富豪雪糕車

自從番左呢份工之後，係午膳時間，間中都會停左架富豪雪糕車係公司附近，不過礙於好多因素，咁多年黎都未幫襯過。係大概年半前，停泊雪糕車既位置，進行左一個大規模既修路工程，加上有一條專線小巴既加入，我已經再冇見過富豪雪糕車既蹤影...

道路維修工程終於都係上星期尾完成，就係尋日，熟悉既富豪雪糕車又再出現係同一個位置！當時心唸：可惜依家番緊工，如果係屋企見到你，我一定會幫襯.... 就係咁，我同富豪雪糕車又再一次〝擦身而過〞.....

當晚，正安坐家中等待食晚飯期間，耳邊又傳出一陣陣熟悉既音樂聲..... 探頭外望，竟然真係有架富豪雪糕車停泊左係度，唸一唸，搬入黎呢度都已經有七年幾，從未見過有雪糕車入黎.... 心中不禁唸：唔通個天真係聽到我今日晏晝講既野？ 如果真係咁，我更加冇理由一再推卻上天〝善意〞既安排卦？！ 所以唔理係唔係要食飯，都一個箭步就衝左落街買.....

究竟幾耐冇食過富豪既軟雪糕呢？我唸最少都有十年.... 已經唔記得當年既售價，不過以依家賣七蚊一杯睇黎，應該都係以倍數增長左！不過鬼叫依家潮流興〝集體回憶〞咩？我都要趁下熱鬧、支持一下既！

個賣相麻麻地....食味又唔係咁好，而且以咁既價錢，其實可以話唔值！不過加埋份童年回憶係入面呢？就變左無價囉！

咁難得比我遇到架雪糕車，無理由只係食一個軟雪糕咁少嫁嘛，點都要買番 D 野既！睇個價目表，有樣叫〝珍寶橙冰杯〞，相信係類似 sorbet 既野，本來想買，點知話賣哂！唯有退而求其次，買左甜筒囉！一共有三種味：雲呢拿、朱古力同蜜瓜，覺得蜜瓜味好似好怪咁，所以只係買左前兩款，依家都仲未食，唔知食味會唔會有驚喜呢？