Godiva 90 週年扭蛋吊飾及匙扣

有睇開我網誌嘅人，應該都知道除咗 Pekkle，我最大嘅興趣就係食，主力係朱古力同雪糕，所以，當我知道 Godiva 為咗慶祝九十週年而搞嘅推廣活動，又點會錯過呢？

要首先喺 Godiva 消費滿 $200 以上，就可以加 $30 換一個玩扭蛋嘅代幣，每個扭蛋均內藏一款製作精美嘅『Godiva 夏季系列甜點』吊飾，吊飾一套共有四款，儲齊四個吊飾〔不限款式〕，可憑換購扭蛋時附上嘅密碼紙，於網上登記後，就可到門市免費換取一個精緻嘅匙扣，可作扣上吊飾之用。

2016 年最新推出嘅夏季系列甜點 -- Duette。一共有兩款口味，識我嘅都知我當然係會選擇榛果蓉嗰款啦！榛果蓉朱古力醬流心蛋糕，蛋糕內有朱古力餡，配上 Godiva 黑朱古力軟雪糕口味，綴以香脆的巧克力餅乾碎或、濃郁的朱古力醬， 口感好似好豐富咁囉。不過，我就覺得呢款甜品唔係太合我口味，可能我唔太喜歡食蛋糕，加上呢個蛋糕係偏向有少少 muffin 嘅質地，唔夠幼細、軟熟，我只可以講呢款甜點並『唔係我杯茶』囉.... 不過，既然係 Godiva 嘅新產品，試一次都冇壞嘅...




湊夠 $200，即刻先換四個代幣啦！睇下自己有冇咁好彩，一抽四個即刻中哂四款，唔洗再嘥錢抽過...

連代幣都靚過人，印哂 Godiva 嘅 logo...



結果我都係玩咗兩次，扭咗八個扭蛋先可以儲齊一整套... 不幸中之大幸係，另外一套亦都只係重覆咗其中一款，仲要係我至愛嘅軟雪糕添〔無論係吊飾，或者實物，軟雪糕都係最得我心〕。



三個軟雪糕吊飾



兩個雪糕杯吊飾





兩個朱古力凍飲吊飾



一個 Duette 吊飾



八個吊飾嚟張大合照先



憑附上嘅密碼紙於網上登記，可於 Godiva 門市免費換取匙扣一個，個匙扣不比吊飾差，製作都一樣係非常精美。



盒面有熨金字及 logo，厚身絨面紙盒，連個盒都好『靚仔』呀...



將八個吊飾放番入盒內，整齊又美觀。雖然要用 $120 先可以換到四款吊飾，感覺上好似有啲貴，但係就細緻度、精美度去衡量嘅話，我就覺得物有所值囉。

7-11 日本北海道 3.5 特濃牛奶軟雪糕

之前睇雜誌介紹 7-11 軟雪糕回歸，仲要升格以北海道 3.5 特濃牛奶製造，我呢個雪糕怪當然唔會放過啦！




呢款重新回歸嘅軟雪糕，並唔係間間 7-11 有售，全港暫時應該只係得荃灣分店有售。





軟雪糕並無我想像之中咁好食，唔知點解總係食到有啲冰粒嘅感覺，所以唔係幾夠 creamy，牛奶味都唔算係特別濃郁，所以 $20 就覺得唔係太值，我寧願食 cha cha 嘅軟雪糕，起碼佢個性價比會 7-11 呢款高囉... 不過 7-11 呢個軟雪糕又唔係一無是處嘅，我幾欣賞個窩夫脆筒，個脆筒鬆脆可口，香甜不膩，比起個軟雪糕更加美味！

Haagen-Dazs Dark Chocolate and Almonds ice-cream

有睇開我 blog 嘅人，應該都知我係一個超級鍾意食黑朱古力同埋雪糕嘅人，而且以我自己嘅口味去揀，唯一可以加喺朱古力或者雪糕入面嘅材料，就只有果仁。所以我無論係食黑朱古力，抑或係食雪糕，一係就淨食，一係就只可以加果仁，其他食材免問... 而今次 Haagen-Dazs 呢款新口味，正正集合哂我至愛嘅食材於一身，咁又點可以唔試呀？: )

其實較早之前，已經喺 Haagen-Dazs 嘅專門店嚐過，當時覺得『驚為天人』，所以當我之後喺超市見到，就即刻急不及待入貨...



