Sunday, May 31, 2009

Pekkle 夏季睡衣

間唔中都會去元朗行下街,趁假期又入左去一次.... 今次竟然會有少少 Pekkle 既收穫...


相信大家對呢個 pattern 既睡衣一 d 都唔陌生啦?無錯,就係岩岩過去左既冬季睡衣款。其實呢個 pattern 係幾年前都出過,不過當時只有白底,唔同顏色衫既 Pekkle 款,直至舊年,見到好幾位 Pekkle fans 都買左呢套睡衣,不過今次就唔係 Pekkle 件衫唔同色,而係件睡衣本身個底色唔同,多左粉紅色同埋換左 d 花花衫鈕。而今次我見到既就係夏季睡衣,短袖長褲,衫鈕亦都係花花黎既,一共有粉紅同粉藍兩種色,都幾靚嫁!


學 Pekklebaby 話齋,驚唔可以摺番靚靚咁放番入袋,所以冇拆袋黎影比大家睇,希望大家都睇得清楚啦!



zoom 近 d 花花鈕比大家睇下...



因為我本身唔係太鍾意粉紅色,所以最初只係想買兩套藍色,一套儲一套著,點知搵哂佢所有貨,藍色既 Pekkle 睡衣 "印刷" 上好似出左 d 問題咁,d 公仔既顏色唔係褪左,就係印歪左,揀左好耐,先勉強可以揀到呢套印得比較好既。反之,粉紅色睡衣印出黎既效果就好好多,顏色鮮明,亦冇印歪。所以結果我係買左一套藍色、一套粉紅色....


藍色同粉紅色兩套比較,係唔係粉紅色果套印得靚好多呢?藍色果套 d 公仔唔係甩哂色,就係印到出哂界,粉紅色果套就 "完整" 好多囉!唔知係咩原因呢?



同場仲見到好多 Pekkle fans 已經買左既長袖長褲睡衣,之前因為覺得佢過份紅既 Pekkle 咀同腳,整到 Pekkle 個樣怪怪地咁,所以一路都冇刻意去搵黎買。既然今次買開睡衣時又再見到佢,可能同佢都有 d "緣份" 卦?所以順便買埋落黎...



依家成日係百貨公司見到 Sanrio 出左好多唔同款式既正版公仔睡衣,係幾年前 Pekkle 都仲出過兩、三款既,不過近年已經絕跡,唔知幾時先會輪得番 Pekkle 出正版睡衣呢


Thursday, May 28, 2009

添好運點心專門店

趁假期有時間,走左去開左業都有一段時間、各方報紙、雜誌都 "爭相" 報導既 "添好運點心專門店",一心就係去試下由米芝蓮三星餐廳龍景軒既點心部主管,自己出黎同朋友打天下開既點心店既食物質素...


始終係自己創業,相信比起佢貴為四季酒店點心部主管時,工作量一定大增,而且好多方面都要考慮到,單係控制成本呢一環,一間點心店同四季酒店比,簡直就係兩回事!所以點心店開係一個比較 "隔涉" 既位置,可能舖租比較平卦?好彩都叫做係旺角,都可以叫靜中帶旺既...



可能係假期啦!估唔到下晝三點幾四點呢 d 非繁忙時間都一樣有咁多人等位... 真係好食成咁咩



等左一個鐘,終於都輪到我.... 


入到舖頭,個環境迫到你係無辦法可以好 relax 咁 "享受",檯貼檯、人貼人咁坐,張檯係連擺壺茶既地方都冇,所以係要靠侍應不時咁拎住個茶壺,逐檯逐位咁添茶既!


選擇唔多,就係得呢張點心紙咁多野....



除左甜品同盅頭飯項外,每個類別都有試過,老實講,食味真係好一般,係芸芸咁多種食物之中,我唯一覺得好食既就只有 "酥皮焗叉燒包",其餘既點心,同一般街坊茶樓無異。


平心而論,正所謂一分錢一分貨,以佢地既價錢黎講,你都唔可以對佢地食物質素要求好高囉!我只可以話,呢間點心店真係好抵食,樣樣食物都係十幾蚊,最貴一款都唔過 $16,不過要我用咁多時間去排隊食 d 一般質素既食物,我就覺得唔係好值得囉!如果你問我會唔會再幫襯,我會答你:為左個 "酥皮焗叉燒包",我唸有呢個可能,不過就一定唔會再係等位去食,而係買外賣囉!


P.S. 恕我冇影到食物同舖頭既相比大家睇,因為間舖頭實在太細又太多人,根本隻手伸開 d,都已經撞到隔離檯!所以我都係匆匆食完就埋單走 lu...


Wednesday, May 27, 2009

i-Scream 手造甜品 Semifreddo

一向力撐 XTC 同 i-Scream 既我,睇雜誌知道 i-Scream 推出左新產品 -- Semifreddo,我又點會錯過呢?原本唸住要去 PP 或者 IFC 分店先有得食,點知前晚放工行過新城市分店,竟然比我發現左 "佢" 既蹤跡!一間連 i-Scream 最 classic、最得我心既 Dark Chocolate gelato 都冇得賣既沙田分店,竟然都有呢種新產品?梗係二話不說,即刻買左四杯番屋企慢慢嘆啦!連搭車過海既錢都慳番,正!!


