Saturday, October 4, 2008

Pekkle 最新產品

係上個月尾已經知道有 Pekkle 畢業公仔出左,不過一向唔儲毛公仔既我,其實本來都冇打算買,所以都冇深究過瓊華有冇番貨.... 直至最近,知道 Pekkle 先後出左座檯月曆同 Schedule book,呢兩樣野係我近期最期待既 Pekkle products,一知道出左,當然二話不說就去瓊華入貨,可惜無論親身去定打電話問,都係空手而回!!眼見一位又一位既 Pekkle fans 都入左貨,令我更加如熱鍋上既螞蟻..... 所以都唸住去 Gift Gate 買就算,點知係最後一次打電話去瓊華 check 貨時,老闆娘話會以大概七五折既價錢賣呢 d 新 products 比我地一班 Pekkle fans,以慰我地等貨等到頸都長之苦.... 一聽到呢個價錢,我又打消左去 Gift Gate 入貨既念頭,乖乖等瓊華番貨...


終於係 2/10 星期四晚,打電話去瓊華 check 知道番左貨,本來唸住等星期六假期先出去買,但係驚到時又比人賣哂,結果係星期五利用個零鐘既 lunch hour,飛撲去旺角入貨,呢 d 就係我當日掃左既貨...


原本冇打算買畢業公仔既我,因為 blog 友 Korean Pekkle 既一句說話,再加上〝山長水遠〞咁去到,唔買又好似好蝕底既情況下,都係買左....



以我所知,除左老翻之外,呢個係 Pekkle 出世咁耐以黎,首次出既座檯月曆,咁難得,梗係要買多幾個啦!



兩本 Schedule book... 學 blog 友雪藍話齌,以 Pekkle 過往出過既三本 schedule book 黎講,2008 年果本係比較靚,不過都係忍唔住,買多一本黎儲...




唔知各位 Pekkle blog 友,有冇發現係座檯月曆入面,7 月 27 日呢一日係有個 Pekkle icon,提醒大家果日就係 Pekkle 既大日子呢?



因為真係好抵,再買多兩樣野送比人....



係買野時,發生左兩個小插曲....


〔插曲一〕係我同老闆咋型話成日都冇貨既時候,老闆忍唔住話估唔到我地成班 Pekkle fans 咁狂,一番貨轉眼就已經賣哂,佢仲話 schedule book 出時仲誇,有個 fans 一掃就掃左十本,仲要派人黎代佢買,嚇左老闆一跳,佢仲話估唔到我地班 fans 會癲成咁.... 我當時心中有數,已經知道老闆口中呢位〝狂人〞係邊個啦!


〔插曲二〕因為老闆仲未番拉鍊袋,為左唔想再出旺角問貨,就過左隔離睇下,係搵緊既時候,我之前話成日扮 friend、專講爛 gag 既老闆走出黎係咁〝裝〞我袋戰利品,仲要套我口風問我 d 野買左幾錢,跟住又同我講鴨仔番左新既拉鍊袋,我一聽到佢咁講,眼睛立刻發光,唸住叫佢拎貨,點知佢又同我講:岩岩賣哂喇!要訂貨呀!

....  即係廢話啦!等我又空歡喜一場...


今晚打電話去瓊華 check 過,老闆話拉鍊袋應該要星期二、三先有貨....依家唯有耐心等待,希望可以快 d 入到貨啦!


No comments:

Post a Comment