Friday, May 30, 2014

日本 Sanrio 2014 年最受歡迎卡通人物選舉 (Sanrio Character Ranking 2014) - 中期報告 << 選情告急!!>>

今朝如常上 Sanrio 官網投票時,無意之中發現日本版官網〔平時我係直接到英文版投票〕,發表咗卡通人物選擇嘅中期報告。Pekkle 嘅成績強差人意呀!唔只達唔到進入第二輪選擇嘅資格〔即係要喺所屬組別爭取到頭四名嘅位置〕,Pekkle 依家就連五甲都不入呀! =(



要 Pekkle 輸比 Kerokerokeroppi,又或者係 XO,我都心甘命抵,但係其餘三位卡通人物,我真係唸唔到佢地有幾紅囉?竟然咁都可以入到五強?!好失望呀!

喺呢度,我呼籲所有 Pekkle fans,要好好利用餘下嘅十幾日時間,投多幾票比 Pekkle 呀!

你的一票,十分重要!Pekkle 可唔可以擠身頭二十名之內,晉身下一輪投票,就要靠你神聖嘅一票喇!

你今日投咗未呀?

Thursday, May 22, 2014

Pekkle 微纖冷氣被

今年無論係一田購物優惠日,又或者係崇光嘅 Thankful weekly 都冇 Pekkle 嘅產品促銷,原本就非常失望,好彩前排舉行嘅『千色店 "糕" 興購物 24 載』中,又比我搵到一樣 Pekkle 產品促銷,仲要係全新嘅產品嚟添...




Uji 全新推出嘅 Sanrio 微纖冷氣被,一共有三款卡通人物,每款都分別有單人、雙人同埋加大嘅尺碼,Pekkle 有幸係其中之一位...



原本唸住買一張單人被嚟用、一張加大被嚟儲嘅,不過可能係我太遲去嘅關係,所以加大碼已經賣哂,連訂貨都唔再接受... 所以最後我只係買咗兩張單人被...





一向愛好水上活動嘅 Pekkle,今次變身為籃球運動員!整張被都印滿 Pekkle,連 backdrop 都印咗 Pekkle 嘅 outline,好正呀~



產品招紙都印得特別靚!打緊籃球嘅 Pekkle 係唔係好得意呢?





product tag...



Friday, May 16, 2014

一田購物優惠日 2014 (22/5/2014 - 26/5/2014)

2014 年嘅一田購物優惠日已定於 5 月 22 日〔下星期四〕舉行。呢個每半年一次嘅『盛事』,勢必引嚟哄動,而基本上,每次首日開賣,都總會吸引過百人喺門口排隊,等候搶購當日嘅限售精選貨品,好幾次仲因為場面太過墟冚,而搞到上報紙頭條,連電視節目都有報導...



今年一收到傳單,一如以往,梗係第一時間搵下有冇 Pekkle 嘅特價品啦。點知今年竟然係一樣都冇喎... 好唔開心囉!近幾年每次都總會有 Pekkle 嘅新貨 / 限量品促銷,但係今次一樣都冇,真係好失望呀!睇嚟今年都唔洗再迫入去 "搶" 購喇... =(

Tuesday, May 13, 2014

日本 Sanrio 2014 年最受歡迎卡通人物選舉 (Sanrio Character Ranking 2014)

一年一度嘅 Sanrio 卡通人物選舉又開始喇!今次『候選人』一樣係有一百位,但係玩法就同過往有少少唔同...


 
今年投票分兩個回合進行,一百名『候選人』已獲分配入 A 至 E 五個唔同嘅組別,每個組別頭四名嘅卡通人物,都可以進入下一輪嘅複賽,爭奪最受歡迎卡通人物嘅殊榮。

首輪投票日期由 2014 年 5 月 10 日開始,直至 6 月 15 日結束。而複賽嘅投票日期就由 2014 年 7 月 8 日至 7 月 21 日,希望 Pekkle 可以順利進入複賽啦!



每人每日都可以喺每一個組別投一次票,即係每人每日可以投五票比唔同組別嘅所屬卡通人物。



而我至愛嘅 Pekkle 就被編入 D 組,同組共有 20 名『候選人』,而喺我眼中 Pekkle 嘅勁敵應該就係 62 號嘅 Kerokerokeoppi 同埋 64 號嘅 XO。睇情形,Pekkle 要晉身成為 D 組嘅四強,如無意外,應該都冇乜問題... 卦?!




係呢度就請大家幫幫手,由今日起直至 6 月 15 日,記得每日都要去投下你地神聖嘅一票比 D 組 67 號『候選人』Pekkle呀!有你地嘅支持,Pekkle 先可以晉身最後二十強嫁!多謝各位!!

