Sunday, August 23, 2009

Sanrio Happy Parade 系列 by Sanrio Puroland

早係阿 Vi 未講征服世界有得買 Sanrio Happy Parade 系列既精品之前,其實係另一位 blog 友 ngsumsum 既 blog 入面,已經發現到有呢系列既 products 係 Sanrio Puroland 發售,不過都知道自己短期內都唔會去日本,所以都冇上心記住,到之後睇到阿 Vi 既 blog 知道香港都有得賣,可惜收到風時又已經太遲,征服既貨一早就比其他 Pekkle blog 友掃哂,唸住自己同呢個系列應該都冇乜緣份時,咁岩家姐又 plan 去東京,我今次仲唔拿拿聲落 order 叫佢幫我買番咩?!


購物環保袋...



初初睇 ngsumsum 既 blog 見到呢個袋時,仲以為係硬身過左膠既質地,原來係軟身嫁!都幾靚!Pekkle 既造型岩岩就係正個系列 logo 下面... 成個袋 Pekkle 一共出現左七次半!



連張產品卡都有 Pekkle 滑梯造型嫁!



散紙包...



連散紙包都有包防潮珠,夠哂認真...



系列 logo 岩岩好遮住哂成個 My Melody 既公仔,一定激死 Melody 既 fans...



呢個筆袋都好實用,當佢係化妝袋咁用應該都冇乜問題...



呢個係其他 blog 友係征服世界都可以買到既 A4 folder,唔洗多作介紹啦!



另一款係征服世界都有代售既 Memo pad...



Memo pad 既紙,一共有兩款 design,個人覺得好似復古 Memo pad 既 design 靚 d...



今次都算係大豐收,除左買唔到 Pekkle 個襟章之外,基本上都可以買得番哂上次錯過左係征服世界買唔到既貨,仲有多冇少添!超開心呀!!


Saturday, August 22, 2009

一田百貨

睇左阿 Vi 既『Pekkle 千色店之行』,被 blog 入面個 Pekkle 拉鍊袋吸引住,正盤算緊幾時去大角咀買,又驚山長水遠去到之後會賣哂,空歡喜一場... 正當猶豫緊去定唔去好,就比我發現原來一田都有齊阿 Vi 所講既 Pekkle 減價貨,唔洗舟車勞動咁去大角咀買,連車錢都慳番,即刻唔洗煩惱啦..


其實 d 減價貨係一田岩岩舉行既 "返學大哂用品展" 既 "會場" 入面...



首個目標:背囊


其實之前都見過呢個背囊好多次,不過無論佢有冇減價都好,我都冇打算買,因為知道自己一定唔會用,而且我一路都傾向儲 d 『體積』比較細既 products,不過當我一見到阿 Vi 講,呢個背囊會附送一個拉鍊袋時,我就即時比個拉鍊袋吸引住而好想買,已經唔理個背囊究竟岩唔岩用 / 儲 lu...



由原價 $199 減到 $59,如果岩用既話,都確係幾抵買既...



醉翁之意不在酒,買呢個背囊既目的都係為左呢個隨袋附送既拉鍊袋,並唔係個背囊本身....


以往 Pekkle 出既拉鍊袋,除左面積比較大之餘,質地亦都只係一 d 透明膠,呢個尼龍布質既拉鍊袋確係少有,之前見過呢個背囊咁多次,都唔發覺隨袋會附送呢個拉鍊袋,多得阿 Vi 介紹,先至唔會錯過左擁有呢個拉鍊袋既機會...



其餘既 Pekkle 減價貨阿 Vi 都已經介紹過,再加上之前 Manis 多次搞清貨時都有得賣,所以都冇乜興趣買。最後我只係買左兩個紙櫃桶作替換之用...



原價 $55 減到 $15 一個,其實之前我係吉之島見佢賣過 $10,可惜眨下眼就比人賣哂,我一個都買唔到.... 雖然今次一田貴左 $5,不過反正自己用開個兩個已經又殘又爛,都係時候要『去舊迎新』lu...



係公司用開既 Pekkle 紙櫃桶,可能裝既野太多太重,所以連個手抽都爛埋...



呢個就係擺係屋企用既,可能又係太重既關係,無論手抽位定係邊位,都已經爛左,側邊係駁口位仲要用膠紙貼住頂檔咋....



有興趣買既 blog 友,唔洗專登去咁隔涉既大角咀千色店買喇!好可能間間 Manis 都有得賣嫁!大家不妨去碰下運氣啦!


Monday, August 10, 2009

Pekkle 蛋糕

好耐之前係阿 Vi 既 blog 見到佢 post 其他 blog 友訂製既 Pekkle 蛋糕出黎時,已經『驚為天人』,之後係舊年 11 月,又見到另一位 Pekkle blog 友 ngpigpig 生日時既;立體 Pekkle 蛋糕,再之後到今年 4 月當阿 Vi 同另外兩位 Pekkle fans 生日時,佢地不但相約一齊出黎慶祝,仲訂埋個 Pekkle 生日蛋糕一齊切添!當時睇到我心癢癢,雖然我唔多 "好" 蛋糕,不過見到咁多咁得意既 Pekkle 蛋糕,幾唔鍾意食都想擁有...


估唔到呢個咁得意既 Pekkle 蛋糕,會係颱風〝天鵝〞襲港時出現係我面前!!


係一個好突然而來既 moment 收到呢個蛋糕...真係好驚喜!!



裝下係咩黎先.... 嘩 Pekkle 呀!Pekkle 對住我笑呀!仲笑得咁開心添!超得意呀!!



裝完左邊,裝埋右邊先.... 全方位 360 度既 Pekkle 都係對住我傻笑呀!正~~



欲窺全豹,開左個盒咪得囉!開.... 登、登、登... 無著衫既 Pekkle 呀!



個蛋糕真係超大個呀!高度我唸都有三、四吋以上.... 一問之下,原來個蛋糕有成四磅咁大.... 四磅蛋糕,屋企冇人鍾意食蛋糕,勉強會食蛋糕既只得兩個人.... 咁大個蛋糕,點食得哂呀... 



個蛋糕實在太靚啦,最初真係切唔落手,再加上自己真係唔多 "好" 蛋糕,反正都唔會食得哂,所以最後都只係切左對 "錯體白色腳" 〔Pekkle 對腳應該係黃色嫁嘛!〕黎食就算。講真,食味就好一般,而且個蛋糕做得太硬,彩藍色既色素亦太過〝嚇人〞.... 不過無計啦!藍色根本就係 Pekkle 既代表色嘛!用左其他顏色就唔對版啦!看在 Pekkle 同一份心意份上,縱使個蛋糕食味一般,我都比足一百分!!



 "對 Pekkle 腳" 係比我刮走哂 d cream 之後,都一樣係食唔哂!所以最後我唯有忍痛割愛,將餘下既蛋糕 "肢解" 之後,再托媽咪送比 d 隔離鄰舍食囉...