好彩佢地都特製左 d 紙托同紙袋 for 外賣,size 剛剛好扣住 d 甜品杯,唔洗驚會倒瀉,抵讚! 雖然距離屋企都有一段頗遠既路,好彩佢地又有乾冰供應埋,番到屋企都冇乜點溶到!



左起:芝麻、乳酪、芒果同朱古力



乳酪係比我家姐食既,佢既評語係:都幾滑、唔太甜...


芒果味係我媽咪既,佢話都幾好味,好滑,杯底有粒粒好似芒果乾既 "乾果" 都幾得意,不過佢話唔值咁既價錢囉〔平時買野比佢食唔會講佢知幾錢嫁,因為佢成日都會嫌貴、話唔抵... 不過今次係同佢一齊買,所以冇得呃!



呢兩杯當然係我自己食啦!朱古力味其實唔夠香濃,好彩感覺都幾滑既,好似食緊 mousse 咁囉!不過原來底部有 d 好濃烈既朱古力醬,加埋面層酸酸的好似橙既果醬〔其實係熱情果啫喱黎嫁〕,應該係岩岩好可以平衡番唔同既味道。如果一啖食哂三層既話,口感其實應該幾豐富、幾夾嫁!可惜我一早唔知道要咁樣食先可以食出個味道來,所以我食既時候既感覺係:先係好酸、再係感到好滑、之後就苦苦地咁!三種唔同層次既味道分開哂黎食!嘥哂!


芝麻味,可能因為佢個面鋪滿芝麻,所以整體感覺係好香芝麻味,同埋一樣都好滑囉!都唔錯既...



我都必須承認,我份人係有 d bias 既,呢 d 甜品其實同 mousse 好類似,係一般既 buffet 都係 d standard 野,但係我食 buffet 既時候,係從來都唔會食既!自己亦都從來唔會買 mousse 黎食囉!但係今次正正係因為 i-Scream 呢個品牌,令我專登捧場買黎試下。至於價錢方面,原價 $30 一杯,現推廣價 $25 一杯,三、兩啖就食完一杯,值唔值得就見仁見智咯!如果以我自己黎講,$30 我會寧願買番一球 i-Scream 既 gelato 食囉!起碼都多雪糕 d 嘛...


Wednesday, May 13, 2009

Sanrio Kids 散貨場

前兩日無意中睇到其中一位 Pekkle fans 肥 duck duck  既 blog,知道旺角新世紀廣場有 Sanrio Kids 既特賣場,入面竟然仲有 Pekkle 2006 年出既童裝賣,仲話個 counter 只會擺到 5 月 14 日〔星期四〕。由於睇到呢篇 blog 既時候已經係星期一既夜晚,而平日我根本無機會出到旺角,但係又心癢癢好想買,結果我就 print 左肥 duck duck 既 blog 出黎,麻煩左我屋企人幫我出旺角『照單執藥』喇....


呢件背心我覺得係全部貨品之中最靚既一件,可惜得番 140 碼,我咁肥獅大隻又點會著得落呃?相反另一位 Pekkle fans 檸茶就絕對無問題囉!


正面〔心口位置有 d pattern,都叫做有 d 車功嫁!〕



背面



zoom 近 d 背面既 Pekkle 圖案



V 領短袖 T-shirt〔正面〕



背面



牛仔裙,呢件 150 碼,試過就咁 "笠" 上身,著得落喎!不過我係唔著裙既....


正面



背面



呢條裙 d 公仔全部都係繡上去,唔係印上去既,又 zoom 近個 Pekkle 公仔比大家睇下先....



呢條卡其色既裙係頂大童裝 size,即係成 160 碼,當然都可以穿上,不過佢正面有排鈕,我始終都係 "賤肉橫生" 果隻,所以一坐低時,我果雙 "雄壯既雙腿" 已經將鈕與鈕之間既空位拉開哂,即係走哂光囉!好彩我唔洗著裙既姐....


正面〔其實係橡筋裙頭,唔明仲乜又要整一排鈕,問題係 d 鈕又唔係純粹裝飾,又真係解得開嫁喎!〕



背面



Zoom 近背面近裙頭位置既 Pekkle 公仔,其實如果件上衣長 d,蓋左個裙頭既話,根本就係乜野公仔都冇,加埋佢用既布料同顏色,真係唔講都唔知呢件係童裝衫....



雖然全部貨品都有三折,不過買左兩裙兩衫,都要 $237.6,比起雪藍之前買果 d,當然係雪藍果 d 抵好多啦!而且講到明係童裝,梗係要好似雪藍買左果 d 咁得意先叫童裝嘛!呢 d 款似比大人著多 d 囉!可惜當時我又錯過左,買唔到果 d 咁得意既 Pekkle 童裝,所以雖然今次既款唔係太過特別,都依然會買番少少作為彌補番上次買唔到既 "捐失" 囉!