Sunday, November 30, 2008

Pekkle 襪

好耐之前睇到 Korean Pekkle 既 blog,見到佢收藏左好多 Pekkle 襪,其中有 d 我都好想買,可惜 Korean Pekkle 話已經係好多年前買落既舊貨,應該唔會再買得到,當時都有 d 失望,不過最近睇到另一位 Pekkle fans 鴨鴨迷 既 blog,知道灣仔仲有 Pekkle 短襪賣,趁假期又要去尋下寶...


終於都買到啦!仲要係原價每對 $29 減到每對 $10,即刻買左 2 對白色、2 對米色!〔可能感光問題,睇唔出白色同米色既分別



雖然打正 "Sanrio" 旗號,不過我相信都係老翻貨...



雖然唔係正版貨,不過 Pekkle 個嘜頭都整得幾好嫁!



買左 4 對襪番黎之後,望下望下,我又覺得自己之前好似已經買左,只係唔知擺左係邊,不過唔理咁多啦!難得咁多年前既 Pekkle products 都仲有得賣,而且仲咁平添... 就算之前真係買左,咪當係溝貨囉!


札幌元祖北海道拉麵 Sapporo Japanese Restaurant

好耐之前係《新假期》某個作者既專欄認識到札幌元祖北海道拉麵,呢位專欄作家講到呢間拉麵,係全香港咁多日式拉麵店之中既第一位,不過一路都冇〝的〞起心肝去試,直到幾個星期前《飲食男女》又再介紹,令到我又蠢蠢欲試...


今晚.... 終於都去左試食 lu....


雜誌一路都話呢間拉麵店係超多人排隊既,不過可能係星期六晚飯時間既中環啦!七點幾呢 d 黃金飯市時段,完全唔洗搵位,即到即入....



豬骨湯拉麵 + 炸雞〔$95〕


極上豉油拉麵 + 炸餃子〔$135〕



係中環交易廣場晚飯,兩位唔洗三百蚊落樓都算係咁,事實上都 ok 好食既,不過可能之前有太多人激讚,係有一定期望既情況底下,難免係有少少失望囉。


Friday, November 28, 2008

櫻田日本餐廳 Sakurada Japanese Restaurant

今晚約了友人晚飯,事前未知會去邊到食,不過朋友話會入沙田遷就我,收工匆匆忙忙會合友人後,先知道揀左帝都酒店既櫻田日本餐廳。


基本上櫻田係屬於多元化既日本餐廳,提供多種類日本菜,友人知道我對日本菜興趣不大,所以特意選擇鐵板燒。


因為慶祝酒店踏入 20 週年,部份餐飲八折優惠,我地就選擇左原價 $880 既特級牛肉海鮮套餐。


野菜蟹籽沙律及什錦刺身〔呢兩樣野我都冇興趣食,益哂同行朋友!


孔雀鮑


大蝦


特級厚燒牛肉〔可選厚燒或薄燒,不過我呢個牛癡,食鐵板燒梗係揀厚燒啦!


炒手打鳥冬



炒野菜


甜品〔可選綠茶或芝麻雪糕〕



仲有一客麵豉湯,不過唔記得影相!


整體黎講,質素中規中矩,唔算有咩驚喜,不過服務都唔錯既!再加上以 $800〔折實後〕可以係酒店享用兩位日本爐端燒,都算係叫有交待嫁喇!


Saturday, November 22, 2008

一田購物日〔20/11 - 24/11〕

全城熱話,一田購物優惠日又黎喇!一如以往,我去一田購物日目標只有一個,就係直入 Manis counter,因為往往都會執到筍野...



今日趁 lunch hour 去探路,只見全店人頭湧湧,擠得水洩不通,當時個心唸:又話金融海嘯市道好差既?睇黎香港人都仲係好有潛力喎....


第一時間去到 Manis counter,今年比去年遜色,雖然都仲有 Pekkle products 賣,不過全部都係過去各大百貨公司促銷時都有得賣既舊貨,因為人太多,唔方便影相比 blog 友睇,係呢度我盡量 list out 哂所有既 Pekkle products 比大家參考下,之前仲未入貨既 blog 友,都可以考慮下既....


〔1〕Pekkle 鬧鐘〔有 2 款〕-- 原價 $109,現售 $69


〔2〕Pekkle 錄音公仔 -- 原價 $89,現售 $39


〔3〕Pekkle 走馬燈 -- 原價 $129,現售 $39


〔4〕Pekkle Notebook〔大、細兩款〕 -- 各售 $10


〔5〕Pekkle 磁石〔兩個裝,冇得揀款,全部都係 Pekkle 拼新幹線或 Pekkle 拼 CK 鼠〕-- 原價 $10 一個,現售 $5 一包兩個


〔6〕Pekkle 水壺 -- 原價 $39,現售 $26


〔7〕Pekkle 2003 年舊款環保袋〔有大、細兩個 size〕-- 各售 $25


〔8〕Pekkle 文件袋 -- 原價 $11,現售 $7


〔9〕Pekkle 4R 相簿 -- 原價 $59,現售 $49


〔10〕Pekkle F4 Clip File -- 原價 $15,現售 $7


〔11〕Pekkle Magazine File -- 原價 $15,現售 $6


之前仲未買到既 Pekkle blog 友,又係個掃貨好機會.... 不過比定個心理準備大家,排隊比錢既人係超乎想像咁多,隨時排半個鐘頭都仲未比到錢,所以提議大家由頭行到尾,邊行邊揀,一次過比錢買哂所有野,咁就可以慳番 d 排隊既時間。不過最有效率既方法就係,預早計劃定要買 d 咩,搵多位朋友一齊去,一個負責排,一個負責掃貨,又或者到時再交換位置,睇下有冇 d 咩漏網之魚想買既,咁樣就會快好多囉!


