Sunday, December 18, 2016

:Chocoolate 十周年企劃 x Sanrio characters 系列

:Chocoolate 十周年企劃 x Sanrio characters 系列嘅衫,首日開售為 16/12/2016〔星期五〕,由於要番工,仲要只限尖沙咀 The One 分店,所以一早都已經唸定等 17/12/2016〔星期六〕,全線 :Chocoolate 分店公開發售先買。不過 16/12 嗰日已經好緊張,喺辦公時間都偷偷地上咗幾次 :Chocoolate 嘅官方 FB 睇情況,發覺都幾『人山人海』,仲要排隊買,為免買唔到,所以星期五已經打定電話去分店 check 下星期六幾點開門,接電話嘅少女答我開 11:00,結果我尋日上晝 10:15 都未夠就到咗,驚死要排隊,但係去到分店門口時,見鬼影都冇隻,所以就去食個早餐先,10:50 左右番到去,見到已經有個人企咗喺門口等,仲以為開始排隊,後來先知原來喺 :Chocoolate 等番工嘅員工,等到過咗 11:00 都唔覺有開門嘅意欲,先發現原來間分店係開 11:30... 激死,早知唔洗咁早嚟啦,浪費咗我嘅時間...

呢個系列嘅服裝,有分男、女及童裝,部份款式只限女裝、童裝發售,所以除咗必買嘅女裝 Pekkle 短袖 tee 之外,我主力都只係買男裝款式。


草莓雜誌 - 2017 年 1 月號

今期嘅贈品又有 Pekkle 份喇~


Friday, December 16, 2016

2016 年 12 月 16 日第 577 期 U-magazine 特別版〔:Chocoolate x Sanrio Characters 旅行收納袋〕

:Chocoolate 為慶祝成立十周年,與唔同產品嘅品牌推出一系列嘅聯乘計劃。其中最令我地一眾 Pekkle fans 眼睛發光嘅,當然係 :Chocoolate x Sanrio characters 嘅服裝啦!之前幾日係報紙見到推廣專欄稿時,已經見到 Pekkle 影蹤...

因為 Pekkle 嘅關係,搞到我時不時就上網 search 下呢個聯乘計劃嘅詳情,知道呢個系列嘅上架首日日期係 16/12/2016,首日只限於尖沙咀 The One 嘅 :Chocoolate 分店有售,其餘分店就係 17/12/2016〔星期六〕先正式公開發售。

相信係為咗配合宣傳攻勢,16/12/2016 出版嘅第 577 期 U-magazine 特別版〔其實星期四已經有得賣〕,隨書附送 :Chocoolate x Sanrio characters 旅行收納袋,由於係非賣品,仲要係有好多一線 Sanrio 公仔,所以我都好擔心買唔到書。星期四一朝早已經去到七仔,點知佢話仲未番貨,冒住番工遲到嘅危險,終於都比我等到七仔番書,二話不說,梗係即刻比錢拎書走人啦!


Sunday, December 11, 2016

2017 年日版 Sanrio characters 記事簿

2017 年 Sanrio characters 記事簿,掃描形式嘅設計,構圖好特別,日貨果然係唔同啲... ^^
 
Schedule book 正面
 

Fantasy Theatre 系列 - 包裝貼紙

意外地比我喺 Gift Gate 發現到嘅另一樣 Fantasy Theatre 系列產品,其實呢個系列都推出咗幾多精品,可惜唔係款款都有 Pekkle 份,我已經見一樣買一樣,希望已經將呢個系列嘅 Pekkle 都買齊哂啦!=D


 

Saturday, December 10, 2016

Manis Winter Catalog 2015 (Vol. 25)

每年 Gift Gate 推出咗佢地本產品目錄之後,接住 Manis 就會推出佢地嘅產品目錄,今年都唔例外...


Saturday, December 3, 2016

Gift Gate Sanrio Gift Factory - 2016 Winter Christmas Gift Ideas 及 2017 新春推介

見到最新一期嘅 Gift Gate 產品目錄,梗係唔執輸,第一時間拎番本睇下先啦!


Sunday, November 27, 2016

Fantasy Theatre 系列 - A4 plastic folder

無意中喺 Sanrio Gift Gate 發現,梗係第一時間買咗先講啦!

