Cookies Quartet

開左業都有三、四個月既 Cookies Quartet，係明星同名廚效應下，一直都好想買黎試下，農曆年前曾經到過呢間曲奇店，可惜當時佢地話因為近新年，所以只有禮盒裝出售，不設散賣。不過就好大方咁擺左幾個大玻璃樽既曲奇比顧客試食，當時試過一片，覺得都唔錯，不過驚其他款唔岩食，所以唔想買一盒咁多，唯有等過左農曆再黎過....

終於係上星期六有時間再去 Cookies Quartet，果然見到有包裝發售，每包售價 $48 - $58，視乎 cookies 種類而定。原本唸住買朱古力味既散裝 cookies，可惜賣哂，唯有買一包此店馳名既蝴蝶酥，唸住下次先再買其他，不過唸唸下，專登黎到呢度，冇理由只係買一包蝴蝶酥，結果始終都係買左一盒裝既什錦 cookies....

蝴蝶酥一包 12 片，$38。包裝抄足 agnes b.  既曲奇，不過不失啦！

什錦曲奇，一盒九款，$138。我幾鍾意個包裝，簡單得黎，又有少少貴氣咁...

計埋蝴蝶酥，此店共有十款曲奇。

總括黎講，蝴蝶酥確係幾鬆脆，不過純粹個人口味以言，就覺得如果甜度加強番少少就更加完美！至於 cookies，有果仁餡既 cookies 比較岩自己口味。至於我最愛、最有期待既朱古力曲奇，就難免有少少失望！可能期望太高啦！我覺得朱古力既味道尚未夠濃，同有少少偏甜左，雖然都好脆口，不過 cookies 太細片同太薄身，食完好似得陣 "風" 咁，回味唔到朱古力既感覺囉...

i-Scream Gelato Art

無寫 blog 已經有一段日子喇！因為始終都想呢個 blog 係以寫 Pekkle 為主，不過最近 Pekkle 又真係冇乜野可以寫... 為左唔想同一班 "鴨會社團" 既人減少接觸，唯為寫住其他野先啦！而我呢個 blog，除左寫 Pekkle，不外乎都係寫食既姐....

今次同大家介紹一間我已經幫襯左有一段日子既意大利雪糕店 ---  i-Scream，以前佢只得金鐘太古廣場一間店，後來開多左間係中環 IFC，對於我呢個鄉下人黎講，真係非常之唔就腳，所以都唔係經常可以食得到.... 不過皇天不負有心人，終於都等到係沙田開佢既第三間分店，好可惜，我等左佢差不多都有一年喇！沙田分店始終都係冇引入我既至愛口味 ---- 黑朱古力，所以要食 i-Scream，我仍舊係會選擇係 PP 或者 IFC...

幫襯左都有好幾次，不過一次都未試過佢既 Gelato Art，今次即管就玩下喇！

嘩... 我至愛既黑朱古力呀~~

先揀雪糕球同配料....

好！Gelato Art 開 show！其實即係炒雪糕囉....個名懶好聽咁咋嘛...

炒完~

炒完之後，再加埋朱古力醬... 正！因為炒完之後又要搵地方影相，睇起黎好似好溶咁，其實炒完都仲 ok 既....

係 i-Scream 食既炒雪糕同係 Scoop 既差不多，不過 i-Scream 就有我至愛既黑朱古力，而且 d 配料都落得幾重手，一 d 都唔吝嗇，而 Scoop 既好處就係連裝雪糕個杯都係 ice-cream cone 黎既，即係可以食埋落肚，而且價錢都比 i-Scream 平囉.... 各有各好啦！

希望沙田分店可以快 d 引入黑朱古力雪糕，咁我就可以幾時食都得啦~

Pekkle 手信

唔經唔覺，正月都過左十五日，做學生既應該都開哂學；做野既應該都開哂工喇？友人趁農曆新年假外遊返港，帶來意想不到既手信...

當拆開呢份禮物既時候，真係驚訝到 O 哂咀，雖然都知應該係老翻，但係點都估唔到係呢個地方，都會有 Pekkle 既蹤影囉...

Pekkle 電子膠錶〔外殼〕...

Pekkle 電子膠錶〔內籠〕...

呢隻膠錶價值兩萬大元，我姑且唔講貨幣單位係乜，就作為係今日呢個牛年元宵佳節，比大家動動腦筋既機會，當係猜『燈謎』咁猜啦！ 唔知大家又估唔估到折合左港幣大概係幾多錢呢？〔事先聲明：估中都唔會有獎嫁！〕

趁依家都仲係元宵佳節，係呢度衷心祝送呢隻手錶比我既人同埋大家永遠都開開心心、甜甜蜜蜜！！

*********************************************************************************************

後記〔2 月 14 號情人節〕

個燈謎既然係元宵佳節出，個謎底梗係要係情人節揭盅啦！ 答案我唸無人會估得到，就係越南呀！呢隻錶價值兩萬越南盾，即係折合港幣九蚊都唔洗呀！！係唔係好抵呢？

祝各位情人節快樂！！

賀年糕點

今日係年初七人日，首先係度同大家〔包括我自己 〕講聲生日快樂先！

我唔似得一眾 Pekkle fans 咁叻，既入得廚房、又出得廳堂，廚房對我黎講，除左係去開雪櫃拎野食之外，基本上都好難令我會行入去.... 雖然唔識整野食，但偏偏又好鍾意食，既然唔可以好似其他 fans 咁親自整賀年糕點，唯有買現成嫁啦！其中美心集團既翠園蘿蔔糕係我每年必買既賀年糕點，起碼十年以上無間斷咁幫襯。唔可以話佢係特別好食，不過佢既質素就夠哂穩定，咁多年以黎，雖然唔會有大驚喜，不過亦都唔會令你失望同嫌棄既....

唔知點解牛年好似特別旺糕點咁，除左每年必有一底既翠園蘿蔔糕之外，仲有隔離鄰舍自己整既蘿蔔糕三底，再加埋朋友送既利苑，行街見囍宴擺 counter 時，又忍唔住買左一底黎試，最後因為 "十勝紅豆" 呢幾個字，再買盒試食... 結果屋企個雪櫃係同一時間，一共有七底賀年糕點....

被米芝蓮評為一星級既利苑，佢地既蘿蔔糕包裝就夠哂揼本喇！可惜食味就好一般囉！材料唔夠多已經算，唔知係因為整時蒸得唔夠透，抑或係粉太多，食起上黎時，都相當漿口，難免有 d 失望....

買呢盒蘿蔔糕既原因，唔多唔少都係因為睇在薄有名氣既囍宴老闆 Jacky Yu 份上，當時佢仲係親自係 counter 做示範，見佢咁 nice，加上示範煎糕時都算香味四溢，就係咁，又買左一底帶番屋企喇！個人認為，無論係用料或質感，佢既蘿蔔糕都係比利苑出色既....

波折重重，好唔容易先可以買到既 "十勝紅豆金栗糕"，可惜又係衰在自己對 "紅豆" 既情意結太大啦！其實都未至於難食既，不過就係因為期望越大、所以失望越大囉....  

唔知各位 blog 友今年又食左幾多糕點呢？有冇我咁勁先？

2009 年〔己丑年〕快樂

                        

祝大家牛年進步、心想事成！！

最緊要就係身體健康！！

恭喜！恭喜！