Tuesday, May 26, 2015

日本 Sanrio 2015 年最受歡迎卡通人物選舉 (Sanrio Character Ranking 2015)

眨下眼又一年喇,每年一度嘅日本 Sanrio 最受歡迎卡通人物選舉又開始接受投票喇!

今年嘅主題係 "海盜",所有『候選人』均裝扮成一個海盜嘅模樣,坐咗喺隻海盜船上嚟一張大合照...



宣傳版面上,Pekkle 尚且可以出現喺主角 My Melody 附近,不過當入到去投票嘅版面時,一艘海盜船就分為三艘,Pekkle 就被『迫遷』咗去左手邊嘅死角位處,好可憐呀!一定係上年 Pekkle 嘅排名較低嘅緣故啦!



投票形式與去年相若,都係要求投票人填寫基本嘅個人資料,每人每日只可以投同一位卡通人物一票,多過一次就會作廢。



今年 Pekkle 嘅『參選』編號係 56 號,希望佢今年嘅成績可以係頭二十名之內啦!

Thursday, May 21, 2015

一田購物優惠日 2015 (21/5/2015 - 25/5/2015)

半年一度嘅一田購物優惠日又開始喇!一如以往,我梗係第一時間睇下有冇 Pekkle 先啦!搵勻全份單張,就只有一樣貨品有 Pekkle,仲要係兩年前〔2013年11月〕已經推出過咗旅行喼,好失望囉....



等我搵日收工去巡一巡,睇下有冇咩『漏網之魚』先得~

Sunday, May 17, 2015

AEON 夏日大割引〔16/5/2015 - 20/5/2015〕

每年嘅五月同十一月,都係各大百貨公司做促銷嘅日子,千色店、Sogo、永安、先施、一田...等等輪住嚟減價,咁 AEON 又點會執輸呢?

睇到單張,今期促銷產品竟然有 Pekkle 新貨喎,唔買都要去捧下場啦!




其實呢 d 家居服,Pekkle 間唔中都會推出一、兩款,如果款款都買哂,就算唔破產,屋企要搵地方擺都難啦!所以我好『理智』地冇見一套、買一套嘅,就好似幾個月之前出嘅呢一款,因為覺得唔係咁特別,價錢又唔係好抵,短袖衫、短褲都要 $139 一套,所以結果我都係冇買到...



到今次促銷又推出咗另外一款,今次做特價 $100 一套,喺促銷期內仲照價有八折喎,幾十蚊一套衫,唔買又好似對唔住 Pekkle 咁,所以結果就帶咗佢番屋企喇!