Wednesday, August 27, 2008

大嶼山聖母神樂院曲奇餅

大嶼山聖母神樂院,一個好似好陌生既名字,其實呢間神樂院亦即係十字牌牛奶既〝原產地〞〔牛奶業務現時已經易手〕,十字牌牛奶相信都冇乜人唔識,仲係由細飲到大果隻添!一路以黎,都唔知原來神樂院都仲有自家製既曲奇餅....


到目前為止,我都唔清楚神樂院既正確位置係邊度,不過要買呢 d 神父親手製既曲奇餅,又唔洗一定入到去大嶼山既。之前睇飲食男女知道,呢 d 曲奇餅可以經油蔴地一間教會書舍代訂。為食既我,當然唔會錯過呢個機會啦!大概兩個多月前既一個星期六上晝,親身去到呢間書舍預訂,取貨期係三個月後既事!! 書店店主仲好有禮貌咁同我講:下次唔洗親身上黎嫁!打電話都可以預訂!


就係上個星期,收到呢位店主既電話,話預訂既曲奇餅已經有貨,可以隨時上書舍取餅!


唔好期望會有咩美輪美奐既包裝,但係我反而喜歡佢既設計簡單而樸實無華,貫徹神樂院為靜修地方既形象!


盒面〔藍天綠草襯托神樂院,感覺舒服、詳和〕



盒底〔印有神樂院簡介,中英對照〕



一盒共有二十四小包,每包共有三片,獨立包裝,方便衛生。



嚴格上,個人覺得呢 d 都唔算係曲奇餅,因為曲奇餅應該係以牛油為主,有好重既牛油羶香;而呢種餅比我既感覺,係好鬆脆、香香甜甜咁,食完一 d 都唔會覺得油膩,感覺似食緊茶餅多 d。兩個字總結:好味!


可能由於自己由細到大都係讀天主教學校,少不免對教會有 d 情意結,再加上係神父親手每日限量新鮮製造既關係,我覺得可以食到呢盒餅,真係等幾耐都係值得既!


Friday, August 22, 2008

颱風鸚鵡

兩日前,已經聽到同事話有個好勁既颱風襲港,仲話來勢洶洶添... 直至尋日下晝,仲傳出極有機會掛九號風球... 心唸,唔係真係咁勁下嘛?但係唔知點解個個同事都好有〝信心〞話一定掛得成,大家都預備定今日唔洗番工!仲搞到天文台尋晚要特別發出聲明,話網上既流傳實屬猜測,仲話縱使會改掛八號風球,都係今日下晝或傍晚既事.... 我唸當時大部分打工仔聽到天文台呢個聲明,都即時大失預算!


成晚都訓得唔係幾好,因為唔知個風掛唔掛得成、洗唔洗番工!一直到七點八過 d,聽到收音機廣播,話天文台係 07:40 已經改八號西北強風訊號!個心都忍唔住〝yeah〞左一聲!真係唔洗番工!!唸住終於都可以好安心咁繼續訓覺!點知都一樣係訓唔到,因為今次颱風風向係西北,吹正我間房既座向,d 風聲仲大過收音機 d 聲!!揭開窗簾睇睇,見到樓下既樹吹到東歪西倒,仲睇到唔少白頭浪!唔洗厲害成咁下化?風勢明顯係勁過上次北冕好多...


成個海面都係白頭浪....



zoom 近 d 睇...



係 13:40,天文台終於都發出九號風球,望落街,雨就完全停哂,不過風勢就仍然好大!對上一次既九號風球係 2003 年 9 月 2 日既〝杜鵑〞,不過杜鵑只係掛 2 個鐘頭,唔知呢〝隻〞鸚鵡又幾時先會飛走呢


 


後記:天文台於零晨 00:40 改掛八號風球.... 今朝掛八號風球時係 07:40,改掛九號風球時係 13:40,再改掛八號時係 00:40,如今又在 02:40 改為三號風球... 咁橋全部都係每逢搭八就會轉風球,當中有冇咩玄機呢?唔知會唔會係聽朝既 07:40 就落波呢?