相比之下，專門店嘅雪糕質素較為出色，除咗朱古力味較為濃香之外，入面嘅杏仁碎嘅分別就最大。專門店所售賣嘅黑朱古力杏仁雪糕內嘅杏仁片，片片都係好脆、好香口，食完係有好香嘅杏仁味，而家庭裝明顯就係『技遜一籌』囉...

 

 

濃香嘅黑朱古力雪糕之中，除咗加入杏仁片之外，仲有朱古力碎，雙重朱古力口感，對於我呢個黑朱古力癡嚟講，無異就係加多一重吸引力，以六、七十蚊嘅價錢就可以食到呢個質素嘅雪糕，都算係物超所值... ^^

一田購物優惠日 2014 (22/5/2014 - 26/5/2014)

2014 年嘅一田購物優惠日已定於 5 月 22 日〔下星期四〕舉行。呢個每半年一次嘅『盛事』，勢必引嚟哄動，而基本上，每次首日開賣，都總會吸引過百人喺門口排隊，等候搶購當日嘅限售精選貨品，好幾次仲因為場面太過墟冚，而搞到上報紙頭條，連電視節目都有報導...



今年一收到傳單，一如以往，梗係第一時間搵下有冇 Pekkle 嘅特價品啦。點知今年竟然係一樣都冇喎... 好唔開心囉！近幾年每次都總會有 Pekkle 嘅新貨 / 限量品促銷，但係今次一樣都冇，真係好失望呀！睇嚟今年都唔洗再迫入去 "搶" 購喇... =(

Phantom Pekkle 『重出江湖』....

喺過去嘅兩個幾月入面，雖然我唔知有冇人掛住 Phantom Pekkle，不過我就好掛住一班 Pekkle blog 友喇！只係... 懶筋實在係難除，一日唔到死線，一日都懶懶閒冇理到呢個新 blog... hahaha...

時間一日一日咁過去，無論幾咁懶散嘅我，由於 Yahoo blog 死線已經燒到埋身，我都冇辦法唔去完成埋呢個手尾... 所以，終於喺 2013 年完結之前，我『重出江湖』喇！不過，我仲未好熟悉呢個 blog 嘅 setting 同運作，我唸我要用少少時間了解一下，先可以真真正正咁回歸『blog 界』，大家等我喇~~

祝大家 2014 年日日都開開心心~~

Haagen-Dazs Royal Dessert 法式蜜語雪糕蛋糕

尋日行過一田超市，見到做緊雪糕展，而 Haggen-Dazs 嘅 counter 例牌吸引一大班顧客圍住，原本都冇唸住迫埋去，但係『獨家限定』呢幾隻字吸引咗我眼球，結果就迫咗埋去睇下係咩新產品，原來係雪糕蛋糕，其實之前都食過 Haggen-Dazs 嘅雪糕蛋糕，不過就係好似兩磅裝生日蛋糕咁又大又圓，呢款係迷你版，見都唔係好貴，包裝又精美，所以就買咗嚟試下...

個盒都好似好 grand 咁...



個盒入面仲印埋處理乾冰嘅注意事項，又幾貼心咁喎...

輪到個『主角』出場，呢款迷你版雪糕蛋糕共有兩款口味，比利時朱古力雪糕蛋糕及士多啤梨雪糕蛋糕...




個人覺得，呢款雪糕蛋糕個樣都算係咁，不過講到味道... 雪糕本身係冇問題嘅，不過個蛋糕就真係麻麻地囉，好『口鞋』口同埋好實呀...

