因為條件所限,今次只可以 post d 存放左係屋企嘅衣履.... 遲 d 有機會再 post 埋其他啦!


Saturday, January 26, 2008

Pekkle 2008 年賀年掛飾

經過 blog 友提點之後,終於都買到 Pekkle 今年新出既賀年掛飾啦!不過我只係買左吊住〝大吉〞兩個字既大 size 裝飾,都幾得意嫁......


 



 


雖然個樣就唔係太似 Pekkle,不過都算做 ok 啦!因為有 Pekkle 份,都已經係好難得嫁喇.....


 


http://hk.myblog.yahoo.com/pekkle1027/article?mid=80


Friday, January 25, 2008

森之卷

我呢個朱古力癡,尋晚終於都食到位於東港城 Taste - 森之卷既朱古力味年輪蛋糕喇.... 佢仲要好巴閉咁標明係〝情人節限量版〞... 唔係一定要情人節先食得下化?


既然佢地咁有〝心〞起左個咁〝特別〞既名堂比佢,就當然係要與別不同一 d 嫁啦.... 個價錢..... 細個裝,原味 $36,朱古力味 $42,就等我細心〝研究〞一下,睇下呢六蚊貴左係邊先!


外在:無分別



蛋糕包裝:無分別



內在:無分別



口感:無分別


味道:以我呢個朱古力怪魔黎講,佢只有淡淡既朱古力味道,再加上佢連原味果種獨特既香甜楓蜜味都欠奉,所以我會寧願選擇食番原味囉.....


總括黎講,呢六蚊.... 個人認為係用左落個〝情人節限定〞呢個名號上面囉....


Wednesday, January 23, 2008

絕版 Pekkle 精品網上商店


 


尋日朋友 send 黎呢個網上商店既網址,click 入去一睇,全部都係 Sanrio 既絕版精品,當中仲有好多係 Pekkle 既,有好多我之前係見都未見過,真係大開眼界!


 


http://pekkle.ulu.hk/


 


不過我又唔係好明,既然收藏左咁多珍貴既 Pekkle 精品,一定係超級鴨迷黎啦?!既然係鴨迷,又點會捨得將 Pekkle 賣左出去既呢我略略睇過 d 價錢,大部分都要三位數字,好明顯係比當初既零售價,貴好多好多倍...


 


見到有人將珍藏既 Pekkle 轉售圖利,又有 d 唔開心既感覺喎...


 


Tuesday, January 22, 2008

Gelato

原則上我係一個鍾意食鹹,多過嗜甜既人.... 不過我又超鍾意食朱古力同雪糕嫁喎,朱古力我就只愛黑朱古力,除左酒心同薄荷之外,基本上我所有黑朱古力都鍾意食....


 


至於雪糕,以前我係咩雪糕品牌都會食,只要佢係朱古力味既,我都唔會錯過.... 不過為左我原本已經噸位唔細既身形,唔好再肆無忌憚咁膨脹落去,慢慢開始選擇一 d 比較優質既雪糕先食,唔好浪費左 d quota 嘛..... 近幾年,更加由專攻美式雪糕,轉戰意大利既 Gelato.... 而第一間幫襯既 Gelato 專門店,係位於灣仔〔佢地第一家既分店,不過已經冇左 lu...〕 既 XTC,依家佢地係港九都開左好多間分店,仲寄銷係大型既超級市場添,不過我就覺得預先 pack 好既,始終冇係專門店食咁好味囉!唔知係唔係第一次食 Gelato 就係幫襯 XTC 既關係,對 XTC 總係有 d 情意結,覺得無一間既 Gelato 係做得好食過佢.... 佢地既 Chococlate XTC、Volcanic Pistachio、Toasted Almond、Macadamia Nut 同埋近兩年先出既 Red Bean,都係我既至愛.... 


 


隨住香港人越黎越追求健康飲食,Gelato shops 相繼開到成行成市,我唔敢講自己試過哂每一間既出品,不過相信我都試過七成以上既 Gelato。以我個人口味而言,可以與 XTC 相提並論既,就只有 Cova 同 iScream 既 Gelato,我試過 Cova 既朱古力同開心果 gelato,真係做得好香濃、好 creamy、好有質感,不過價錢就相對比較貴囉,我呢 d 低下階層,無辦法負擔得黎,而且佢同 XTC 有著共同既問題,就係地點,佢地兩間既分店都只設係港九,我呢 D 係新畀區出沒既人,真係要專程出去先可以食到.....


 


不過,皇天不負有心人,係上星期,竟然比我發現 iScream 將進駐新城市廣場,對我黎講,真係一個天大既喜訊!一直只有太古廣場一間分店既 iScream,雖然都一樣有預先包裝好既家庭裝 gelato 係大型既超市發售,不過都係果句啦!專門店食既始終都係 fresh 好多、好味好多....  


 



 


最初既 iScream 係超揼本,連裝雪糕既杯都係 "Made in Italy",搞到我食完都唔捨得掉,拎番屋企儲起佢唔好嘥,不過近呢一、兩年,佢地已經轉番用普通既膠杯,雖然係咁,我覺得佢既 gelato 水準並冇下降,我超鍾意佢地既 Dark Chocolate gelato,雖然要貴兩蚊一球,不過真係物有所值,朱古力味濃到化不開!唸起都想即刻搭車過太古廣場食呀! 


 


前面細 d 既杯就係裝單球既雪糕杯,後面大 d 既杯就係可以裝到三球雪糕。係呀!係三球呀!我為左個杯,真係可以一次過食三球雪糕嫁!我仲記得果次要左 Dark Chocolate、Azuki 同埋 Pistachio,前兩種口味都非常出色,至於開心果..... 我始終都係覺得 XTC 做既果仁 Gelato 比較岩口味!



唔知大家睇得清唔清楚呢?杯底真係印有〝Made in Italy〞既字樣嫁!幾揼本呀!不過近年已經改用類似 XTC 既白色透明膠杯,自此我亦都冇再儲過 lu.... 早知當年就幫襯多 d 啦....



 


iScream 新城市廣場分店快 d 開啦!我等緊你嫁!