終於擁有... Pekkle 輕觸式座檯燈

係 19.08.2008 收到 blog 友 Ahirunopekkle1007 既通知,話發現左 Pekkle 燈既蹤跡,原本唸住呢個週末就會去搵,但呢兩日個心都係囉囉攣咁,成日都驚會比人買哂,咁岩尋晚約左班舊同事去旺角食飯,就係去食飯之前,偷出左九個字既時間去油蔴地尋下寶先...


因為我太心急既關係,冇等 Ahirunopekkle1007 搵個詳細地址比我,只係靠佢形容個大概位置就盲摸摸咁去搵,雖然我唔係路盲,不過都有少少擔心搵唔到嫁...  原來附近都兩、三間燈飾鋪,但係為左 Pekkle 燈,我都唔理得咁多,逐間搵!!


皇天不負有心人,終於都比我見到喇!


準備拆箱...



拆開個箱,見到 Pekkle 個頭喇!



登登登櫈!期待已久既 Pekkle 燈呀!



zoom 近 d 先~



燈光係以輕觸式開關,共分三級。試燈!


最暗...



中光...



強光...



暗光係要靠閃光燈先可以影到幅相,而中度同強光就唔須要,可想而知,光度都好足夠!


唔記得左之前 blog 友係拍賣網用幾多錢 bid 呢盞燈,我係以 $280 買番黎,其實都爭扎左一陣既,兩個字左咁多啦!



係呢度,真係衷心多謝 blog 友 Ahirunopekkle1007 既報料!!


獨一無二 Pekkle 迷你八達通

之前見到 blog 友雪藍既 Pekkle 八達通 sticker,雙眼已經發哂光,超想擁有,連日黎都搵緊靚靚既 Pekkle 圖想整番張。真係發夢都估唔到,都仲未搵到張合心水既圖,已經收到舊同事呢份親手做既禮物,真係多謝哂佢!!


今晚〔應該係話尋晚〕約左一班舊同事食晚飯,我一到埗就收到一位舊同事送上既呢份禮物,通常我都唔習慣當場拆禮物既,但係呢位舊同事要求我即場拆,所以...


唔知係乜黎既呢?包到咁〝的骰〞.....



嘩,一拆開原來係 Pekkle 十字繡既八達通卡套,超靚呀!單係一針一針親手繡上既呢份心意,已經值一百分!!


前幅



後幅



舊同事唔只親手整左個靚靚八達通套,仲要送埋張迷你八達通比我添!迷你八達通藏身其中~



靚成咁,點會捨得用呀?真係超級多謝呢位同事呀!!


Monday, August 18, 2008

Pekkle 圍裙

尋日百無聊賴無事做,突然想起 blog 友雪藍話最近係深水埗有 d 意外收穫,就係咁,抱住少少期望咁就走左去尋寶....


去到深水埗因為要碰運氣搵下 Pekkle 既蹤影,所以少不免就要係福榮街、北河街一帶既鋪頭、街檔左穿右插咁〝搜尋〞...  係烈日當空既下午時分,穿梭係呢 d 街檔之間,有如著住衫走入 sauna 房一樣....即刻開始有少少後悔...


行呀行、走呀走,行勻福榮街、北河街一帶,就只有發現到呢條圍裙,盡管檔主話明只係小童用,唔係比大人,我都唔理三七二十一買左落黎先算!起碼叫做有少少收穫,咁我既汗先冇白流嘛.....



之後仲行埋去天悅廣場,展輝依舊只係剩番果 d 貨式,無期待,所以無失望!事實上,行去天悅都係想睇下 1/F 果間禮品天地,之前次次黎都係冇開門,記得佢既營業時間係下午四點,見時間差不多,心唸今次實唔會摸門釘喇卦?!點知.... 點知竟然發現佢貼左張紙係門口『對唔住,今日有事休息,明天〔星期日〕照常營業』... 唔係下化?校岩時間黎都一樣係要食閉門羹?!我估我同呢間精品店真係冇乜緣份!應該都冇下次 lu....