不過如果你係 Haagen-Dazs 嘅 fans，一試亦無妨。

Godiva 朱古力軟雪糕

有睇開呢個 blog 嘅人，都應該知道我不下數次喺 blog 提過，自己係好鍾意食朱古力同埋雪糕，既然係咁，Godiva 最新推出嘅朱古力味軟雪糕，我又點會錯過呢？





幅相嘅效果當然係比實物『靚仔』好多啦！

啱啱『唧』好嘅效果都算係咁，都叫做有番個形睇下...





但係當拎上手之後，行出舖頭都未夠一分鐘，個軟雪糕已經開始溶，個形狀都塌哂落嚟...




我覺得呢個朱古力軟雪糕都幾好食，朱古力味都算係夠濃郁，軟雪糕嘅質感亦都算好，香滑有奶味，而個混有朱古力脆米嘅雪糕筒，更加係意料之外嘅香脆可口，再加埋一片薄薄嘅 Godiva 朱古力片，我覺得呢個軟雪糕算係物超所值嘅！

可惜依家只限於 IFC 同海港城分店有售，如果全線 Godiva 分店都有得賣嘅話，就更加方便我呢個為食鬼隨時都可以買嚟食啦！

全城 "趕" 鴨潮 - 黃色巨鴨 Rubber Duck

呢期有邊個香港人未聽過呢隻黃色巨鴨 Rubber Duck？我都係香港人，當然都抗拒唔到呢隻可愛黃鴨鴨嘅吸引力啦~

zoom 近少少，喺 IFC、中銀大廈、同埋渡海小輪襯托之下，呢隻鴨鴨係唔係好有 "香港特色" 呢？

原本唸住去地面同 d 小鴨鴨影相，可惜當時嘅遊人實在太多，舉步維艱，連想行落一級樓梯都行唔到呀！

喺樓梯頂影落去，人潮密密麻麻咁，感覺上比睇聖誕燈飾嘅人潮仲要多...  眼利嘅人，大概都可以係人潮之中，睇到點點黃色，嗰度就係小鴨鴨嘅位置，可惜只係望得到、去唔到...

雖然唔可以近距離咁同小鴨鴨影相係有 D 可惜，不過可以清楚咁影到黃巨鴨，都已經好滿足嫁喇~~

Awfully Chocolate 最新 prepacked 系列

睇開我個 blog 嘅人應該都知道，除左 Pekkle 之外，朱古力同雪糕都係我寫 blog 嘅主要題材。

今次要講嘅係最新推出，OK 便利店獨家發售嘅 Awfully Chocolate 系列 -- 排裝朱古力同朱古力曲奇。

排裝朱古力共有三款口味，而曲奇就有兩款。

由於我個人比較老土，冇乜『勇氣』試新嘢，所以喺三款排裝朱古力之中，我只買咗其中兩款，冇買到海盬焦糖牛奶朱古力。





朱古力入口尚算幼滑，雖然個人嚟講都幾鍾意食果仁，不過單以呢兩款朱古力嘅味道去評，我就比較喜歡香濃軟心黑朱古力嗰款，因為在於我嚟講，香滑榛子蓉黑朱古力嘅味道都略嫌稍稍偏甜，而且始終都係有榛子蓉夾心，所以食落就冇軟心黑朱古力咁幼滑囉！





兩款曲奇都係以朱古力碎作主打，分別只在於我買咗呢款就係『雙重』朱古力，除咗有朱古力碎之外，連曲奇餅本身都係朱古力味，雙重朱古力，雙重口感...

總括嚟講，以咁相宜嘅價錢，又好難要求有好超卓嘅質素，只可以話都食得過囉。不過當初之所以會買呢個系列去試，除左因為係朱古力之外，好大程度都係因為佢嘅 package，貫徹專門店以黑白色 minimalism 嘅風格，去設計呢個系列嘅包裝，仲要擺係貨架當眼嘅位置，又的確係好引人注意嘅。

姑勿論個質素如何，我覺得以市場學嘅角度去睇，以 Awfully chocolate 本身嘅品牌效應、合理嘅售價，再加上出色嘅 package，都已經夠哂 gimmick，踏出咗成功嘅第一步。