Pekkle 吊飾

今年嘅一田購物優惠日喺  24/11/2016 - 28/11/2016 舉行,一早睇咗推宣傳單張,發覺冇 Pekkle 已經冇乜意欲去行,不過反正一田都好近公司,放咗工都係去行咗一轉。

通常我只會行去 Gift Gate 同埋 Manis 嘅 counter 睇下有冇咩漏網之魚,發覺都係啲陳年舊貨,一係就一早已經買咗,一係就係連當年都冇買嘅產品,今次亦都未減到去一個會令我『非買不可』嘅價錢...

原本都唸住會空手而回,咁啱又比我見到一個之前好想去征服世界買,但係又唔得閒去,得閒去到時,又已經賣哂嘅 Pekkle 吊飾。

我好相信個價錢比征服世界貴好多,不過自己係 Gift Gate 會員,有八五折,折實之後就同征服世界嘅價錢拉近咗,再加上慳番去征服世界買嘅時間同車錢,其實都應該抵銷得到...

好開心終於都比我買到手喇!^^

Wednesday, November 23, 2016

Sanrio characters collection cards

又見到 Pekkle 嘅蹤跡喇...

唔知一眾 Pekkle fans 覺唔覺得,凡係以 Sanrio Characters 嘅名義推出嘅 Pekkle,個樣都係『怪形怪相』咁,頭身不合比例之外,連帶個樣都好『假』,官方 Pekkle 條『唇線』去到兩邊咀角位,明明都唔係連住,但係呢個系列嘅 Pekkle,統統都係『封咀角』嘅,感覺始終係有 d 怪囉... 不過,今時今日要等到有 Pekkle 自己產品推出,又談可容易呃?所以就算個樣係醜咗啲都會照買,『頂住癮』先嘛,總好過乜都冇~~


Saturday, November 19, 2016

Saturday, November 12, 2016

Fantasy Theatre 系列 - 口金包

行過好多間大眾嘅分店,都會見到有呢款 Fantasy Theatre 系列嘅口金包賣,但係偏偏就係搵唔到有 Pekkle 份... 皇天不負有心人,終於都比我喺荃新天地嘅大眾,發現到呢個款式嘅口金包喇!超滿足!

只係得其中一邊有 Pekkle... 不過,都好開心嫁喇...


Thursday, November 10, 2016

Sanrio Puroland 25 週年紀念 A4 Plasitc Folder

除咗張立體聖誕卡之外,我仲收到一套兩個嘅文件套...

唔知點解,Sanrio Puroland 嘅文件套咁鍾意一大一細,兩個一套咁包裝...

心水清嘅話,應該都認得呢幅圖啦?無錯喇,就係 Sanrio Puroland 25 週年紀念嘅『大合照』,之前介紹過嘅會場手信 -- 法式牛油小蛋糕嘅禮盒包裝,同埋會場嘅購物袋,都係用咗呢個款式。



Friday, November 4, 2016

Sanrio Characters 立體音樂聖誕賀卡

上個月收到一大批 Sanrio Puroland 嘅手信,啱啱又收到第二位家庭成員去完日本旅行番嚟嘅手信,就係 Sanrio Characters 立體音樂聖誕賀卡,好靚、好精美,之前都未見過... ^^

賀卡一共有兩款,除咗係立體之外,仲有閃燈同埋音樂,真係好靚呀!



Sunday, October 9, 2016

日本手信 - 富士銀行 Pekkle 貯金箱

呢個富士銀行 Pekkle 貯金箱,係 Pekkle fans 一定見過,亦都一定好恨,因為已經係『史前』嘅絕版貨,依家要買番都唔係一件易事,就算有得買,都一定係『天價』...

之前提到,我家人去咗日本玩,佢地除咗幫我入 Sanrio Puroland 掃貨之外,由於佢地係自由行嘅關係,四圍行逛去到一間古物店『尋寶』之時,咁啱比佢地搵到呢個已經絕咗版嘅富士銀行 Pekkle 貯金箱!

我恨咗好多好多...年嫁喇,真係勁開心呀!



