Wednesday, August 27, 2008

大嶼山聖母神樂院曲奇餅

大嶼山聖母神樂院,一個好似好陌生既名字,其實呢間神樂院亦即係十字牌牛奶既〝原產地〞〔牛奶業務現時已經易手〕,十字牌牛奶相信都冇乜人唔識,仲係由細飲到大果隻添!一路以黎,都唔知原來神樂院都仲有自家製既曲奇餅....


到目前為止,我都唔清楚神樂院既正確位置係邊度,不過要買呢 d 神父親手製既曲奇餅,又唔洗一定入到去大嶼山既。之前睇飲食男女知道,呢 d 曲奇餅可以經油蔴地一間教會書舍代訂。為食既我,當然唔會錯過呢個機會啦!大概兩個多月前既一個星期六上晝,親身去到呢間書舍預訂,取貨期係三個月後既事!! 書店店主仲好有禮貌咁同我講:下次唔洗親身上黎嫁!打電話都可以預訂!


就係上個星期,收到呢位店主既電話,話預訂既曲奇餅已經有貨,可以隨時上書舍取餅!


唔好期望會有咩美輪美奐既包裝,但係我反而喜歡佢既設計簡單而樸實無華,貫徹神樂院為靜修地方既形象!


盒面〔藍天綠草襯托神樂院,感覺舒服、詳和〕



盒底〔印有神樂院簡介,中英對照〕



一盒共有二十四小包,每包共有三片,獨立包裝,方便衛生。



嚴格上,個人覺得呢 d 都唔算係曲奇餅,因為曲奇餅應該係以牛油為主,有好重既牛油羶香;而呢種餅比我既感覺,係好鬆脆、香香甜甜咁,食完一 d 都唔會覺得油膩,感覺似食緊茶餅多 d。兩個字總結:好味!


可能由於自己由細到大都係讀天主教學校,少不免對教會有 d 情意結,再加上係神父親手每日限量新鮮製造既關係,我覺得可以食到呢盒餅,真係等幾耐都係值得既!


1 comment:

  1. 聽落味道應該都幾似馬利餅呢!
    [版主回覆09/01/2008 11:40:00]多謝留言。原則上都幾似既.... 不過呢 d『曲奇餅』就比馬利餅更加鬆脆囉....

    ReplyDelete