由 30/11/2018 至 28/2/2019 短短呢三個月嘅期間限定 Pekkle Cafe,我去朝聖嘅次數都唔算得係密,再加上參加 Cafe『特備節目套餐』時又唔會有襟章送,所以我都唔係儲得到好多襟章,full set 就只有兩套...
不過最可惜都係差一個咖啡杯 Pekkle,我就可以儲齊多一套嫁喇,今日又已經係 Cafe 最後一日營業,已經再冇機會儲到喇... 真係有少少遺憾囉...
呢一樣野,係我今日喺 Pekkle Cafe 唯一一樣買走嘅精品,其實呢張地氈推出時都冇唸住買,因為知道一定唔會用,收藏又麻煩... 但係唔知係咪因為見好多人入嚟掃貨,羊群心理之下,結果我又買埋一份...
雖然我並唔係一位活躍嘅 Pekkle fans,但係鍾意咗 Pekkle 超過 25 年嘅我,其間並冇『見異思遷』,又或者好『博愛』咁同時間鍾意其他唔同嘅卡通人物,所以我仍然係會認為自己係一位 Pekkle 鐵粉。既然係鐵粉,全球首間 Pekkle Cafe,我又點會唔去朝聖呢?
正如我之前所講,我並唔係一位活躍嘅 Pekkle fans,所以我根本都唔知 1/12/2018 會有個開幕『特備』節目,當我知道嘅時候,已經係太遲喇!兩場見面簽名會一早已經爆滿,我唯有趁 Pekkle Cafe 30/11/2018 試業嗰日,就請假去先睹為快啦!眨下眼,呢間限定 Pekkle Cafe 終於都嚟到最後一日... 試業當日請假去,所以好頭好尾,到最後一日,我都一樣請假去 Cafe...
原本唸住今日係閒日,應該都唔洗訂檯,好彩朋友有先見之明,佢都係覺得訂咗檯會穩陣啲,其實今日午市並唔係好多客人,但係餐廳竟然係唔接受 walk-in 客,唔知係咪因為要準備之後兩場 farewell party,為免阻礙佢地嘅預備工作,所以我見到就算餐廳仲有起碼一半檯,仍然阻止 walk-in 客入座... 心唸好彩朋友一早訂咗檯,否則我就唔可以好『完美』咁,頭、尾兩日都支持到 Pekkle Cafe 喇!
當日有好多精品開始做傾銷,所以就算入唔到餐廳食飯嘅顧客,都會買啲精品離開,絕對唔會空手而回... 不過大部份精品,其實我之前已經買哂,所以今日主力反而係食,因為我想儘最後嘅努力,儲番多一套非賣品嘅襟章嚟留念...
呢個係香港貨,其實都冇乜用,本來就唔想買,不過既然買開個『日本系列 Pekkle 精品』,就順敘買埋啦!最重要係又平又唔阻地方...
同一個系列嘅日本 Sanrio 膠牌吊飾,好平、好抵,唔買對唔住 Pekkle 啦!haha...
Pekkle 絨毛公仔吊飾,正宗日本貨,所以就算冇乜用,都要買個支持下啦!
其實我麻麻地鍾意呢啲款式嘅 Pekkle 公仔,夾硬將可愛嘅 Pekkle 外形變成個一個柱狀,不過依家 "Tsum Tsum 堆疊式" 公仔太流行,見個價錢又唔係貴,所以都即管跟下風,買一隻儲下啦~
見到呢個 Pekkle 公仔,其實覺得有啲突兀,不過始終都係朋友一番心意,再加上係 Pekkle,就算個人覺得呢個 Pekkle 吊飾公仔好騎呢,都會照樣收藏!
第一眼望到,感覺似個甜筒...
山下菓子又出新產品喇,今期係呢個 eco wrap 環保食物袋。質地好靚嫁,滑『口都』『口都』,摸上手有冰涼嘅感覺...
最後一個星期喇,自從一開始時一口氣換咗六隻碗,其中只得一個係 Pekkle 之後,我就冇再繼續換現貨,唸住儲埋啲印花,到最後限期先一次過換,睇下抽中 Pekkle 嘅機會係咪會大啲先...
呢批就係我最後儲到嘅印花,準備聽日拎去 7-11 登記換領...
我覺得閒日,尤其係午飯時間,嚟 Pekkle Cafe 係最舒服嘅,人客都冇咁多,今日仲可以比我影到呢啲相,真係好似包咗場一樣呀!由 11月30 日試業開始,大大話話都嚟過七、八次,首次可以影到冇人嘅 Pekkle Cafe 全景,真係大滿足!就算係專登請假過嚟,都覺得好值得呀!
呢個 Pekkle 無線叉電器好靚,係友人送嘅禮物... ^^
雖然今期草莓雜誌內容冇上一期咁精彩,咁多 Pekkle,不過因為份贈品有 Pekkle,當然又要買啦!
太古城 AEON 意外發現呢套 Sanrio characters 嬰兒床品套裝,Pekkle 都有份嫁~
農曆新年之後,第一次到 Pekkle Cafe,原本唸住放農曆年假時去,但係原來佢地做飲食業嘅,都一樣係休紅日,所以結果拖到依家先嚟...