日本 Sanrio Puroland 手信

早前見到征服世界老闆去日本 Sanrio Puroland 入貨時,有一系列 Pekkle 新貨,已經雙眼發光,但係奈何個定格太貴喇,每件貨都要以十算計,而且款式好多,買哂又好似太浪費,揀一部份買咩?我又有選擇困難症喎,所以一路都係得個『恨』字...

好好彩,我屋企人咁啱又去日本旅行,當佢知道我想買呢批新產品之後,佢竟然專登抽咗行程其中一日嘅幾小時,買飛入場掃貨番嚟送比我〔佢嘅行程原本係冇預到要入 Sanrio Puroland〕,收到呢一大袋手信,真係超開心呀!等我逐樣介紹一下先喇。



Sunday, October 2, 2016

Fantasy Theatre 系列 - 2017 年日版 Sanrio Characters 掛曆

閒逛征服世界時,無意中發現呢款日版 2017 年 Sarnio Characters 掛曆,同一系列其實仲有座枱月曆,唸咗一輪,結果都只係帶咗呢個掛曆番屋企...

呢個系列名為 "Fantasy Theater",顧名思義,每位有份出現嘅 Sanrio Characters 都扮鬼扮馬,真係好似做緊舞台劇一樣。

掛曆封面



2017 年 Pekkle 月曆產品

眨下眼,2016 年又過咗一大半喇,又係時候準備 2017 年嘅月曆用品....

好好彩,今年 Daniel & Co. 繼續有為 Pekkle 推出一系列嘅月曆用品,雖然 Pekkle 嘅大掛曆已經『停產』咗幾年,不過呢幾年都仲維持住有 Date Book,座枱月曆同埋小掛曆,所以我都已經好滿足嫁喇.... 一見到,梗係第一時間掃貨喇!

同今年一樣,2017年嘅座枱月曆都係立體嘅,其實個人就比較喜歡以前推出嘅普通裝座枱月曆,因為冇咁阻地方...



Wednesday, September 14, 2016

Pekkle 木製電話座

好明顯呢個係 DIY 嘅產品,唔知朋友喺邊度『捐窿捐罅』搵到送比我。初初收到時,其實都唔知係乜嚟,以為只係普通嘅擺設,原來係手提電話座...

大家睇到 Pekkle 黑色嘅部份,其實係『空心』嘅。頭大身細嘅 Pekkle,望落去就有少少唔合平例,不過如果以 DIY 嘅手作仔去計,我覺得可以收貨嫁喇。^^

Pekkle iPass 台灣一卡通

台灣嘅 iPass 一卡通,即係類似我地香港八達通嘅功能,而款式就好似 759 張會員卡咁,有數不盡嘅款式... 但係點都估唔到就連 Pekkle 貝克鴨都有份喎,正呀!可惜我自己冇去過、亦都冇打算去台灣旅行,又冇朋友打算去台灣,所以一路都得個『恨』字...

https://www.i-pass.com.tw/News/Detail/405

估唔到最近收到朋友送嚟嘅禮物竟然就係呢張 Pekkle iPass... 終於都可以擁有,唔洗得個『恨』字喇,好開心呀!多謝哂!



Sunday, August 28, 2016

草莓雜誌 - 2016 年 9 月號

早喺 8 月號嘅草莓雜誌預告篇已知,2016 年 8 月 10 日出版嘅 9 月號贈品一共有十款,而其中雜錦公仔款式贈品之中,會有 Pekkle 出現。由於征服世界唔會預留草莓雜誌比我呢類『生客』,所以都驚自己會買唔到呢期,好彩後來知道我屋企人月中都會去日本, 一早托咗佢幫我喺日本買番嚟...

可惜唔知點解呢期雜誌會咁好賣,我家人搵咗幾間 Gift Gate 都話賣哂,當日都只係 14/8/2016,雜誌出版咗只係得四日咋喎... 從來都冇唸過,去到日本都會買唔到囉...

好彩,結果都比我喺香港搵得到,雖然只係得番最後一本,都好過冇啦!



Friday, August 19, 2016

置富 Malls Ahiru No Pekkle 夏水禮限量版禮品 - Pekkle 可摺合式沙灘帳篷

話咁快又輪到第二次嘅換領活動,今次係 Pekkle 沙灘帳篷,Pekkle 從來都未推出過類似產品,更顯得矜貴,所以要求亦都加咗碼,由第一次嘅 $600 消費額,加到去 $800 消費額... 都冇計啦,鬼叫自己鍾意 Pekkle 咩?

