Wednesday, December 29, 2010

Pekkle 湯麵碗

係 20/12 已經比哂錢買既 Pekkle 湯麵碗,今日先 call 我有貨番,足足等左 9 日,呢個碗終於都到手喇!乜真係咁多人買咩?咁快斷哂貨?



始終都係覺得,實物冇 catalogue show 出黎時咁靚仔.... 個盒標明可入微波爐,但係印左咁多公仔係個碗,係唔係真係入得微波爐既呢



個人覺得,印係外面呢個大頭 Pekkle 靚過印係碗入面果個全身 Pekkle!



呢個 size 其實都一樣唔係好岩我用,不過總比 Manis 個 "飯" 碗好,因為學 Pekklebaby 話齋,呢個碗用黎食飯就嫌太大喇,不過食麵、烏冬呢 d 就一流囉,岩岩好一人份量!相反 Manis 個 "飯" 碗就怪左少少,食飯又大左 d,食麵、烏冬呢 d 又細左 d 喎,唔大唔細,唔知用黎做乜好.....



底部都印左 Pekkle 個全名嫁,比較少有囉,因為通常只係會印出產年份同埋個 licensee 既名....



等左咁多日,都只係番得一件貨,有見及此,將個碗驗屍咁驗,點知就係咁,掛萬漏一唔記得左睇個盒,番到屋企先發現個盒原來係爛左既.....   唔係卦,對於我呢個只儲不用既人黎講,個盒爛左實在係一個大缺憾呀!下次做 QC 時都係要小心 d....



Tuesday, December 28, 2010

Sanrio 50th Crystal Charms - 第四週戰績

因為有選擇困難症既關係,手持二百幾個印花既我,仍然係未立定個心點樣換 charms 先可以最 cost effective....


所以呢個星期只係換左四個,其中兩個係聖誕特別版....



個盒幾靚,好有節日氣氛,當然... 如果有埋 Pekkle 既話,就更加錦上添花啦!



兩款特別版都齊哂!



另外兩隻普通版.... 依然係未有 Pekkle.... 仲要係重複既!咁又浪費左我 30 個印花喇! 



唔通我同 Pekkle 真係無緣無份?!


Monday, December 27, 2010

聖誕元朗之旅

聖誕假期,百無聊賴冇乜節目,結果去左元朗行下,咁就無意中比我發現呢套 Pekkle 睡衣,買既時候好興奮,因為一來以為係新貨,二來滿以為自己係第一個買到既人,點知 post 左上 blog 先知道,原來已經有其他 Pekkle blog 友一早就買左 lu,仲要有唔同既款式添....


個 pattern 幾靚,個人就好鍾意,起碼好過上年出既正版 Pekkle 睡衣既造型,有時候真係翻版仲好過正版....唔該 d  licensee 好好檢討下啦....



呢款係圓領長袖長褲睡衣,其實自己比較鍾意著有領,感覺上會暖 d,可惜冇其他款,仲要係剩番 last 一套....



不過都 ok 既,因為無論係袖口、領口、褲腳,定係個衫身既邊位,都係車左花邊既,叫做有 d details 位啦!車功都值番個錢既....  不過 d 布料就稍嫌薄左 d.... 呢個天氣著既話,一定凍死,應該係內地貨,因為如果係台灣貨既話,價錢雖然較為貴,但係布質比較厚身 & 柔軟,襟著好多....可惜聽檔主話,台灣果間廠因為成本問題,已經停產呢 d 公仔睡衣喇喎,唔知係唔係真既呢?定係想我幫襯佢買呢 d 大陸貨,所以先咁樣講呢



Pekkle 日本餐具 - 2010 年聖誕禮物

估唔到今年會收到 Pekkle 既聖誕禮物,朋友好耐之前已經講明,為免助長我儲 Pekkle 既 "歪風",佢係唔會送 Pekkle 既精品比我,所以發夢都估唔到今年竟然會收到佢送既 Pekkle 聖誕禮物!!

呢套餐具,相信係 Pekkle blog 友就一定唔會陌生,之前有位 blog 友已經通知過係日本一間料理店發現到呢套餐具,當時我家姐咁岩又去日本,我已經即刻托佢幫我去搵,可惜無功而回.... 反而後來有位好好運氣既 Pekkle blog 友可以即場以低價買走..... 

跟住輪到龍頭 Vi,見佢係網上都 bid 到,後來知道征服都可以喺日本訂貨,立刻走去睇下實物啦.... 唔睇猶自可,一睇真係嚇左一跳,整套餐具,係征服世界係索價 HK$777... 

睇到呢個價錢,想唔卻步都唔得啦.... 唸左好耐之後,決定用 HK$130 買對叉、匙儲下,好過乜都冇,點知再回頭時,征服既存貨已經賣哂.... 原來唔只內地,香港.... 都一樣有好多富豪...

唔知朋友呢套餐具又係邊度買既呢?又唔知貴唔貴既呢?無論如何,收到呢份聖誕禮物真係好驚喜呀!多謝哂!!

Friday, December 24, 2010

Sanrio Fans Club Newsletter Issue 29

幾日前收到 Gift Gate 寄黎既會訊,出面平平無奇都係介紹 d 新產品既目錄〔當然係冇 Pekkle 份啦!〕,但係一打開內頁就不得了喇!竟然見到 Pekkle 呀!


內頁標題為:70s - 80s Sanrio 經典大明星!Pekkle 竟然都係 Sanrio 既大明星呀!幾時既事呀?從來都唔覺得既?近呢十年八載,Pekkle 係日本都差不多停產咁滯啦!無啦啦又變番大明星既?唔通我地呢班香港既 Pekkle fans 影響力真係咁大?!



係每個 "經典明星" 既位置,都會有一條屬於呢個公仔既問題,答案印埋係同一頁,仲要係選擇題添..... 不過,區區一條咁簡單既小問題,對於熟悉 Pekkle 既我地黎講,又點會咁易比佢難倒呀? 唔好話睇答案,連選擇都唔洗睇,我已經立即可以答到啦!



仲有一件事值得大家留意,係 2011 年既 1 月初,Gift Gate 將會舉行 "Sanrio 大明星" 選舉,雖然唔知會係點樣投票法,又唔知洗唔洗買左野先有資格投票,不過我敢肯定 Pekkle 一定係候選人之一,大家到時記得踴躍 d 去投 Pekkle 神聖既一票喇!



最後,趁今日係平安夜,係度同大家講一聲:Merry Christmas & Happy New Year!!



Wednesday, December 22, 2010

Pekkle 皮帶手錶

Pekkle 又出左新錶喇!今次呢隻錶好正經,顏色又靚,錶面應該比 boy size 仲要大 d,好岩大人戴嫁.... 雖然我唔會戴.....


平平無奇既外盒...



紙盒內應該係 acrylic 膠既錶盒,仲要係半透明藍色,好靚呀!



打開入面,見到一隻錶帶、錶面都係紫藍色既錶,由於 Pekkle 只係以 outline 形式刻上錶面,感覺上冇咁似小朋友既錶;而隻錶既顏色及設計都有 grand grand 地既效果,所以就算係成年人戴,都唔會有幼稚既感覺!



zoom 近 d,戴住皇冠既 Pekkle,係唔係好 classic、好 grand 咁呢?



總括黎講,呢隻錶各方面都值得一讚!!唯一既問題就係隻錶太鬆喇,我番到屋企試戴時已經扣上最埋果格,但仍然係鬆泡泡咁,有可能既話,買錶時即場試一試戴,或者精品店肯幫你改短埋條錶帶嫁....