7-11 x Sanrio characters Joy to the Word 2015 系列 - 第十二週戰績 (17/2/2016 - 23/2/2016)

派印花嘅活動已經完結，登記換公仔嘅日子就去到 3 月 1 日，大家要留意喇！



盡咗最後嘅努力，由上星期一個印花都儲唔到，去到今個星期，一口氣儲夠足夠換 4 個公仔嘅印花數量，即係合共 72 個印花。換句話說，今個星期一並儲咗 60 個印花。



為免夜長夢多，第二日就已經即刻拎兩張印花卡去登記換公仔，睇一睇張收據，啲公仔要等到 6 月 10 日先有得拎... 仲有冇耐啲添呀？有排等... 三個半月之後嘅事，好驚到時會唔記得拎囉... @@

草莓雜誌 - 2016 年 3 月號

2 月 10 號出版嘅草莓雜誌嘅贈品，好難得地又有 Pekkle 份呀，點可以錯過呀？




今期嘅贈品係心形 Memo pad，有得 Pekkle 份，梗係什錦款啦！不過都好過冇啦！所以一口氣買咗兩本...

7-11 x Sanrio characters Joy to the Word 2015 系列 - 第十一週戰績 (10/2/2016 - 16/2/2016)

可能由於已經有三隻 Pekkle 喺手，再加上農曆新年嘅關係，所以今個星期儲嘅印花數量竟然係零，根本都唔夠數再去換公仔住...

數下手指，仲有兩個星期左右，呢個活動又會完結喇，都係加把勁再儲多啲印花先，唔係到時又要登記換領，又要等多個幾月先可以收到現貨...

7-11 x Sanrio characters Joy to the Word 2015 系列 - 第十週戰績 (3/2/2016 - 9/2/2016)

今個星期又一口氣換咗六個公仔...

 

又係大口仔同埋 XO 呀！好彩都抽番一隻 Pekkle... 前前後後已經有五隻大口仔同三隻 XO 喇...



可能係因為農曆新年公私兩忙，又或者係已經抽中咗三隻 Pekkle 嘅關係，所以今個星期所儲印花數量並唔係太多... 扣除之前換咗公仔一共用咗 396 個印花，如今只係剩番 12 個印花，即係今個星期只係得 32 個印花咋...

7-11 x Sanrio characters Joy to the Word 2015 系列 - 第九週戰績 (27/1/2016 - 2/2/2016)

由於上星期已經抽中咗兩隻 Pekkle，所以無論喺換公仔方面，定係儲印花方面，都比之前輕鬆好多喇....

今個星期只係換咗四隻公仔，雖然今次呢款『Pekkle 扮小綿羊』都真係幾肉酸，不過作為 Pekkle fans 嘅我嚟講，都依然係想繼續抽到 Pekkle 囉...  :)



當然，呢個世界邊有咁完美？你想要乜就有乜咩？今次不單只冇 Pekkle，仲要重覆咗兩隻『蛋黃哥扮兔仔』，仲有之前已經抽中咗兩隻，今次已經係三隻嘅『大口仔扮熊貓』.... 真係多謝哂！咁又『蒸發』咗我 72 個印花喇！儲印花就鬼咁難，要用印花時，唔洗一分鐘，就已經冇哂！@@



一共十六隻公仔『大哂冷』... 288 個印花，就係換咗呢啲騎呢公仔番嚟，儲印花都真係儲得好辛苦嫁嘛...



當有兩隻 Pekkle 在手，連帶儲印花嘅『衝勁』都冇埋，今個星期只係儲到 23 個印花，總數剩番 88 個。

Sanrio characters 1000 塊仿水晶透明砌圖

家人從日本帶嚟嘅手信，雖然已經係 2014 年嘅產物，但係好難得 Made in Japan 嘅精品仍然會預埋 Pekkle.... 其實好耐之前，征服都曾經入過貨，不過當年我嫌定價太貴，所以冇買到，難得今次『誤打誤撞』咁比我家人搵到呢盒 1000 塊嘅砌圖送比我，睇嚟我同呢副砌圖都幾有緣。

我覺得幅砌圖嘅構圖好靚，就好似教堂嘅彩繪玻璃窗一樣，再加上砌圖本身係有透明嘅效果，如果錶喺一個前後都係透明嘅框上，通過光線去睇，一定會更加靚。