當日活動同上一次一樣,都係正午十二點開始,經過上次嘅經驗,今次要再早啲去先得,如果唔係,商場職員截龍冇得換嘅話,真係喊都無謂呀!

今次如常係去馬鞍山廣場換領,比上次仲要早咗半小時,十點已經到達,點知都同上次一樣,排喺二、三十位之間,當場聽聞排頭位嘅女士,係當日早上八點已經到達... 提早成四個鐘去排隊?唔係買樓,又唔係名校派報名表喎,唔洗咁癲呀?

成功換到兩個,超開心!



Sunday, August 14, 2016

置富 Malls Ahiru No Pekkle 夏水禮 - 夏日水上嘉年華

5/8/2016 開始,逢星期五、六、日,置富第一城都設有名為『夏日水上嘉年華』嘅節目,其實即係以夏日為主題,set 咗幾個同水有關嘅攤位遊戲節目咁囉。好在沙田第一城都算大,以私人屋苑商場自己搞嘅嘉年華嚟講,都算係幾大型嘅推廣活動,應該都花咗唔少錢...

既然喺置富第一城搞,梗係趁食 lunch 時間過去探一搽路先啦!

可能為咗配合個嘉年華會,個擺設又同之前有少少出入,整多咗拱門入口,好似歡迎緊大家入去玩咁囉...

Saturday, August 13, 2016

置富 Malls Ahiru No Pekkle 夏水禮 - 天水圍置富嘉湖

終於都嚟到八大商場嘅最後一站 --- 置富嘉湖。

天水圍,對於我嚟講,就好似一個『郊遊』嘅地區,要轉車再轉車先可以去到,不過為咗 Pekkle,頂硬上啦!

當日晨咁早去到,原來都仲未 set 好擺設,仲好,咁我又可以影番啲『啟用前』同『啟用後』嘅相...

一共有兩位工作人員忙於整理佈景,去到時仲一地都係垃圾嫁...


置富 Malls Ahiru No Pekkle 夏水禮 - 馬鞍山廣場

沙田區最後一站 --- 馬鞍山廣場。平時我都甚少去呢個商場消費,因為 Pekkle 嘅關係,尤其係為咗要換領於 30-31/7 及 13-14/8 推出兩款嘅 Pekkle 限量版禮品,更加要多多消費添喇!

馬鞍山廣場係五個有立體 Pekkle 擺設商場之中嘅一個,感覺上亦都係五個擺設之中,規模最大嘅一個。

日景


置富 Malls Ahiru No Pekkle 夏水禮 - 沙田置富第一城

lunch hour 去咗銀禧薈,放工就『順便』走多一轉沙田第一城啦!

去咗置富第一城幾次,每次個擺設都會有少少唔同嘅地方...

未正式『啟用』嘅 Pekkle...

置富 Malls Ahiru No Pekkle 夏水禮 - 沙田銀禧薈

睇哂九龍、香港區有 Pekkle 佈置嘅置富商場之後,都係時候輪到新界區。如果由 Yahoo blog 年代,已經有睇開我呢個 Phantom Pekkle blog 嘅朋友,應該都記得我工作嘅地點就係沙田,所以當我知道沙田銀禧薈有 Pekkle 擺設時,真係急不及待趁 lunch hour 就坐咗一個站火車過去探下 Pekkle...

正如觀塘麗港城商場一樣,因為 Pekkle 嘅關係,令我首次踏足沙田銀禧薈... 當日天氣非常熱,雖然由火車站往銀禧薈嘅路程唔遠,我估大約兩、三分鐘左右,不過由於沿途都係冇有蓋行人路嘅關係,喺正午烈日當空之下,兩、三分鐘路程足以令我熱到溶... 不過為咗 Pekkle,無計啦!

萬萬估唔到,Pekkle 嘅擺設竟然喺室外,行到咁熱,仲唸住入商場涼下冷氣,可惜事與願違...

呢個場係平版擺設。睇唔出個擺設主題係乜,總之就有我至愛嘅 Pekkle 同佢嘅女友仔 Ruby 啦!

