今次要講嘅係最新推出，OK 便利店獨家發售嘅 Awfully Chocolate 系列 -- 排裝朱古力同朱古力曲奇。
排裝朱古力共有三款口味，而曲奇就有兩款。
由於我個人比較老土，冇乜『勇氣』試新嘢，所以喺三款排裝朱古力之中，我只買咗其中兩款，冇買到海盬焦糖牛奶朱古力。
朱古力入口尚算幼滑，雖然個人嚟講都幾鍾意食果仁，不過單以呢兩款朱古力嘅味道去評，我就比較喜歡香濃軟心黑朱古力嗰款，因為在於我嚟講，香滑榛子蓉黑朱古力嘅味道都略嫌稍稍偏甜，而且始終都係有榛子蓉夾心，所以食落就冇軟心黑朱古力咁幼滑囉！
兩款曲奇都係以朱古力碎作主打，分別只在於我買咗呢款就係『雙重』朱古力，除咗有朱古力碎之外，連曲奇餅本身都係朱古力味，雙重朱古力，雙重口感...
總括嚟講，以咁相宜嘅價錢，又好難要求有好超卓嘅質素，只可以話都食得過囉。不過當初之所以會買呢個系列去試，除左因為係朱古力之外，好大程度都係因為佢嘅 package，貫徹專門店以黑白色 minimalism 嘅風格，去設計呢個系列嘅包裝，仲要擺係貨架當眼嘅位置，又的確係好引人注意嘅。
姑勿論個質素如何，我覺得以市場學嘅角度去睇，以 Awfully chocolate 本身嘅品牌效應、合理嘅售價，再加上出色嘅 package，都已經夠哂 gimmick，踏出咗成功嘅第一步。
雖然睇起上嚟，呢款 Pekkle 公仔個頭嘅比例好似有少少誤差... 