你今日投咗票未呀?^_^

http://sanriocharacterranking.com/?lang=en

Friday, May 9, 2014

Pekkle 魔術調色盤

台灣三麗鷗授權出版嘅魔術調色盤,有好多 Sanrio 嘅卡通人物可供選擇,Pekkle 有幸位列其中,價錢又平,作為 Pekkle 嘅死忠粉絲,唔買唔單只對唔住 Pekkle,仲好對唔住自己囉!


買嘅時候都冇留意係唔係每位卡通人物都有兩款,因為我眼中就只有 Pekkle 嘛 ^_^

逐款慢慢睇下,首先第一款。係我至愛嘅藍色 - 歡樂篇~

正面


背面


內附共有八幅唔同造型嘅 Pekkle 圖畫。


第二款 - 郊遊篇





所謂嘅『魔術調色盤』,其實就係填色畫冊,分別在於呢本魔術調色盤比較 "高檔",唔洗自己用顏色筆去填色,根據畫冊上指示,只要自備水及棉花,透過畫冊附上嘅 "調色盤",就可以幫 Pekkle 上色。自問一向都係手腳唔協調兼零嘅美術天份,當然唔會搵 Pekkle 去冒險啦!都係乖乖地、乾乾淨淨咁儲住本填色冊就算啦!

呢頁就係隨畫冊附上嘅 "調色盤",共有五種色,共二十格可以用。


產品說明,唔好以為有四點好似好詳細,其實只有頭兩句係教你點樣用... 都係唔好搏喇!


正牌台灣三麗鷗授權,係 2013 年嘅出品,不過拖到依家先發現,唔知香港係幾時有售嘅呢?最難得係冇串錯 Pekkle 個全名嘛!只係將 Pekkle 全名嘅第一個字 "Ahiru" 同第二個字 "No" 字黐埋咗囉... 只係小錯誤,冇串錯字都已經好好嫁喇!


同好多日本貨一樣,明碼實價,絕無欺騙。台灣建設售價係 $39,折合港幣大概係幾多錢,相信大家都已經心中有數啦?



Thursday, May 8, 2014

Pekkle 潤手霜

雖然我唔識日文,不過每次當我買咗草莓雜誌之後,都會習慣睇下有咩新產品已經 / 即將推出,同埋最緊要睇埋下一期雜誌贈品係送乜,會唔會咁好彩有 Pekkle 份。

喺 5 月號嘅草莓雜誌中,就比我發現到有 Pekkle 新產物,但係礙於唔識日文,都唔知係 d 乜,不過無論如何,都好想擁有到,所以就托咗我嗰位經常會去日本嘅家姐,叫佢下次去日本時幫我買。



我家姐睇到我 send 比佢嘅相,就已經知道係 hand cream,而不出半個月,新貨已經到手!


雖然我唔用呢 d 產品,但係個盒真係好靚呀!拎上手都好有質感,仲要有凹凸壓紋,好精美呀!


我對美容產品冇乜認識,712円一盒嘅 hand cream,我衡量唔到算唔算貴,不過見到個咁靚嘅 Pekkle 盒,我覺得都已經值回票價!


翻查網址,原來呢個係韓國品牌,似乎都幾有規模咁添!雖然我對美容產品一竅不通,但係照計日本嘅美容市業都有番咁上下聲譽,但係呢個韓國品牌都可以攻陷到日本呢個市場,韓國果然係最新嘅美容王國喎!


其實,我依家都仲惆悵緊可以點樣儲住個盒,如果連埋入面嘅 hand cream 一齊儲,我又驚 d hand cream 會過期變質,陣間搞到連 Pekkle 個盒都唔要得咪蝕哂囉?但係我又唔係好想拆開個包裝,掉咗入面嘅 cream 喎...  點算好呢?

Monday, May 5, 2014

Sanrio characters 日版索袋

呢款索袋係同之前買咗嘅 Sanrio characters 日版餐盒袋係同系列,只係遲咗少少推出。其實我都買咗一段日子嫁喇,只不過我唔係冇時間寫,就係冇乜心情寫,趁住聽日係公眾假期唔洗番工,就『的』起心肝寫埋佢啦...

前幅




後幅,其實前幅同後幅嘅 pattern 係一樣嘅。


其實我對粉紅色真係有少少抗拒,尤其係近乎桃紅色,不過鬼叫有 Pekkle 份咩?唔買又好似有少少對唔住 Pekkle 咁喎,而且價錢又唔係貴,所以都係買咗... 一個咁多啦!


雖然 d 公仔造型就麻麻地,不過真正係 Sanrio license 嫁!


走唔甩,原產地仍然係中國,不過係 "For Sale in Japan Only",正如我之前所講,今時今日要搵到一件精品係日本製,仲要有 Pekkle 份嘅話,都真係難過中六合彩呀!所以,呢件產物,勉強都可以算係日貨嚟啦!