Tuesday, August 9, 2016

AEON 網上商店 - Pekkle Uji 絲般綿冷氣被

啱啱發現 AEON 網上商店做緊推廣,原價 $299 嘅 Pekkle Uji 絲般綿冷氣被,現只售 $199。上星期日行過 AEON 門市見到仲係賣緊 $299,呢個優惠可能只限於網上商店。之前未買嘅『鴨粉』,記得把握機會入貨喇!遲啲賣哂就冇嫁喇!

網上訂購,可於指定之 AEON 分店取貨〔包括康怡、荔枝角、荃灣及九龍灣〕
https://bid.aeoncity.com.hk/groupbuy/item.asp?ProID=1302

限購日期為今日起計 12 日內。有興趣嘅『鴨粉』好拿拿聲動手喇,手快有、手慢冇嫁喇!

Sunday, August 7, 2016

置富 Malls Ahiru No Pekkle 夏水禮 - 宣傳攻勢

置富 Malls 今次推廣宣傳都算落重本,繼早前嘅全版彩色報紙廣告之外,仲有地鐵站嘅大型燈箱廣告添...


置富 Malls Ahiru No Pekkle 夏水禮限量版禮品 - Pekkle 明信片

免費派發嘅限量版 Pekkle 明信片,印製得咁精美,又點可以錯過呀?

喺唔同嘅日子、唔同嘅時間、唔同嘅商場派發... 6/8/2016 星期六第一日第一個開始派發嘅場地,我早咗起碼十五分鐘去到,估唔到未開始派,已經有一條二、三十人嘅人龍。荃薈呢個商場,我唸開張至今,都鮮有人龍出現嘅情況.... hahaha

置富 Malls Ahiru No Pekkle 夏水禮 - 北角和富薈

去完幾個位於九龍區嘅置富『Pekkle 場』,跟住就轉戰港島區。參與呢次推廣活動嘅港島區商場就只有北角嘅和富薈... 一向獨大嘅港島區,今次 Pekkle 嘅推廣活動反被淪為『弱勢社群』添... hahaha...

以往去北角,多數都為咗食,包括係去買德成號嘅蛋卷、食鳳城嘅順德菜,又或者係未搬之前嘅阿鴻小吃,當中以阿鴻小吃最近和富薈。所以雖然我次次經過和富薈都係過門不入,但係我大概都知商場嘅位置...

因為 Pekkle,今次係第一次真正咁踏足和富薈,比我嘅感覺都幾『空洞』,可能係商場正進行重組工程,所以好多店舖都未開始營業, 十室九『吉』... 不過唔緊要啦,我嘅『目標』係 Pekkle,就算成個場一隻烏蠅都冇,都無阻我入去『探』Pekkle 嘅心...

Wednesday, July 27, 2016

Happy Birthday to Pekkle

今日係 Pekkle 嘅生日,今年 Pekkle 應該過咗一個好開心、好特別嘅生日... 因為今年暑假,香港一間物業管理公司置富 Malls,喺佢旗下其中八間商場,打造成 Pekkle 主題商場... ^^

Pekkle 對上一次有幸出現喺商場作為主題人物,已經係 2009 年嘅地鐵青衣城商場,當年 Pekkle 化身成『郵差叔叔』,雖然只係眾多公仔其中一員,但係就足以令我地一班 Pekkle fans 瘋狂...

http://www.pekkle.hk/2009/11/sanrio-village-50_29.html

估唔到,今年喺會輪到 Pekkle 擔大旗,化身為多個商場嘅推廣活動主角,成為全場焦點。呢次活動簡直就係我地一眾 Pekkle fans 喺 2016 年大事回顧之中,最『重中之重』嘅事項。=D

而剛過去嘅星期日〔24/7/2016〕,置富 Malls 於旗下紅磡置富都會為一連串以 Pekkle 作主打嘅暑期推廣活動舉行咗一個『開幕禮』,當日除咗邀請歌星陳柏宇參加之外,仲有 Pekkle『真身』出現,大會仲為 Pekkle 舉行咗一個簡單而隆重嘅生日會,見到 Pekkle 喺台上與一眾嘉賓及 Pekkle fans 一齊切蛋糕,令到台下嘅我都覺得好開心、好興奮...

