最近見到 blog 友 post 左一系列既〝鴨鴨掛品〞出黎... 搞到我心癢難搔，又要影低 Pekkle 精品，upload 上黎比大家分享一下先... 
呢個水松木板，有好幾年歷史嫁啦，係同事送比我既，佢仲好有心，係花園街買完番拎屋企，再係屋企拎番黎公司送比我嫁... 
有冇留意右下角既 Pekkle 摺紙公仔呀？就係送呢塊水松木板比我既同事摺比我嫁！
2003 年 Ellon〔即係 Manis〕出既白板連掛袋.... 
2005 年 Grandsmart 〔即係 Trendyland〕出既雜物掛袋...
又有新名牌朱古力店登陸香港... 究竟係香港人越黎越識食？定係香港人越黎越黎似〝水魚〞？定係世界各大名店都北望神洲，想係香港〝小試牛刀〞，再殺上中國內地拓展商機呢？
睇雜誌知道 Jean-Paul Hevin 會係海港城開分店，黑朱古力癡既我，拿拿聲趁星期六唔洗番工既日子就去左〝朝聖〞.... 
地點都唔算難搵，就係正海洋中心 Leonidas 既位置樓下果層，兩層同一個位置都係賣朱古力，唔知 Leonidas 會唔會比 Jean-Paul Hevin 搶左 d 生意呢？
好彩我去到店舖時先十一點左右，應該開舖無耐，所以仲未見有客人，丁方既店舖都尚可以任我睇，細細既店舖，職員就有四位，個個都掛住甜美既笑容，服務都幾好嫁！因為 d 朱古力冇擺介紹牌，基本上唔係好知 d 朱古力係有咩餡料，幸好有服務慇勤既職員介紹....
我同佢講，我只有興趣有純味或有果仁既黑朱古力，經介紹之下，結果就買左以下呢幾款試....
獨立包裝既朱古力，我原本只係買左四件，不過果 sales 姐姐話依家有 promotion，$15 / 一件，$60 就可以買到五件，有成八折喎，梗係買多件啦....
散裝既 Praline，每款買左兩粒，都係揀左黑朱古力，sales 姐姐話分別係三款唔同既果仁，不過聽唔清楚佢講既係乜野果仁，但係我食極都只係試得出杏仁同榛子.....
至於 macaroon，其實咁耐以黎只係食過一次 LGB 既 macaroon，uummm....講真，真係唔係我杯茶囉！除左甜之外，就冇其他既感覺，好似食緊砂糖一樣.... 不過今次 Jean-Paul Hevin 出名既除左朱古力，仲要講到佢既 macaroon 係巴黎第一，又睇在佢係 dark chocolate 份上，姑且再試多一次啦... 今次既感覺的確比 LGB 果次好既，起碼除左甜之外，就真係嘗到外脆內軟、有番 d 食糕點既感覺，唔會好似食緊糖一樣，不過整體黎講，都係覺得偏甜囉！我唸如果襯番杯 espresso，應該都係一個幾唔錯既配搭.... 不過可惜我係唔飲咖啡既！所以...所以對於 macaroon，我應該都唔會再試嫁咯....
朱古力既質素真係做到高級朱古力既要求，即係咬開果下，係可以聽到好清脆朱古力斷開既聲音，入口唔會即時有太濃烈既朱古力味，不過越食朱古力既味道就越濃，而且都幾持久。唔知係唔係新舖既關係，無論係朱古力定係 macaroon，都可以食得出好新鮮，再加上佢既價錢比一般高檔朱古力店為平，所以對朱古力愛好者黎講，係值得一試既！
其實我都幾想試雜誌推介既 truffle，不過果日去就唔多覺眼，希望下次有機會會再買黎試下啦....
大家都知 Pekkle 係一隻會行會走既鴨仔.... 咁唔知大家又知唔知 Pekkle 都出過〝非一般〞外型既精品呢？
係 2004 年開始 Sanrio 陸續推出一系列既蛋型印仔，Pekkle 有幸係第一彈佔一席位，唔知大家有冇買到呢？
Sanrio 呢個蛋型印仔系列，每個 character 都會出一式兩款，外型雖然係一樣，不過印出黎既公仔就唔同款既.... Pekkle 呢個分別係中文版既〝做得好〞同埋英文版既〝Ahiru No Pekkle〞.....
