Tuesday, May 25, 2010

日本 Sanrio 50 週年最受歡迎卡通人物選舉

日前無意中係一篇 Pekkle fans 既 blog 發現,原來日本 Sanrio 都趁住今年係佢地 50 週年慶典,舉行Sanrio 最受歡迎卡通人物選舉,連 Pekkle 都榜上有名呀!投票完畢之後,Sanrio 仲會免費送出 50 週年主題 wallpaper,有兩種 resolution 任揀嫁!





各位 Pekkle fans 踴躍 d,記住每日都上去呢個website,投票撐 Pekkle 啦!投票日由即日起至 6 月 15 日就會結束!反正都唔洗登記個人資料,大家記得盡你所能,係截止日期前,投得幾多票就投幾多票喇!正所謂『積少成多、聚沙成塔』嘛,Pekkle 最終能唔能夠入到三甲、將來仲有冇機會買到 Pekkle 日貨,就全靠大家既努力喇!


所有 Sanrio 既 "子民",記住要盡番 "公民責任" 去投票喇!有成 68 個 "候選人" 咁多比你地揀,呢個點都唔算係一個 "冇得揀選舉" 啦! 雖然我知大家都只會將你地既票,投比我地至愛既 Pekkle!!


記得啦!所有 Pekkle fans,記住將你寶貴及神聖既 "好多" 票,投比永遠 No. 1 既候選人 "Ahiru No Pekkle" 喇!


你今日投左未呀?


Sunday, May 2, 2010

Pekkle Shopping Day

完全係冇心理準備底下,隨意咁行左一轉瓊華,前前後後用左唔夠十分鐘,就洗左成 $500 買左一大袋 Pekkle 新貨,勞動節無啦啦變左 Pekkle Shopping Day 添...



雖然呢樣係全部貨品之中,單一貨品最貴既一樣,不過亦係我等到頸都長埋,都好希望佢有一日會出既大浴巾,既然依家真係出左,又點會錯過呢?



塊大浴巾有成 6 呎長,好大條嫁!仲有 Pekkle 既好朋友魚仔同 Pekkle 一齊係沙灘曬太陽、打沙灘排球,好靚、好得意呀!



Sanrio Puroland 20 周年紀念品,Pekkle 只係佔好少位置,而且仲幾貴添!不過咁難得 20 周年,係咁 "衣" 都買左 d 支持下既!


A4 Plastic folders,一共有三款,我只買左其中有 Pekkle 既兩款...



Memo pad 同貼紙,各有兩款,我都只係各買左一款咋...



雖然我冇帶鏡出街既習慣,不過呢塊鏡真係幾靚,而且手工係少有既細緻,都算係近期較有 heart 既作品,值得一讚!



都怪自己一見到大批 Pekkle 新貨就失左控,除左個 clear book 之外,其餘個單層 file 同文件袋,瓊華比 Sanrio Gift Gate 賣得仲要貴,雖然個標價只係幾毫子既差別,不過我仲有 Gift Gate 會員 discount 嫁嘛!實在買得太興奮喇,已經唔記得左 "平貨應該去番 Gift Gate 買" 呢個原則,結果買貴哂添...



必定會帶番公司用既 clear book,好實用!不過背頁 PK 造型既 Pekkle,大家覺唔覺得個 pat pat 唔多岩比例呢?個圓碌碌既 pat pat 好似大左好多咁喎....



唱片騎師造型既 Pekkle,仲要襯埋係我至愛既藍色 note book 上面,呢個 mouse pad 又靚又抵買!



之前都出過既風扇套 & NDS 筆,冇乜特別、對我黎講亦都冇乜用,不過又唔係貴,所以都一次過買埋...



大、細 size 記事簿,其實我應該唔會用,不過呢個消防員造型既 Pekkle 係我係呢批新貨之中,最鍾意既一個!從來未見過 Pekkle 既消防員 look,再加上可能自己對紀律部隊有 d 情意結,所以份外覺得呢個『消防 Pekkle』 look 好 smart,係我既至愛!



Pekkle 企係一架比佢個 size 仲要細小既消防車身旁,但係偏偏噴出黎既水注,竟然厲害到可以砌出 Pekkle 個名來!勁!



內頁分別有 Pekkle 駕駛消防車同埋滑鋼管既 "英姿",好型仔呀!



唔知大家又有冇留意到,個消防喉轆,係印有 Pekkle 個名既 initial,同埋佢既生日日期嫁! 


對於我黎講,呢個消防 look 造型真係好得!希望佢會用呢個 look 再推出其他產品啦!



勁買一輪之後,再殺左去 Gift Gate 價格,發覺仲有電風扇仔出左,唔知點解瓊華唔見有... 唔通賣哂?不過瓊華既人話,好快就會有 Pekkle 既雨具賣,今次仲唔只得縮骨遮,仲有長直遮添!對上一次出直遮,應該都係 2007 年 Manis (Ellon) 既出品,今次唔知係唔係 Gift Gate (Dainel & Co.) 出既呢?好期待呀! 不過相信到時又要大出血 lu....


Pekkle 口金包包

唔知係因為工作忙,定係因為 Yahoo blog 實在被太多 spammers 搞搞震,而令我寫少左好多 blog,唔經唔覺對上一次寫 blog,都已經係三個月之前既事喇!


我呢個 "反潮流" 既人士,直至最近收到個朋友親手造既 Pekkle 包包先知道,依家無啦啦又流行番係我媽咪果一輩已經好鍾意用既銀包,亦都係因為咁,令我再次 "的" 起心肝再 update 下呢個 blog!


朋友專程去搵左一塊 Pekkle 布,整好紙樣、就岩公仔既位置裁剪,再一針一線咁縫製成呢個口金包,勁靚呀!



對呢 d 手工藝一竅不通既我,實在無法去理解究竟要用幾多時間、精神先可以做到呢個包包;不過單係份心意,對我黎講,已經係無價寶!


過往呢位朋友已經親手做過好多 Pekkle 既精品比我,例如:Pekke 迷你十字繡八達通套Pekkle 摺紙公仔、Pekkle 水晶蠟燭等等... 不能盡錄。係呢度,我真係衷心多謝呢位朋友!多謝哂你呀!