下個目標就係月尾〔29/11 - 02/12〕開始既吉之島會員購物日,希望到時可以係 Manis 買得番 Pekkle 把直遮啦!


Sunday, November 16, 2008

Sogo Thankful Week

14/11 係 Sogo Thankful Week 既第一日,因為尋日唔得閒,今日先去... 每次去 Thankful Week,其實最主要都係去 Manis counter 同 supermarket...


Manis 今次同以前一樣,都係全店正價貨品九折,另外再有 d 以低價發售既精選貨品,今年 Pekkle 既精選貨品係:


2007 年既 Pekkle 鬧鐘 -- $69


Pekkle B5 Notebook -- $10



Pekkle F4 Clip File -- $7



Pekkle 木印 -- $5



之前未入貨而又有興趣既 Pekkle fans,快 d 去 Sogo 掃貨喇!售完即止嫁!


Thursday, November 13, 2008

菓匠茶屋 Kasho Chaya

大概三、四個月前,沙田 City Super 引入左兩間日本果子店,分別係亞月家同菓匠茶屋,亞月家主力係賣大判燒,而菓匠茶屋就係賣和菓子。


之前係菓匠茶屋買過銅鑼燒同大福,不過最愛仍然係佢地既竹葉糯米糰,糯米糰係師傅現場即製既,外層新鮮又煙韌,但又不失軟熟既感覺,而內裏既紅豆餡料,有紅豆香又不會死甜,食得出係靚料,但係價錢又唔貴喎!所以個人黎講,呢一款和菓子算係物超所值!可惜食過兩次之後,已經無辦法再買到,問過店員,先知道原來沙田店唔會再有呢一種竹葉糯米糰,只有另外一款非即製而加左艾草既竹葉糯米糰.... 係有 d 失望既情況底下,見到佢地出左一款新既產品 ---- 『十勝紅豆湯丸子』。鍾情紅豆既我,見到『十勝紅豆』四隻字已經深深被佢〝吸引〞住,即刻買番屋企試下先


十勝紅豆湯丸子



竹葉糯米糰



因為放工番到屋企已經係晚飯時間,要食完晚飯,攤抖一陣先食得落呢個甜品,雖然已經凍左,不過一樣冇令我失望。紅豆煲到起哂沙,充滿豆香,唔同一般中國產既紅豆咁,就算同樣煲到起沙,但係成碗紅豆沙都會充滿紅豆〝衣〞,當堂扣哂分!完全比唔上呢碗『十勝紅豆湯丸子』!除左紅豆湯出色,就連丸子都有一手,細細粒,煙韌之餘又不至於咬唔開、黐牙。不過唔知係唔係日本人特別嗜甜,所以唯一可以挑剔既地方就係甜左少少囉。


 


〔後記〔10/12/08 〕:唔見紅豆湯一段日子,店員話聖誕節前會再番貨,果然今日再見其蹤影,二話不說立即買下,番到屋企急不及待拎黎食,點知就出事..... 今次既質素係強差人意囉!又甜又杰,甜到簡直係有 "拿" 喉既感覺.... 好失望呀!不過我唸我都會再比多一次機會佢,遲 d 再試多一次,如果味道仍然係咁,唉... 我唸我會放棄再向朋友推介呢款甜品囉!


Wednesday, November 5, 2008

Pekkle 美國版電話繩...

兩日冇 check blog,今日 lunch hour check 番時,先發現 blog 友雪藍既留言話 Pekkle 出左新電話繩,即時飛撲落去 Gift Gate 搵!係公司附近有兩間 Sanrio,只係得番一間有最後一條,就係咁,我呢個後知後覺既 Pekkle fans,先唔會錯過左呢條 Pekkle 電話繩... 係度真係要多謝雪藍既通風報信!



睇完雪藍係 blog 對呢條電話繩既『大解構』之後,我都發覺呢條電話繩真係怪怪地,明明係 2008 年既新貨,但係 Pekkle 個公仔又印住係 2006 年既 product 喎;明明係由美國洛杉磯一間與 Sanrio 合作既日本公司出品,但係又有 Sanrio 位於德國既公司名喎... 都搞唔清呢條電話繩究竟係邊度既出品...



記得係 2003 年 Trendyland 都出過一系列錯體 Pekkle 既 products,佢地將 Ahiru No Pekkle 個名印成 Aniru No Pekkle,如果唔係 Trendyland 買,真係會誤會係老翻貨囉!



不過無論係正貨定老翻,總之唔會扭曲左 Pekkle 可愛既造型,都已經心滿意足 lu~