Monday, July 25, 2016

置富 Malls Ahiru No Pekkle 夏水禮 - 將軍澳都會駅

因為有舊同事住喺呢個屋苑,所以之前都有嚟過呢度,一次咁多啦... hahaha...

呢個商場嘅 Pekkle 擺設係立體造型,熱愛游泳嘅 Pekkle 衝緊浪,真係型到爆呀!


置富 Malls Ahiru No Pekkle 夏水禮 - 觀塘麗港城商場

如果唔係因為有 Pekkle 擺設,我唸我係完全冇機會踏足於麗港城商場...

麗港城商場係平面擺設,主題係雪糕屋.,.



置富 Malls Ahiru No Pekkle 夏水禮 - 紅磡置富都會

呢個暑假,相信一眾 Pekkle fans 都忙於港九新界周圍走,我當然都唔例外... 十二個參與活動商場之中,其中有八個商場都有 Pekkle 裝飾擺設,包括香港區嘅和富薈、九龍區嘅置富都會、麗港城商場、都會駅,同埋新界區嘅置富新一城、馬鞍山廣場、銀禧薈、置富嘉湖。

就等我由九龍區龍頭商場開始...

置富都會係立體擺設,主題係沙灘滑浪、日光浴...

Sunday, July 24, 2016

置富 Malls Ahiru No Pekkle 夏水禮開幕禮 - 攤位有獎遊戲〔限量版 Pekkle 膠扇及 Pekkle 貼紙〕

其實我最初覺得呢個開幕禮好似好無謂咁,所以都唸住唔參加... 好彩最終都係去咗,仲要好好彩一早就去到,結果就喺我閒逛打發時間之際,無意中發現有兩個有獎攤位遊戲,擺放咗喺開幕禮舞台嘅另一邊,咁我先可以有機會贏到限量版嘅 Pekkle 扇同埋 Pekkle 貼紙咋...


置富 Malls Ahiru No Pekkle 夏水禮限量版禮品 - Pekkle 冰袋

對於我嚟講,置富 Malls 呢個『Ahiru No Pekkle 夏水禮』最重之重嘅推廣活動,首推就梗係換領限量版禮物啦。

根據可靠消息,十二個參與活動嘅商場,可供換領嘅禮物都有數量限制,而最多數量嘅商場就係馬鞍山廣場,就係咁,我為咗換到心頭好,去咗呢個從未消費過嘅商場消費...

換領限量版禮物分兩個階段,每個階段嘅換領條件同埋禮物都唔同,首先第一次係 7 月份換嘅冰袋,唔知係唔係置富 Malls 少搞呢 d 推廣活動,由於我務必要換到 Pekkle 限量版精品,所以我都好小心咁事先向唔同嘅商場職員查詢,就連開幕禮當日,我都唔怕醜咁捉住在場嘅工作人員問換領詳情,結果每位職員所答嘅版本都有出入,搞到我非常惆悵...

為免到時換唔到會好失望,我唯有用咗個最『守規矩』〔即係跟足宣傳單張上嘅要求〕嘅方法去消費。我喺兩間唔同嘅舖頭用電子消費嘅方法買嘢,兩張單之中,其中一張係用咗 $500 或以上,而另外一張就係用 $100 或以上... 咁守規矩,梗係比我換到啦!^^

置富 Malls Ahiru No Pekkle 夏水禮 - 開幕禮

我好相信,今年嘅暑假,係一眾 Pekkle fans 最難忘嘅一年!由1990 年 Pekkle『出道』至今,我相信佢都未試過有今年咁『威風』嘅日子...

置富 Malls 市場部同事真係好有 taste,今年揀選咗 Pekkle 成為佢地旗下商場嘅暑期宣傳活動大使。不過因為咁,就令到我地一班 Pekkle fans『疲於奔命』,雖然係攰,不過都攰得嚟都好開心囉!

由置富 Malls 負責管理嘅屋苑、商場,遍佈於港、九、新界各地,而有份參與今次 Pekkle 推廣活動嘅商場一共有十二個,以新界區嘅商場為主,而當中八個場地仲有 Pekkle 美侖美奐嘅裝飾布置添。

為隆重其事,置富 Malls 今日喺紅磡都會搞咗個開幕禮,除咗邀請咗歌手陳柏宇〔我覺得應該請鄧麗欣比較洽當,因為 Stephy 都係 Pekkle fans 嚟嫁!〕出席之外,唔少得嘅梗係我地一班 Pekkle fans 最重視嘅 Pekkle『真身』啦!聽講話係專程由日本邀請 Pekkle 出席嫁!