兩個人去午飯,只係叫咗一份咖喱飯,因為今日主要係想試佢地嘅甜品..
朋友喺 fb 發現,凡惠顧『Duck 意浪漫限定 2 人套餐』嘅顧客,都可以優先購買一套 Mini Pekkle Cafe,由於我係屬於第一批嘅顧客,當日仲未推出呢套 Mini Pekkle Cafe,所以當我知道之後,即刻打電話去 Pekkle Cafe 問可唔可補購,店員話曾惠顧呢款套餐嘅客人,只要出示番訂餐紀錄,係可以補購。為免被其他 fans 掃光,我都唔等到星期六放假,尋晚一放工就急不及待走出去 Pekkle Cafe,帶一套 Mini Cafe 番屋企啦!
打從 Cafe 2018 年 11 月 30 日試業當日,我踏入去呢間 Cafe 第一眼望到嘅,就係喺廚房門口嘅呢塊門簾,相信係經過一班熱情嘅鐵粉再三向 Cafe 反映,Cafe 終於都『順應民意』,推出咗呢款門簾喇!
有少少後悔當日只係買咗一張...
每次去 Pekkle Cafe,都要拎走佢地張紙枱墊番去儲,為咗方便儲存,又要拎去文具店過膠,以防整皺。既然依家 Cafe 推出正式嘅膠枱墊,更易收藏,無理由唔買姐?
都係喺同一個場合,即係『Duck 意浪漫限定 2 人套餐』時,見到嘅新產品,係矽膠杯墊,好靚呀,點忍得住手唔買呀?
因為參加咗『Duck 意浪漫限定 2 人套餐』嘅關係,喺店入面可以率先購買呢款原本只限套餐附送嘅飾物盒,我見實物真係幾靚,所以忍唔住,現場又買多一個,加埋套餐送嘅嗰一個,一共有兩個,好開心呀!
為咗份『Duck 意浪漫限定二人套餐』所送嘅透明膠首飾盒,梗係要去食啦!
唔知係咪因為第一個已經開到 Pekkle 碗?抑或係同期實在有太多其他 Pekkle 產品推出而影響咗個購買意欲?抑或係所有特別版都冇 Pekkle 份?定抑或係七仔真係冇乜嘢好買,所以今次換購儲印花速度係以『龜速』進行...
依家我唸住只係齋儲,唔再換住,儲到最後時期,先一次過換... 個理念係,一次過換嘅數量越多,照計重複嘅機會應該比較細,咁抽得中 Pekkle 款嘅機會應該係會越高囉...
終於都等到 Pekkle 推出新款嘅鬧鐘喇!
我從來都冇擁有過 Pekkle 嘅全盒,之前見過其他 Pekkle fans 有個黑/紅雙色嘅壽司盒時,已經好羨慕,今年 Sanrio 竟然為 Pekkle 推出全盒,梗係唸都唔洗唸就要買啦!^^
今年連利是封都推出咗好多款式,我呢個唔洗派利是嘅人,都唔知買咁多款利是封仲乜?又冇用、又阻地方... 我真係『為鴨死、為鴨亡』... hahaha
由於今年推出嘅賀年產品太多,冇辦法將每一款新產品都寫一篇 blog,唯有將所有賀年產品歸類為裝飾品篇同埋利是封篇啦!
其實呢個 pattern 係唔錯,顏色亦都係我鍾意嘅,不過 Uji 呢個絲般綿系列,真係唔多啱我心水...
呢種質地摸上手確係好滑、好舒服,不過就正因為質地太滑,再加上係四邊『無縫』全橡筋包邊嘅關係,每次洗完之後,想齊齊整整咁摺番成一個正方形,真係相當有難度....而一向怕熱嘅我,瞓喺呢種質地嘅床品上面,未瞓著都已經出咗一身汗...
不過為咗支持 Pekkle,點都要買番一套支持下嘅!
Uji 又出新被喇.... 究竟一生人,可以同時間冚得到幾多張被呢?係佢地對自己公司出品冇信心,覺得啲被最多只可以冚一季就會爛呃?抑或係咩玩法呢?近呢幾年無論係冬天厚被、抑或係夏天薄被,加加埋埋都唔知推出咗幾多款,多到我都數唔清... 被又大張、又阻地方,唔冚,純粹用嚟做收藏品,我相信都唔係太多香港人可以騰得出咁多空間擺放卦?
其實我係支持出多啲床上用品嘅款式,不過只限床單、枕袋囉,至於被,並唔同床單,正常真係唔會換得太密,亦都冇咁容易洗爛、洗舊....
話雖如此,我仍然係因為想要個靚靚 Pekkle 袋,所以買咗呢張被...
可能係因為 Pekkle 榮登 2018 年 Sanrio 最受歡迎卡通人物選舉香港區冠軍,連帶今年都推出咗好多不同款式嘅 Pekkle 賀年產品,真係買鴨都買窮呀!
