Pekkle 卡片套

2013 年 Manis 最新 Pekkle 產品 - 卡片套

唔知點解，Manis 近幾年推出嘅卡片套都好興用呢個 size，裝八達通卡、信用卡、卡片類嘅嘢又嫌大咗 d，但係想放埋其他嘢，個套又唔夠裝喎... 而且因為呢個套本身都比較大，仲要加埋個膠扣開口位，根本都冇可能放入銀包或碎銀包，又要將個套另外放，都幾唔方便... 所以都唔係好明點解 Manis 唔索性出番以前啱啱好裝得入張八達通卡嘅 size...



不過撇開個 size 唔計，呢個卡片套上嘅 Pekkle 造型都幾討好，唔通 Pekkle 想做個 singer-songwriter？最欣賞穿戴整齊嘅 Pekkle，可愛得嚟又帶幾分帥氣，正！

Pekkle 休閒服

其實呢四款休閒服已經推出咗一段時間，不過因為我冇唸住買，所以都冇寫 blog。但係我啱啱先發現，原來有 Pekkle fans 係會睇我嘅 blog 去 "check" 下 Pekkle 有咩新貨推出。為咗可以推高 Pekkle 貨品嘅銷情，我梗係義不容辭咁去 "報導" 一下啦！

首先呢兩款都係短袖短衭套裝...

無論係顏色定係設計方面，我自己就比較鍾意呢款多 d，有幾次見到都差 d 忍唔住手想買，當然，最後都係理智戰勝咗感情啦！

最近好多 Pekkle 嘅產品都用咗呢對小情侶做藍本，我自己就麻麻地，因為覺得 Ruby 唔夠 Pekkle 可愛囉... 不過如果好鍾意 Pekkle 同 Ruby 雙雙對對嘅 fans，就唔好錯過呢套休閒服喇！

跟住落嚟呢兩套就係背心短衭套裝... 設計一樣，分別只在於件背心係吊帶款定係粗帶款囉...





以上呢四款休閒服嘅價錢，全部都係百幾蚊一套，都唔算好貴。有興趣嘅 Pekkle fans 記得去入貨喇！

Haagen-Dazs Royal Dessert 法式蜜語雪糕蛋糕

尋日行過一田超市，見到做緊雪糕展，而 Haggen-Dazs 嘅 counter 例牌吸引一大班顧客圍住，原本都冇唸住迫埋去，但係『獨家限定』呢幾隻字吸引咗我眼球，結果就迫咗埋去睇下係咩新產品，原來係雪糕蛋糕，其實之前都食過 Haggen-Dazs 嘅雪糕蛋糕，不過就係好似兩磅裝生日蛋糕咁又大又圓，呢款係迷你版，見都唔係好貴，包裝又精美，所以就買咗嚟試下...

個盒都好似好 grand 咁...



個盒入面仲印埋處理乾冰嘅注意事項，又幾貼心咁喎...

輪到個『主角』出場，呢款迷你版雪糕蛋糕共有兩款口味，比利時朱古力雪糕蛋糕及士多啤梨雪糕蛋糕...




個人覺得，呢款雪糕蛋糕個樣都算係咁，不過講到味道... 雪糕本身係冇問題嘅，不過個蛋糕就真係麻麻地囉，好『口鞋』口同埋好實呀...

不過如果你係 Haagen-Dazs 嘅 fans，一試亦無妨。

Godiva 朱古力軟雪糕

有睇開呢個 blog 嘅人，都應該知道我不下數次喺 blog 提過，自己係好鍾意食朱古力同埋雪糕，既然係咁，Godiva 最新推出嘅朱古力味軟雪糕，我又點會錯過呢？





幅相嘅效果當然係比實物『靚仔』好多啦！

啱啱『唧』好嘅效果都算係咁，都叫做有番個形睇下...





但係當拎上手之後，行出舖頭都未夠一分鐘，個軟雪糕已經開始溶，個形狀都塌哂落嚟...




我覺得呢個朱古力軟雪糕都幾好食，朱古力味都算係夠濃郁，軟雪糕嘅質感亦都算好，香滑有奶味，而個混有朱古力脆米嘅雪糕筒，更加係意料之外嘅香脆可口，再加埋一片薄薄嘅 Godiva 朱古力片，我覺得呢個軟雪糕算係物超所值嘅！

可惜依家只限於 IFC 同海港城分店有售，如果全線 Godiva 分店都有得賣嘅話，就更加方便我呢個為食鬼隨時都可以買嚟食啦！

日版 Sanrio Characters 雙色原子筆

為咗續會，連日嚟都行咗好幾間 Gift Gate，終於都比我搵到一樣新貨可買，就係黑、紅雙色原子筆，呢支筆都唔係間間 Gift Gate 有得賣，再加上係日本貨添，真係意外收鑊，所以唸都冇唸就買咗兩支喇！





筆身印有兩個 Pekkle，一高一低，雖然 Pekkle 個樣都係一樣，但係有佢份都好滿足喇！





印喺支筆上方嘅 Pekkle...





印喺支筆下方嘅 Pekkle





支原子筆係真正嘅日本貨嚟嫁！