Sanrio 50th Crystal Charms - 第三週戰績

自從買到 Pekkle charm 之後，個心定左，亦自覺整個人都變得 "理性" 左好多，冇再好似之前咁癲，唔理三七二十一，乜野都買，仲要專攻有額外印花既貨品，搞到成屋都堆滿哂 d 唔岩用既野，轉頭又要安排將 d 冇用既貨品送比其他人用... 依家唸番起，都有少少覺得自己失左控....

上個星期一開始，7-11 為左配合聖誕節既黎臨，連 crystal charms 既 promotion banners 都改埋，不過好可惜呀！換左新裝既 banner，竟然係冇左 Pekkle，豈有此理呃！！咁得意既 Pekkle 都抽走！！

上個週末，係港島區既地鐵站見到有呢個 "立體" 既廣告宣傳板，見到 Pekkle 有份做主角〔"企" 得係 Kitty 姐隔離 ，都算係有交代啦！〕，真係有 d 衝動想拆佢落黎呀！可惜我冇咁既膽量啦！

另外一張都係地鐵站影到既，不過呢張就係平面設計既 poster！Pekkle 又上場喇！真係好想要呀！

之前提到，自從有左一個 Pekkle charm 之後，成個人都變得理智左，除左冇再日日去蒲 7-11 之外，亦都唔會盲目咁買 d 自己同家人都唔岩用既野，但係我仍然好希望可以抽得到絕無僅有既 Pekkle 嫁！不過基於自知係超級黑仔一名，所以係 "冷靜" 左咁多日之後，第三週我只係以 15 個印花，去免費換左一個 charm 咁大把！可惜又係 duplicate 既！

成個星期先換得一隻，換到咁謹慎，當然就剩番大把印花啦！呢 d 印花就係我係呢三個星期不停買、不停買既 "成果"！唔計之前換 charms 用左既印花，截至今日一共有 262 個印花係手！

三張貼滿既印花卡〔一共 45 個印花〕，但係仲未決定去邊間 7-11 換 charms 好，究竟邊間換到 Pekkle charm 既機會最大呢

未貼既印花，一共有 217 個！

希望我能夠憑自己既努力，快 d 換到 Pekkle charm 番黎啦！

Pekkle 2010 拖鞋

等左幾年，Pekkle 終於都肯再出番布拖鞋喇！對上一次係 Manis 出既全藍色布拖鞋，仲記得當時買左好多對，減價時又入定貨，前前後後應該都著過六、七對同款既布拖鞋，可惜之後就一直冇再出其他款，搞到近呢兩年新年都冇 Pekkle 新拖鞋著....

咁難得等到，忍唔住手買左三對，其中一對唔會著，只會儲，其餘兩對應該都唔夠我替換，除非佢地將來年年都會再出新款喇！不過最近為左 Pekkle 真係大出血呀！要留番 d 彈藥黎過假期同買新年既新貨，所以.... 忍下手買住三對先啦....

毛毛拖鞋對於我黎講係好唔實用，所以一路都唔係咁熱衷，除非真係好得意啦！咁都會考慮買黎儲下，因為總覺得毛毛拖同毛毛公仔一樣，既阻地方，又要岩天氣、岩環境....

今次同布拖鞋一齊出既毛毛拖，立體 Pekkle 既造型真係嚇左我一跳，好有老翻 feel 囉！比起前幾年係深水埗一帶買到既 Pekkle 立體毛毛拖仲要 "假".... 見到個唔合比例 --- 咀又大、身又細、但係頭又大既 Pekkle.... 就只有一個 "驚" 字！！唯一鍾意既就係包裝卡紙上印住既 Pekkle，果個 Pekkle 就靚過對拖鞋上既立體 Pekkle 十萬八千倍，所以呢對毛毛拖我結果都係冇買到，只係偷偷係 Gift Gate 影低左就算 lu.... 

Manis 2010 聖誕新貨

Manis 出既新貨林林總總，乜都有 d，不過因為樣樣都唔會用只會儲，所以只係買左一件！

〔一〕按摩棒，隔住個膠袋試揼過.... 麻麻地舒服咋！

〔二〕星型書簽，其實都唔會用，不過見到平，所以手痕痕買多件....