趁住農曆新年就嚟到,要幫屋企更換啲新嘅家庭用品,無意之中比我喺一田家品部見到呢條日本版嘅抺手布,雖然 Pekkle 只得好細個,不過都好過冇啦!之前香港 Sanrio 係曾經出過兩款 Pekkle 抺手布嘅,可惜已經用到殘哂、舊哂,又冇再推出新款,咪唯有雜錦款都頂住先啦!
冇乜嘢好買嘅情況之下,呢個星期只係儲到三套碗嘅印花,可惜又係一個都唔中...
唔知咩原因,總係覺得今期喺 7-11 買唔到嘢咁,唔似得以前咁,一知道有 Pekkle 精品換購,個個星期都可以擺啲『戰績』上嚟曬下...
今次我已經差不多日日收工,都入七仔行一轉,不過大多數都係空手而回,一係就夾硬買啲無謂嘢...
第二個星期都就快完結,好勉強先可以儲多兩套印花,換到兩個陶瓷碗,可惜今次再冇咁好彩,兩個都唔係 Pekkle...
2019 年 1月10日出版嘅草莓雜誌,今期嘅贈品係圓形細鏡一塊,雖然只有一款雜錦款先有 Pekkle,但係今期有一篇『專訪』內容好『勁』嫁,作為 Pekkle fans,尤其係香港區嘅 fans,就更加必定要買嚟儲嘅一期!
朋友送嘅 Pekkle 禮物,『外表』重要過『內涵』!因為對比起一般正常 size 嘅芭蕉扇,呢把扇嘅風力未免係太弱喇!就住拎住對正塊面去吹,都感覺唔到有涼意... @@
雖然冇實際用途,不過都係朋友一番心意,所以就算並不實用,都一樣會好好收藏!^^
其實我就麻麻地鐘意『球形』嘅 Pekkle,因為搞到 Pekkle 五官錯哂位咁,好唔得意囉!不過,又係為咗印花,都係要買嫁喇!
因為係第一日開始發售,再加上我係番工之前就去七仔買,佢哋都仲未有時間將啲貨散上貨架,所以我都要等 7-11 嘅職員入倉拎出嚟先買到...
都已經唔記得咗自己曾經買過幾多款 Pekkle 保溫瓶,不過為咗 Pekkle、為咗七仔嘅印花,所以都冇唸咁多,照買啦!
7-11 x Sanrio Characters『花雨、花語』2019 之『花盛花開、春節花祭』Sanrio characters 10 款花形陶瓷碗推廣活動今日正式開始!
番工之前,梗係第一時間要去七仔入下貨,儲印花,換 Pekkle 喇!
曾經何時,我番工都有帶飯嘅習慣,不過講緊都已經係差不多十年前嘅事嚟喇!依家唔再帶飯番工,偏偏就推出兩款咁靚嘅 Pekkle 玻璃飯盒,雖然冇用,都一定要買嚟儲呀!
長方形
最近一、兩年,七仔好似多咗好多 Sanrio 嘅精品賣,係一批接一批咁推出,搞邊科呢?
呢套屏幕清潔用品套裝,喺 Pekkle fans 之間,好似冇乜人提起過,唔知係咪『意外收穫』呢?
2018 年台灣製貝克鴨迷你清潔用品套裝...
仲有幾日,7-eleven 就會推出印花換 『花盛花開、春節花祭』Sanrio 十款卡通人物嘅花形陶瓷碗,當中有一款就係以黃色向日葵登場嘅 Pekkle,我知道應該為咗儲印花,等多幾日先買呢個環保袋,但係當我見到實物時,又忍唔到手唔買,驚遲啲會比其他 Pekkle fans 掃哂,所以就算仲未有印花派,都要買咗先!
呢款和風貼紙雖然係香港貨,不過無論係設計,抑或係材料都別出心裁,係 Ellon 難得有誠意之作,唯一美中不足係只有雜錦款,如果全張貼紙都係 Pekkle,就更加完美喇!
自從 11月30 日喺 T.O.P. 開咗呢間 Pekkle Cafe 之後,間唔中都會令我有想去幫襯嘅衝動... 亦都係因為 Pekkle Cafe,我出旺角嘅次數,喺呢一、兩個月真係激增咗好多呀!今日,又忍唔住去咗幫襯喇!
可能已經開始運作咗一個多月,所有嘢都開始暢順,不過營業時間就有唔同...
11月30日嘅營業時間:
呢款貼紙並唔係新產品,係 2017 年嘅出品,不過之前未見過,今日無意之中行街時比我見到,注定要帶佢番屋企啦!
日本推出嘅密實袋,呢個系列都推出咗好多精品,例如杯、file、眼鏡布、眼鏡盒等等,不過我個人唔太喜歡呢款『生炸腮』嘅 Pekkle,所以只係揀咗呢個系列之中最平、最唔阻地方嘅產品嚟儲,算係叫做有買過、支持過啦!
其實之前已經出過三數款 Pekkle 嘅行李帶,但係我一款都冇買到,唔知點解偏偏就買咗最新推出呢款,可能貪佢呢款行李帶係『多功能性』卦〔其實我都唔會用,只係買嚟儲,有幾多功能又有咩關係呢?〕?