除左呢個正版既蛋型印仔之外，老翻界都出過 Pekkle 蛋型家庭用品嫁喎，一睇都知，個造型都擺明就係抄正版既蛋型印仔嫁勒！不過都算佢做得似模似樣啦！前面果個係牙籤筒，後面兩個就係紙巾盒黎既....
除左呢兩樣產品之外，老翻界都仲有另一個〝得意〞之作，絕對可以講係一件〝潮物〞黎嫁喎，咩為之〝潮物〞？咪就係 cubix 公仔囉....
以我記得，Pekkle 既 cubix figure 仲有一個大 size，好似成張凳仔咁既，不過我就冇果個 size 喇！上面細細粒果個，可以當電話繩，仲有個啷啷，都幾響嫁！而大果個就有個吸盤，比你可以吸係窗度又得，掛起佢又得，就咁擺係檯面都一樣冇問題....
唔知大家又有冇買到呢 d 非一般外型既 Pekkle 呢？
記得之前睇過一個財經電視節目，內容係講有關香港既地產市道，好記得當時節目講到香港租金升幅最高、租值最貴既商場，就係九龍塘既又一城同沙田既新城市廣場，當時尚未大肆翻新既新城市廣場能夠榜上有名，都真係令我有 d 意外...
近一年，新城市廣場不單只將商場翻新，引入左好多過往只會出現係港島區，或者係尖沙咀區既名店，如 Armani、Vivienne Westwood、agnes b.、CK、Godiva、Leonidas、City Super、Triple O's 等等、仲吸引到初次登陸香港既外地品牌紛紛係新城市設分店，如 NEXT、翡翠小廚等等....令到新城市廣場即時變左新界區既中、高檔消費熱點...
幾前日仲發現連 Cova 都就快係新城市開設佢地首間新界區既門市，呢間門市雖然只係 cake shop，唔係 cafe，唔會有名人係度 high tea，所以應該都冇乜機會碰到 d 上等人、大明星咁，不過都未嘗唔係一個驚喜，希望呢間門市會有 Cova 自家製既 gelato 賣啦！咁以後想放縱一下自己，扮一刻上等人都唔洗搭車、搭船咁去食 lu.....
如果遲 d 連 XTC 都係新城市廣場開埋分店就正囉！咁我食雪糕又可以再多一個選擇... 不過再係咁食法，到時相信以我既身型，都應該都夠哂資格參加〝重量級空手道賽〞，甚至可以被訓練成為摔角手添......
係我記憶之中，冇見過 Sanrio 有出 Pekkle 既浴巾，反而手巾仔、面巾就出過好多唔同既款，希望唔係我錯過左啦.......
雖然正版我就未買過，甚至未見過添，不過老翻 Pekkle 浴巾我就用過喎，唔知一眾 Pekkle 既 fans 又有冇買過呢？
因為佢係老翻街邊貨，所以對毛巾既質素就唔好有咩期望，雖然係咁，不過 Pekkle 個樣做得超似，個 design 又靚，真係幾可亂真嫁！以我所知，佢先後只係出過呢兩款，兩款都一樣咁可愛嫁！
呢一款係第一款出既浴巾，都已經係三、四年前既事，記得當時係賣 $50 三條，係我係一個偉華中心擺短期租約既 kiosk 度買既，個 counter 將各款公仔浴巾掛得高高咁，我離遠見到 Pekkle 浴巾，已經第一時間飛身撲埋去買.... 不過自從偉華中心裝修完，開左間百佳超級市場之後，呢 d 短期 counter 已經不復見.....
原本唸住出得 Pekkle 浴巾，一定會長買長有，所以當時我只買左其中兩條係 Pekkle，點知一路係咁等、係咁等，發覺唔單只再冇其他款既 Pekkle 浴巾出過，連呢款都再冇得賣，果時真係好後悔冇買哂三條都係 Pekkle....
過左一排，終於都比我見到第二款既 Pekkle 浴巾出爐，今次既售價依然係 $50 三條，我即時買左三條一樣款既... 依家我已經用剩最後呢條啦.... 亦唔打算用佢，會將呢兩條〝絕版〞既 Pekkle 浴巾儲起佢，以作留念.....
無論係正版定老翻都好，希望係不久既將來，Pekkle 既浴巾會再次面世啦！
