Monday, October 27, 2008

雪糕與冰袋...

前幾日睇到 Korean Pekkle 既 blog,話佢為左拎到佢夢寐以求既 Haagen Dazs 冰袋,竟然一口氣買左六盒家庭裝雪糕番屋企自己食,我.. 好感動呀!終於都搵到個比我更加喪既人喇!所以忍唔住要寫番篇 blog 回應一下....


記得好耐之前見到 Haagen Dazs 既冰袋,覺得好靚好實用,就係咁... 我就踏上左我既〝不歸路〞....


呢個就係我第一個擁有既 Haagen Dazs 冰袋,無論質地、設計同外型,都比依家既冰袋好好多嫁,大家可以比較一下.....



左邊係第一代既冰袋,右邊既係比較近期既款式〔不過同 Korean Pekkle 岩岩買到既,好似又有 d 分別喎,係唔係又係時候去買多一個呢?〕左邊果個挺身好多,好硬淨,手抽位又做得好 details,而且內籠既質地係厚身好多嫁!好明顯可以睇到右手邊比較近期果款係好軟身,冇擺野入冰袋時,根本係企唔到起身嫁!



如果只得呢兩個,就唔可以叫做踏上左〝不歸路〞啦!



唔計其他途徑拎到既冰袋,單單係因為買雪糕而拎到既冰袋,我都已經有七個〔因為太多同款,所以我將其中一個 Haagen Dazs 既冰袋送左比我家姐〕,除左呢 d 唔洗錢既冰袋之外,我都有一個係用錢買番黎既!唔洗多講,要用錢買 d 咁〝唔等洗〞既野,就梗係 Pekkle 啦!


呢個係 2004 年 Ellon 出既 Pekkle 保溫袋〔個袋宣稱可以保暖同保冷兩用喎〕,記得當初岩岩出時,我係嫌佢太硬身、好阻地方,又唔可以孭出街,所以我根本都冇買到,係相隔左一年左右,無意中係大眾書局比我見到佢,當時應該係做緊八折,心唸唔用當係收藏都好!就係咁,我就帶左佢番屋企!係影呢幅相之前,我真係冇拆開過佢嫁...



目前為止,Movenpick 既冰袋將會係我下一個目標,相信係不久既將來,我一定會帶埋佢番屋企...


Sunday, October 26, 2008

北海道拉麵店 --- 山頭火

今日終於都〝的〞起心肝去試下呢間北海道人氣拉麵店 --- 山頭火 其實之前都已經黎過兩次,可惜兩次都因為太多人等位,結果中途放棄左!



付出左四十五分鐘係門口排隊等食既時間,終於都有位喇.... 一行兩人被編排坐 bar 檯位,整間舖面積不大,好彩 bar 檯位設計得唔錯,所以就算坐 bar 檯位,都算係舒適既....


半開放式既廚房清楚見到煙霧迷漫,幾位廚師都忙得氹氹轉,可幸抽風系統好好,雖然『熱氣騰騰』,對餐廳範圍完全無影響...



一客蟹肉定食,價值 $85... 定食包括半隻蛋既前菜、一碗細既豉油拉麵〔左〕加一碗蟹肉飯〔右〕...



一客鹽味豬頸肉叉燒拉麵,價值 $98



食味係好個人既,所以好唔好食就見仁見智啦!不過以個人既標準黎講,d 拉麵煮得太過彈牙喇!好似有 d 未煮熟既感覺,只好怪自己落 order 時冇講清楚麵既軟硬程度啦!


事先聲明,本人唔係太喜歡食日本菜,所以覺得以咁既價錢,食 d 咁既質素既拉麵,我就覺得唔係好值得囉!


Saturday, October 25, 2008

2009 年 Pekkle Datebook

尋日收到雪藍既第一手消息留言,知道 Pekkle 出左 datebook,後來先發現原來今次應該係另一位 Pekkle blog 友甜姐儀更早發現,你地真係勁呀!經常都會有第一手資料!