Thursday, July 21, 2016

Pekkle 又上報紙喇

唔知係唔係有 Pekkle fans 加入咗置富 Malls 做高層呢?今年暑假,置富旗下八個商場,將會以 Pekkle 作為商場嘅主題公仔。今日,有關推廣活動仲喺頭條日報第 15 頁賣咗個四色全版廣告!勁呀!




記得 Pekkle 第一次上報紙已經係 2009 年11月嘅事,又係有關商場宣傳活動,當年係為咗慶祝 Sanrio 50 周年,地鐵旗下商場舉辦咗一連串嘅慶祝活動,雖然嗰次推廣活動並唔係以Pekkle 作主打,但係唔知係唔係地鐵公關嘅安排,多份報紙同時以專題形式,訪問咗當年嘅 Yahoo blog Pekkle fans group 龍頭 『喪 Vi』,因為『喪 Vi』嘅專題訪問,我當年都專登買咗份報紙,剪低留念...

http://www.pekkle.hk/2009/11/blog-post_29.html

而 Pekkle 第二次上報紙,就係有關一田購物優惠日嘅新聞,雖然嗰次上報唔係以 Pekkle 為主題,不過咁啱有兩幅相影到顧客爭相搶購 Pekkle 推廣產品〔包括床上用品同埋旅行喼〕。Pekkle 見報喎,點可以唔做剪報留低呀?

http://www.pekkle.hk/2012/05/pekkle.html

今次就係 Pekkle 第三次上報紙喇,亦都係 Pekkle 最叻叻嘅一次,因為除咗係全版彩色 Pekkle 廣告之外,仲有歌星陳柏宇同埋電視藝員陳庭欣伴住 Pekkle 出場喎,Pekkle 係唔係仲叻過啲明星先?

30/7, 31/7, 13/8 同埋 14/8 仲會有 Pekkle 限量精品換購,相信到時一眾 Pekkle fans 又會瘋狂搶購嫁喇... 希望到時可以順利換得到啦!

Tuesday, July 19, 2016

Sanrio characters 2015 年日版貼紙

上星期六行街,無意之中比我發現嘅日版貼紙,可能呢款貼紙已經出咗有一年時間,當我喺貨架上發現時,只係剩最後一張,店員亦都話已經冇哂存貨,可惜...

貼紙正面。日本貨即係日本貨,特別有 heart、特別精美,普普通通一張貼紙,都要喺右下角整個透明嘅『窗口位』,雖然冇乜大作用,不過呢啲咪就係日本貨主張嘅細緻/精美地方囉...


 
貼紙背面



因為係雜錦公仔款,整張貼紙只有兩個 Pekkle,不過我都好滿足嫁喇...





因為呢張貼紙係如假包換嘅日本貨,標明係 "Made in Japan" 之外,仲要係 "For sale in Japan only"... 張貼紙只係賣廿幾蚊,我就覺得值回票價喇!



Monday, July 18, 2016

草莓雜誌 - 2016 年 8 月號

2016 年 7 月 10 號出版嘅 8 月號 Sanrio 官方刊物草莓雜誌,今期嘅贈品係一把包咗膠嘅紙扇,共有五款選擇,而其中一款雜錦公仔,又有 Pekkle 份喇!正~~










雖然 Pekkle 只係好似粒豆豉咁嘅大細,但係好難得有 Pekkle 呀,又點可以錯過呢?^^



至於雜誌內頁,揭勻全本,只係搵得呢一幅圖有 Pekkle 囉,仲要係好似『幾千年』前嘅版本咁... 唔識睇日文,唔知講乜,不過既然有 Pekkle〔雖然係樣衰咗啲〕,點都要介紹下嘅...





『樣衰』版嘅 Pekkle,唔只 "封咗" 個咀角,個頭頂三條毛同個身形比例都好似出咗少少問題咁... 如果唔係喺草莓雜誌入面搵到,一定以為係老翻... =P