Pekkle passport holder

又一新款既 passport holder ！究竟一個人可以有幾多本 passport 呢？

唔知點解呢個 passport holder 會有咁多格.... 好懷疑會唔會有人將本 passport 同咁多『林沈』野擺埋一齊呢？

 

Pekkle 花紙

Pekkle 又出左新款既花紙喇！

呢款花紙以 "音樂" 為主題，有五線譜、高音符號、四音符、八音符、耳筒等等... 不過估唔到連『遠古』年代既卡式機同卡式帶都有喎... 會唔會 out 左少少呢？

Pekkle 2R 相簿 / 卡片簿

依家無論咩類型既店舖都興搞『會員制』，加埋信用卡，相信大家手頭上都有唔少既卡，有 D 根本都唔會帶出街，係整理上都好有困難，依家 Pekkle 出左呢本卡片簿，將來要搵卡時，就井井有條得多喇！

 

10 月號草莓雜誌贈品 - Pekkle postcard

草莓雜誌 12 月號係 11 月 10 號都已經出左...  而我，今時今日仲係寫緊 9 月 10 號出版既 10 月號草莓雜誌，真係慢左好多拍，不過冇計啦！鬼叫 Yahoo blog 無啦啦又搞 upgrade 咩！

當日除左 blog 友愛麗生既報料之外，其實我自己上 Sanrio 個網頁，都知道 10 號既贈品係有 Pekkle 份，可惜我去左幾間征服世界同埋 Gift Gate 都賣哂，剩番其他公仔既贈品，原本都唸住放棄，點知咁岩我家姐 10 月頭又去日本，我當然『好順便』咁托佢幫我去日本既 Gift Gate 搵下啦！點知又真係比佢搵到喎，佢仲話全店都仲有好多本存貨，不過有 Pekkle postcard 既，就只得番兩本，佢就掃哂兩本番黎比我！加埋我係香港買既一本，我一共有三本 10 月號既草莓雜誌！

呢 d 就係 10 月號草莓雜誌贈品 postcard 喇！係香港買果本係送 My Melody，其餘兩疊就係日本買既！

一套 postcard 共有四款 design，每款 design 都有兩張。



大家見到嘛？Pekkle 呀！雖然 Pekkle 只係出現係『雜錦』款，不過都好過冇啦！

每款兩張，買左兩本，所以一共有四張！！

zoom 近 Pekkle 比大家『欣賞』下啦~~~

Pekkle 有耳陶瓷杯

雖然『離開』Yahoo blog 超過一個月既時間，但係我就從未離棄過 Pekkle....  一路都 keep 住買 Pekkle 既新貨，但係因為用唔到 Yahoo blog，一路都冇辦法 post 新 blog 介紹... 其實我寫呢個 blog 其中一個最大既原因，係想幫自己既 Pekkle Collections 做番個 "filing system"，所以請容許我會悶親各位 Pekkle fans，因為黎緊既好幾篇 blogs，都將會係主力寫番過去幾個月 Pekkle 出既『新』貨介紹....


有耳陶瓷杯，雖然唔係第一推出，不過呢個杯大小適中、構圖『新穎』，個人就覺得又靚又實用勒 ！

廚師造型既 Pekkle，好得意呀！個陶瓷碟仔，既可以用黎做杯蓋，亦都可以當作杯墊，『一碟兩用』，值得一讚！！

連杯底都印有 Pekkle 個全名嫁！真係好精緻！

依家正等待公司隻杯快快『意外身亡』，咁我就可以帶呢隻靚靚既 Pekkle 杯番 office 用喇！