Sunday, December 20, 2009

2009年聖誕月、Pekkle 月...

無論有冇宗教信仰,每年既聖誕節都會令香港人被呢個節日氣氛所感染,大部分人都會大破慳囊,就算唔洗錢買聖誕禮物,都會出街食下飯、睇下燈飾、湊下熱鬧咁,總之消費意欲同農曆新年不相伯仲,甚至有過之而無不及。


今年既聖誕月,我地一班 Pekkle fans 可以話係大豐收,差不多每個星期都有新貨推出,係呢個普天同慶既聖誕節情緒影響下,更加刺激到消費,就連我呢個孤寒鬼都忍唔到手係咁買... 當發現屋企越黎越多 Pekkle products,多到已經再冇空間可以收埋既時候,先 "驚覺" 自己已買到有少少失左控.... 不過無計啦!鬼叫自己咁鍾意 Pekkle 咩?況且 "餓" 左 Pekkle 咁多年,難得出番 d 新貨,如果唔撐場既話,又點對得住 Pekkle 呀?


今個星期新貨一覽...


第一樣:梗係要講我最期待既多功能電話繩啦!可能就係期望太高,所以當睇到實物時真係有 d 失望...  其實呢個 Pekkle 水手造型我覺得係唔錯嫁,而且條多功能頸繩都好實用,可惜無論係印刷上同質料上,個質素都強差人意囉!令到原本我想買兩條既唸法都打消左,只係買左一條用黎儲...



成個組合,我覺得只有個用黎收藏電線既公仔頭比較做得好,其餘既組件都令我覺得有少少粗製濫造既感覺,車工同印刷方面,真係有 d 老翻 feel....



可能係質地問題,所以 Pekkle 公仔係印得有少少化開 / 濛左既感覺囉...



第二樣:細袋仔。唔睇阿 Vi 既 blog,根本都唔知會出呢個袋仔,初初聽其他 blog 友形容,以為可以放到飯盒既 size,原來只係好細個,連上面講果條電話繩個盒都仲大過呢個袋!不過我又幾鍾意個 pattern 喎,雖然同之前出果個水樽既 pattern 一樣,但係個顏色同構圖我覺得好 match、好靚囉!再加上呢個袋仔又有個 "魔術貼",可以學其他 Pekkle fans 所講,平時 lunch 拎出街食飯都係一個唔錯既用途,所以結果係買左兩個...



因為去買野之前未 check 阿 Vi 既 blog,所以根本都唔知已經出左下列兩種新貨,所以去到見到時都有 d 意外驚喜嫁!!


梳連鏡,太細把唔岩用,所以只係買左一把當支持 Pekkle...




而另外一樣就係浴室用品,好開心終於都可以擁有浸浴 look 既 Pekkle product 喇!



今年應該仲有一款音樂公仔未出,唔知趕唔趕得切係 Christmas 前出呢?大家記住儲定多 d 彈藥,多 d 黎密 d 手,齊心掃貨撐 Pekkle 呀!


Sunday, December 13, 2009

一次過...

之前睇到龍頭 Vi 通知,原以為要等到明年夏天先會出既水樽終於都出左,所以趁今日假期就出旺角入貨...


去到除左見到個 Pekkle 水樽之外,仲見到原本冇唸過買既 Pekkle 長方形暖手包...



之前睇龍頭 Vi 同 Pekklebaby 個 blog 見到呢個長方形暖手包實物時,總係覺得將 Pekkle 個頭整到成個長方形咁好怪,令原本已對暖手包冇乜興趣既我,更加冇打算買,不過當我今日見到個實物時,為左一個令大家知道之後相信都會搔爆頭、覺得好無聊既原因,而買左佢番黎... 



係比錢既時候,又比我見到呢個岩岩番貨既另一款 Pekkle 暖手包!個人覺得呢個粉藍色好襯 Pekkle,比起 Ellon 出果款,車工同設計明顯都係靚好多囉....



雖然呢個暖手包都幾靚,可惜係用毛毛造,真係好睇唔好用,咁易整污糟既野我通常都係只儲不用,而且呢兩個暖手包比我想像之中細個,好難用作其他用途,所以最後每款都只係買左一個咋!不過可以一次過買哂幾樣野,唔洗再走出走入幾次去入貨已經好開心!


Sunday, December 6, 2009

Pekkle 新貨 by Manis

上個星期行 Gift Gate 出左本新 catalogue,今日行經 Manis 又見佢地出左本新 catalogue,當然... 又係二話不說睇下有冇 Pekkle 啦!都有喎!新貨種類雖然唔夠 Gift Gate 多,不過都係果句:好過冇啦!



Pekkle 共有四種新產品,現時面左世既就只有 "數碼相機袋連頸繩及手帶",最期待就係條電話頸繩,又多功能又得意...



加埋印左係上次本 catalogue 但係仲未出既水樽... 睇黎各 fans 又要準備大破慳囊 lu...




Pekkle 環保袋

全靠幾位 Pekkle blog 友通知,先知道流動小販有呢款老翻袋賣...   


所有環保袋既 pattern 係一樣,只係個 size 同埋顏色〔只得粉紅同黑色兩種〕有分別!


打開前:約 6 吋半高、4 吋半闊



打開後:約 19 吋高〔連埋孭袋位〕、16 吋闊,雖然冇 "風琴位",不過就有個成 6 吋深既底,所以應該都可以裝得好多野....



打開前:約 7 吋高、5 吋半闊



打開後:連膊頭位約 25 吋高、17 吋半闊,呢個依然係冇 "風琴位",不過都係有一個 6 吋闊既底...



打開前:約 4 吋高、6 吋半闊,同埋一個有 3 吋深既 "風琴位"... 呢個 size 好正,因為除左入面果個係旅行袋之外,連外面呢個袋仔,都可以 "充當" 出街食 lunch 既小手袋,一物二用.... 正!.



打開後:9 吋高、18 吋闊、8 吋深,其實個袋都 ok 大個,去兩、三日既短 trip 應該都夠用嫁!最神奇係咁大個旅行袋都可以摺得咁細個,真係又靚又實用...



點解一路 show 開黑色既袋款,又會無啦啦 post 張粉紅色袋既相呢?因為要將個老翻袋同正版袋做個比較,等大家找出唔同既地方囉!



無論遠睇定近睇都好似冇分別一樣,連布既格紋都相同!犀利!!分唔分得出邊個係日本正貨、邊個係冒牌貨呢?雖然 pattern 係一樣,不過心水清既人就一定分得到!事關左手邊個袋有個布 label 印有 "Sanrio Happy Parade",呢個咪就係原裝日本 Sanrio Puroland 空運到港既正版貨囉!



有時真係覺得老翻既精品比正版更實用、更美覲,有 sanrio license 既公司應該比番多 d 心機,務求設計出黎既產品集美觀、實用於一身,咁樣除左可以保住公司既名聲之外,仲可以增加銷量,何樂而不為呢?


最後,要多謝小草比左個好詳細既地址我去搵,不過最緊要都係多謝我家姐,因為最終都係佢幫我去買嫁....