記得上年既 Datebook 都只係賣 $6.9,相信今年價錢應該都係差不多,所以都冇唸過出去旺角買,因為以咁既價錢睇黎,相信我一來一回既車費都補唔番平左果少少錢.... 就係咁,我今日就去左公司附近既商務買,原價 $7,依家做緊九折,所以都係 $6.3 一本姐!好抵買呀!


今年首次出既 Pekkle 座檯月曆,都係用左呢種 font type,個人黎講,我唔係咁鍾意呢種字型,總係覺得唔夠得意、唔夠靚,襯唔起 Pekkle!



其實無論係字體定設計,我都係覺得舊年果本 datebook 靚 d... 不過咁,我唔敢太過奢求,只要 Pekkle 能夠繼續每年都出 datebook,我都會好滿足嫁喇!



Sunday, October 19, 2008

Pekkle 毛毛仔公仔 2009 年座檯月曆

相信眾多 Pekkle blog 友一早已經買左呢個 2009 年座檯月曆,由於之前有太多〝唔愉快〞既經歷,所以今次都冇專程飛出旺角買,亦都係因為咁,睇到喪 Vi 篇兵鴨俑,我先可以知道今次竟然係口水佬間舖比美寶賣得平,佢仲拍哂心口咁話:大把貨!叫我地成班『鴨會社團』快 d 去掃貨!..... 就憑呢句說話令我安心不少,因為起碼封左我〝撲個空,失望而回〞之門先啦..

星期六下晝兩點幾去到,好好彩口水佬唔係舖,唔洗同佢 social,連個女仔都唔見,換黎既係一位大約二十歲,傻更更既後生仔,以下係我地既對話....

後生仔:要 d 乜?
我:有冇鴨仔公仔月曆?
後生仔: 你講果個呀?
當時佢指住地下,擺左一個 Hello Kitty 同 Kerokerokeroppi 既公仔月曆...
我:邊度有鴨仔呀?
後生仔:呢度囉.....
我:下.... 唔見喎....
後生仔:呀.... 唔係,擺在係門口出面先真.... 不過即係呢 d 同款囉...
跟住佢係門口 d 箱拎左個 Pekkle 入黎...
後生仔:得番最後一個咋....〔又話大把貨既?!仲好意思誇下海口叫我地班『鴨會社團』黎掃貨?只要行慢一步,相信我都要空手而回呀!
我:幾錢呀?
佢用 barcode reader 掃左一下,就話:$79 啦!
我:下?$79?乜唔係 $75 咩?
後生仔:係?佢賣開 $75 嫁?我唔知呀!佢係唔係比左九五折你呀?
我:點知呀!總之係買開 $75 啦!
後生仔:哦!咁我照賣番 $75 比你啦!

就係咁,我以七五折既價錢〔係 Gift Gate 正價賣 $99.9 一個〕帶左 Pekkle 番屋企 lu...




跟住順道問埋後生仔有冇 Pekkle 拉鍊袋賣,佢搵完一輪之後,話得番 display 一套,仲要係大既賣 $18、細既 $14.... 梗係唔幫佢買啦!結果我以每個平兩蚊既價錢,過左隔離美寶買!



最後仲去多一次油蔴地,因為上次入唔到懷古角行,唸住今次可以入舖行下,睇下有冇 D 咩漏網之魚冇買到。結果比我見到雪藍上次買左既 Pekkle 布章,仲要係最後兩個添....


之前聽其他去懷古角既 blog 友講,話好人伯伯坐地起價,將 d 貨 set 高左個價錢,我今次去到專登 check 番同款貨品既價錢,發覺價錢同我買時係一樣嫁喎,會唔會只係伯伯計錯左錢,而唔係坐地起價呢


Sunday, October 12, 2008

化悲憤為食量...

今日諸事不順,唯有寄情飲食...  


果然係衰開有條路.... 離開旺角呢個『傷心地』之後,唸住去油蔴地橫綱拉麵食 lunch,點知條龍長到嚇死人,望一望鐘已經兩點幾三點喇喎,唔係咁搞法下嘛?!心唸等到有位時,係唔係都差不多到食晚飯既時間呢?  結果走左去眾坊街既美都餐室...



