Pekkle 休閒服

為左儘快買到 Pekkle 精品，對上一次利用 lunch hour 走一轉落旺角買新貨，已經係2008 年 10 月既事，估唔到事隔一年，又有另外一樣精品驅使我不惜犧牲 lunch hour 唔食飯，都要落旺角買 Pekkle....

一睇到喪 Vi、pekklebaby 佢地既 blog show 左 Pekkle 套休閒服出黎時，真係恨到流哂口水，因為我冇預訂，再加上呢套衫係征服世界獨家發售，為左要抺煞待到週末先落征服買，會有空手而回既可能性，唯有 lunch hour 拿拿聲 "碌" 出旺角買啦！

睇完 blog 友 post 出黎既相同意見之後，本來三心兩意既我，終於都決定左買一套灰色就算.... 奈何去到征服見到實物時，真係忍唔住唔買哂兩種色囉！

前幅

後幅

前幅胸前 Pekkle 公仔 pattern zoom-in

後幅 Pekkle 公仔

藍底襯藍色衫

灰底襯紅色衫

product label

\

以佢既洗衣標籤黎睇，呢套衫睇怕都要用手洗先係最好... 不過唔緊要啦！個公仔又大個、又有閃粉咁樣，我唸都未必有膽量著出街....唔著咪唔洗洗囉！

灰色同藍色各有可取既地方，唔知大家又覺得邊隻色靚 d 呢？

同場加映：

溝貨買多隻既 Jumbo Glass Mug

當然就唔少得新貨既相機袋啦！番到屋企拆開黎睇，覺得非常實用，內裡有暗格，岩岩夠放一張八達通卡，正！所以我應該會用個相機袋黎做碎銀包... 依家後悔買得太少，唔夠留番黎將來替換之用... 唯有遲 d 有機會再去買啦....

Pekkle 聖誕、賀年精品 by Sanrio Gift Gate

岩岩行過吉之島 Gift Gate，見到出左本 "Happy Sanrio Winter" 既 catalogue，拿拿聲拎上手睇下有冇 Pekkle 份啦，果然不負我地一眾 Pekkle fans 既期望，今年又出番 Pekkle 賀年精品啦！即刻去片睇下...

聖誕精品：

〔一〕Sanrio 音樂公仔

〔二〕之前龍頭 Vi 已經介紹過既隨身暖手包

賀年精品：

〔一〕利是封

〔二〕菱形彩色揮春

仲有相信大部分 Pekkle fans 都已經入左貨既公仔錢罌同埋浴簾...

呢 d 都只係 Daniel & Co. 既 Pekkle 產品，仲有 Ellon 既新貨〔例如：珍寶玻璃杯、相機袋連手繩、頸繩〕、 Kisok 〔例如：睡衣、睡袍、休閒服〕同埋雅芳婷既 Pekkle 新貨！今年 Pekkle fans 雖然會荷包大出血，不過都係百年難得一遇既豐收年，大家記住要好好珍惜呀！

Sanrio Village 50 個聖誕傳奇明信片

上一篇提到 Sanrio Village 50 個聖誕傳奇呢個節目係 11 月 16 日已經開始左，因乜解究我會拖到今時今日，12 月都就快到先去呢？咪就係因為呢套明信片囉！

由於龍頭 Vi 既報紙訪問，我先知呢個活動係 11 月 15 日舉行開幕禮，其實當日已經想去，奈何果日又唔得閒，唸住 11 月 21 日就去，點知又比我知道 11 月 26 日開始先會有呢套明信片發售，為左要買到呢套明信片，唯有再推遲去青衣城既計劃啦.... 好彩終於都順利買到呢套明信片 lu...

