7-11 x Hello Kitty & Friends Sweet Delight 公仔 - 第七週戰績

又到一週結算嘅時間喇！唔知係唔係比人投訴過呢？今次換購糖果系列時，7-11 嘅店員都會問你想換第一期嘅甜品系列、定係新二期嘅糖果系列。當我聽到佢咁問時，真係好高興嫁，心唸唔洗撈埋第一期嗰十二款公仔一齊換，咁 "命中"『朱古力 Pekkle』嘅機會咪應該高咗好多囉....

我當時個心的確係咁樣唸...不過呢個世界，好多嘢往往都係事與願違... 唉...

根據我第一期第一次換公仔就已經可以換到兩個『啫喱 Pekkle』嘅佳績去估計，我真係天真到以為自己嘅運氣〔又或者我同 Pekkle 嘅緣份〕可以一直咁 keep 住... 可惜，呢個星期我一共換咗七隻公仔，結果都係強差人意，唔單只換唔到『朱古力 Pekkle』，換到嘅公仔仲要係重複得好緊要添喎...

七個公仔之中，竟然有四個都係重複嘅！！！我已經係喺唔同嘅 7-11 換，結果都係咁... 咩事呀？唔通依家只係出咗布甸狗嘅款？！唉... 咁就冇左 112 個印花喇！好心痛呀！

截止今日，我手頭上仲有 11 張貼滿咗嘅印花卡，另外再加 14 個印花，即係一共有 190 個印花可以換... 由於上星期遭遇到『滑鐵盧』，呢個『打擊』對我嚟講，都實在係太大，搞到我依家有少少換公仔恐懼症，都唔知應該點換先啱... 因為每個印花都真係要『辛苦經營』先可以儲得到，搣開每個印花都『有血有汗』嫁嘛！所以，就算唔可以第一次就比我換到 Pekkle，都唔好要我重複四個布甸狗咁慘情啦！依家真係發夢都會見到布甸狗囉...

睇嚟我同 Pekkle 都真係唔係幾夠緣份 ，呢個星期除左換唔到 Pekkle 公仔之外，連 Pekkle 嘅印花亦都只係比上個星期多咗 4 個咋...

希望所有 Pekkle fans 都可以快 d 換到『朱古力 Pekkle』啦！

全城至靚 Pekkle 賀年揮春

16/01/2013 開始，7-11 換 Sanrio 公仔嘅推廣就由第一階段嘅甜品系列，進入第二階段嘅糖果系列，而各 7-11 嘅店舖都換上新裝配合糖果系列嘅主題。

除咗以上第一期甜品系列都會有嘅一般『裝飾品』之外，年近歲晚，當然就唔少得充滿農曆新年氣氛嘅佈置啦！每個有份參與呢次換購推廣嘅 Sanrio 公仔，都有推出賀年揮春，一共 12 款，我都係去到 7-11 嘅主題店，先可以一次過影低全套12 款嘅賀年揮春咋！


  


鬼叫我係 Pekkle fans 咩？偏心 d 都要啦！我只係 close up 咗 Pekkle 嘅賀年揮春！取其諧音，"Duck 心應手"、又有可愛嘅 Pekkle，再加上係有錢都買唔到嘅非賣品，我真係覺得呢張係全城至 cute 嘅 Pekkle 揮春，每次見到都有想撕落嚟、據為己有嘅衝動呀！當然我都只係唸下姐，斷唔會做 d 犯法嘅事嘅！不過，當我第一次見到呢張 Pekkle 揮春時，真係傻到有唸過為咗想拎到呢張揮春，不如去 7-11 做番一頭半個月嘅 part-time sales 嫁！

Pekkle 2013 年賀年揮春

今年 Pekkle 僅有嘅兩款賀年揮春已經推出左，有興趣嘅就要快 d 去掃貨喇！

Gift Gate〔Daniel & Co.〕嘅菱形揮春
隨揮春附上雙面貼紙，不過為免會整壞幅牆，一向我都只會用 blu tack 去貼揮春...

過去幾年 Gift Gate 都會推出 Pekkle 豪華版嘅通花揮春同普通版嘅長方形揮春，可惜今年就只有呢款通花揮春...

揮春背面印有 Pekkle 嘅全名。

Manis〔Ellon Gift Products〕嘅金色長方形揮春

7-11 x Hello Kitty & Friends Sweet Delight 公仔 - 第六週戰績

好幸運第一次換公仔就已經比我換到兩個心儀嘅＂啫喱 Pekkle＂，所以喺呢段時間我都冇再換公仔，只係 keep 住儲印花。亦都係因為咁，唔經唔覺原來我已經停左三個星期冇 update 呢個『系列』嘅 blog！不過，聽日就係第二期公仔上市嘅大日子，梗係要 update 一下目前我儲印花嘅『成績』喇！

經過呢三個星期嘅努力，印花嘅數量一共增加咗 142 個，依家已經累積到有 274 個印花喇！

一共有 15 張貼滿 16 個印花嘅印花卡。聽日可唔可以再下一城，即時換到＂朱古力 Pekkle＂，就係靠哂呢 15 張印花卡喇！

仲有一張未貼滿嘅印花卡...





當然，最緊要就係我唔捨得用嘅 Pekkle 印花啦！

希望唔洗出動到我呢 d 私伙 Pekkle 印花，就可以比我順利換到＂朱古力 Pekkle＂啦！聽日開始，我又要『繼續努力』喇！

Pekkle Uji 雪狐絨披肩

尋日漫無目的咁行街，竟然比我有意外發現.... 勁靚！

從未見過嘅 Pekkle 雪狐絨披肩，柔軟、輕巧... 正！

披肩『全相』...

前幅 - 反領兼有三粒鈕

後幅





呢件披肩簡直就係『中』哂我對 Pekkle 精品嘅要求，包括：我至愛嘅藍色、有大堆頭嘅 Pekkle、同埋唔太阻地方！咁正，又點忍得手唔買呀？同款布料除左呢件披肩之外，仲有一件晨褸，不過件晨褸要成三百幾蚊，自己又冇著晨褸嘅習慣，所以最終都只係買咗呢件披肩就算數！