之前都黎過幾次,不過都係以食 tea 飲杯蓮子紅豆冰或多士呢類輕食為主,今次食 lunch,梗係要叫 d 唔同既食物試下啦!唔知係因為個知名度?物價高漲?太耐冇幫襯?定係『食米唔知價』既關係?以佢位處廟街一帶既茶餐廳格局黎講,一 d 都唔算平,普普通通一碟意大利粉都已經要四十幾五十蚊,結果我係選擇左一碗湯麵加我既至愛駌鴦冰,同行友人就揀左馳名既焗排骨飯加可樂...



之前都講過,口味呢家野比較主觀,所以唔講食物質素,只講消費,隨便一個午餐,冇加一都已經要一百七十幾蚊,值唔值得就見仁見智啦!


不過呢個地方有一樣野反而好吸引我,就係一張設計特別既〝嚴禁吸煙〞告示,BB 趣緻可愛,以禁煙提示帶出埋呢間老店既招牌貨 ---- 駌鴦冰,我覺得好有創意,tailor made 得黎,又唔會覺得佢太 hard sell,呢張 poster 既構思,值得一讚!! 其實我一坐低就已經比呢張 poster 吸引住!BB 個樣 cute 到震,再加埋句 slogan:不愛煙、我愛駌鴦冰。雖然就唔係好押韻,不過都叫做『活化』左〝嚴禁吸煙〞呢 d 告示,亦收到宣傳之效,一舉兩得!正!



因為今日連食野都唔係好順利,所以決定化悲憤為食量,再戰新港中心既吐司工房!!怨氣攻心既關係,一早已將〝肥〞同〝健康飲食〞呢 d 規條拋諸腦後....


一件花生醬厚吐司、一件西多士、一杯美祿恐龍同一杯好立克恐龍...



值得一讚既係佢地將 d 吐司切成 bite size,方便客人食用,價錢亦唔貴,可以話幾超值添!所以縱使個食味普通,我都覺得自己冇白行一趟既!


難以理解的執著...

趁今日星期六唔洗番工,又要出動搵鴨喇!個幾星期前,從 blog 友雪藍留言得知,我地一眾 Pekkle fans 等到頸都長埋,係 Gift Gate 2008 年 catalogue 中,最後一樣新推出既 Pekkle 精品 ---- 文件網袋,終於都出左喇!


係短短呢個幾星期,不論親身、打電話、托人代買.... 加加埋埋都應該有六、七次唸住到瓊華入貨,可惜次次都係失望而回,今日... 我再親身到美寶一趟,結果... 依然係令我失望既...


曾經有朋友話我,係某 d 事情上面,有著『難以理解的執著』既態度,本來我一向都唔會承認... 今日之後,真係唔到自己唔承認呢種『怪』性格... 成日流流長,我行過唔少精品店、文具店、百貨公司,其實都見到 Pekkle 呢個文件袋,唔知點解就係狠下心腸,見到都一樣唔肯買,似乎誓要到瓊華買不可... 其實我根本連美寶會賣幾錢都唔知,再加埋出去既車錢,可能比係 Gift Gate 買仲要貴,都唔明點解自己偏偏會咁執著... 就連自己都覺得有 d 迷茫...


買唔到文件袋,轉戰新之城,唸住整番個 Pekkle 水晶果凍蠟燭... 點知... 又再黎多一次空手而回.... 去到鋪頭時,係星期六下晝點幾兩點既時間,人流最多既時候竟然都冇開門?!唔係下化?



帶住失望既心情,行左去先達 3/F,記得之前係呢度見過有專賣絕版 Sanrio 精品既鋪頭... 天呀!又食閉門羹!!洗唔洗黑仔成咁呢?連中三元... 我... 係唔係應該去買六合彩呢?



唉.... 唔通.... 我同 Pekkle 既緣份已盡....