雖然之前 Pekkle 都有出過明信片，不過我係一張都冇買過，依家終於都可以擁有 Pekkle 既明信片，雖然唔係 Pekkle 獨自一張，不過我都已經好心足嫁喇！

四款明信片都有閃粉點綴，設計都算唔錯，而且只要捐不少於 $10 比公益金就可以帶其中一款番屋企，我覺得係超值呀！

四款明信片中，就只有呢兩張有 Pekkle 份！少係少左 d，不過都好過冇啦！

值得一提既係，每張明信片都已經貼上 $1.4 郵票，可以隨時寄得出去，最特別既係每張明信片既郵票都有唔同既 Sanrio character，好靚呀！唔知有冇 Pekkle 份呢？

之前都已經知郵政署有個服務係可以印 d 專用郵票，不過如果冇記錯係每次最少要訂五十版，當時都仲未知 yahoo blog 有咁多 Pekkle fans，所以都冇上過心，唸住自己都冇乜可能可以訂到咁大量，依家唔知有冇呢個可能發起一齊訂 Pekkle 郵票呢？又唔知呢個動作算唔算侵權行為呢？

題外話：係青衣城既客戶服務部拎左呢張宣傳單張，得知由 12 月 3 日開始，一連四個星期都會有 Sanrio 既精品換，只要係商場消費超過 $800〔兩張單〕就可以換到.... 唔知係四款精品之中，會唔會有 Pekkle 份呢？有既話，即係代表住大家要預備定 "彈藥 "，連續四個星期走去青衣城消費換禮物 lu...

Sanrio Village 50 個聖誕傳奇

青衣城 x 杏花新城魅力呈獻：Sanrio Village 50 個聖誕傳奇
日期：2009 年 11 月 16 日至 2010 年 1 月 3 日

地點一：杏花新城 Sanrio 大宅

觀後感：期望過高，佈置簡單 / 平凡，有 d 被搵笨既感覺...

地點二：青衣城 Sanrio Village

觀後感：可能之前睇得太多 blog 友介紹，抱住期待同興奮既心情殺入青衣城... 點知...場地比我想像中細好多，老實講，一到埗睇到個 "規模" 之後，都咪話唔失望嫁！不過咁，佈置得都唔錯，都算係有 heart 果隻，所以雖然地方比較細，都可以算係不枉此行既...

晚上七點幾到達青衣城，排隊入場既人龍已經形成左 "三層蛇餅"，經過左一個鐘頭之後，終於都輪到我入場喇...

入到場，二話不說梗係 "跑" 到最入既 "郵政局" 位置先啦，點解？因為有我至愛既 Pekkle 扮郵差叔叔嘛！ 其實我當晚都影左好多相，由有 3 格全滿既相機電池，影到剩番一格，幾驚最後會影唔到呀！後來番到屋企 check 番，先知自己唔覺唔覺咁，已經影左百幾張〔場內場外合計〕，唔怪之得連電都用到冇哂！自己睇番都打左個突...

不過百幾張相入面，佔左八成以上都係 Pekkle 黎既... 係 Sanrio 既 promotion 之中會出現 Pekkle 既機會率，都唔知有冇萬份之一... 既然今次咁難得，所以我都按捺不住係咁影，就算係同一個角度既 Pekkle，我都影左幾幅，癲左一樣！

Pekkle 郵差叔叔 look，大部分 blog 友都已經 post 哂出黎，我都無謂再重覆，所以我今次 post 左 d 大家比較少影到既 Pekkle！場內有個電腦遊戲叫 "油油畫畫小畫家"，見到 Pekkle 有份梗係唔會放過啦！初初以為只係呢個畫面先有 Pekkle 出現，原來唔係嫁！入面個遊戲其中一個主角就係 Pekkle！！

不過真係要慢慢等佢出黎囉！等完佢出黎，又要一筆一筆咁同 Pekkle 上色.... 就係咁，入場限時參觀果 10 分鐘，話咁快就流走左.... 其實我只係主力影左郵政局同呢個 game，已經開始比在場既工作人員趕走... 

果晚忽然變左個厚面皮既人，無論 d 工作人員點趕都唔理，誓要影埋其餘三個主題屋同個 market 先好不情願咁離開！其實仲有好多細節位我都未影到，就比人趕走左！好唔甘心呀！排左一個鐘頭，只係睇左 10 分鐘...