〔三〕電話套，聲稱有仿麖皮內裡，不過我都唔會用，所以買左番黎幾日都冇拆過個包裝 check 過，又一 "為買而買" 既貨品....

〔四〕頸繩連耳機線收納夾，都係只會儲唔會用，所以冇拆過包裝，唔知個夾係點用法....

期待緊個投射器鎮匙扣，如果個實物合乎要求既話，應該會買黎用，不過唔知幾時先出呢？

Pekkle 套裝碗筷

之前睇 Manis 既 catalogue 好期待既套裝碗筷，比我預期之中早左出爐.....但係好可惜，論實用既程度，比我想像中差左少少....

個盒就真係好靚，所以當我係吉之島 Manis 離遠見到個盒時，真係有少少發左狂咁拎住唔放，其實當時我係連個 display 都未見到.... 個 sales 姐姐仲話：果邊擺左個 display 喎！... 我：唔洗睇 display 啦！我會買嫁喇！

咁重要既 size 其實已經印左係個盒度，只怪自己當時太興奮， "視若無睹"....

滿心歡喜咁打開個盒一睇..... 個 size 竟然係似 d 茶餐廳既餐湯碗.... 老實講，好懷疑會唔會有人拎住個又肥又扁既碗當飯碗用囉！擺又唔方便，拎住食飯又唔方便.... 唉，真係有 d 失望嫁！明明唸住會買兩套，一套用一套儲嫁嘛.... 依家佢咁奇怪既 size 令我卻步....

對筷子就唔錯，可以拎出黎用，不過拎左對筷子出黎用，又變左唔可以儲到一套.... 都唔知儲好、定係用好，煩惱中....

正如 Pekklebaby 話齋，征服足足平 Manis $30 一套呀！不過果日我係吉之島一見到個超靚既 Pekkle 盒已經忍唔到手！佢仲標左價話係原價 $169，特價 $139，吉之島會員卡當日仲有九五折，所以我等唔切就係吉之島買左喇！如果有 blog 友想入貨，就建議你地去征服買啦！真係抵好多嫁....

Pekkle DIY 包包

係 blog 入面，我已經不下數十次話自己完全冇美術天份，又有 "手腳唔協調症"，所以對於 DIY 既作品，永遠就只有一個 "恨" 字.....

記得之前係 blog 都提過，話好想換左依家用緊既 DIY Pekkle 包包，當年係無意之中係街邊既檔口發現，雖然係老翻，但係手工精細，Pekkle 布既 pattern 又靚，唔經唔覺都跟左我幾年，不過可能日日都帶住係身既關係，無論係用機洗、用手洗、落埋漂白水洗都好，仍然係回復唔到呢個包包既舊觀。因為咁，兩年前我試圖係一般既床品訂製 Pekkle 包包，出黎既產品當然係失敗之作啦！

估唔到我只係比我朋友望左一眼我舊包包既相，佢就已經二話不說整左個似模似樣既包包送比我！要知道，佢只係一名文職，唔係專業，只係業餘性質都可以做到咁既質素，佢真係好勁呀！

我係絕對冇交過實物比我呢位朋友睇，但係造出黎既 size，竟然係一模一樣！超勁！！

朋友已經專登遷就 Pekkle 公仔，將布上既 Pekkle 大公仔，各自出現係前、後幅，好靚呀！係塊布有 d 少瑕疵，所以個包包正面係花左 d 既....

朋友話車拉鍊係佢第一次既嘗試，所以對佢黎講係有 d 難度.... 不過，我睇完件實物之後，真係想像唔到佢會遇到咩困難囉！心中只有兩個字：good fit！

朋友話，如果我唔介意，將拉鍊位改為口金既話，效果會更完美...... 但係，我覺得呢個已經夠哂好喇喎！唯一美中不足既地方，就係開口位太窄，所以拎同放野時，都比較吃力，但係除此以外，真係幾近完美喇！簡直係可以拎出街賣既質素！！ 

呢位朋友之前已經 DIY 過 Pekkle 既摺紙、八達通套、水晶果凍蠟燭、口金包包、電話繩等等既精品比我，真係好多謝佢呀！