美心西餅 -- 魔鬼蛋糕

對於我地呢個冇乜人鍾意食蛋糕既家庭黎講，要『消滅』一個睇起上黎起碼有磅半以上既蛋糕，真係有 d 難度，不過我體內既 "朱古力魔鬼" 比一句『以 70% Valrhona 朱古力製成』既宣傳句語『喚醒』左，忍左個幾兩個星期之後，呢隻 "魔鬼" 始終都戰勝左理智，本著買左先算，唔理食唔食得哂既心態，終於都係前日買左黎食...

食野最緊要係味道，其次包裝都好重要，係未嚐呢個蛋糕之前，以價值而論，呢個包裝都算唔錯嫁喇！

唔知點解，天使蛋糕有對『天使翼』做 logo，魔鬼蛋糕就以對『蝙蝠翼』做 logo，唔知魔鬼同蝙蝠有咩關係呢

外型都算 ok 啦！其實除左個宣傳語句之外，呢個外型都係吸引我想試既原因之一...

呢盒係隨蛋糕附上既『魔法脆脆』，同之前美心出既天使蛋糕一樣，都係 gimmick 黎姐，講穿左咪係脆卜卜既糖粒，仲要係甜到漏果隻！係先要自己整碎，再灑係蛋糕上面食，但係當我用佢隨盒附上既膠棍企圖壓碎時，彈到一檯都係之後，結果仍然係無辦法將 d 糖粒整碎既....失敗！

切開左個樣都叫 ok 既，好有朱古力 feel 囉！不過一刀切下之時，都知知地出事嫁勒... 不過當時希望係自己估計錯誤啦！

上碟之後，加埋 d 整極都唔碎既糖粒，齋睇個樣都仲 ok 既，可惜一食就出事！對於我黎講，呢個蛋糕實在偏甜左 d，唔知係因為厚厚既朱古力 cream 累事，定係果 d『魔鬼脆脆』出事？總之食完呢一片之後，已經感覺到好膩... 雖然我唔多鍾意食蛋糕，不過係我心目既海棉蛋糕，應該係又鬆又軟，好有彈性，呢個蛋糕係呢方面既表現，明顯係差少少先合格，唯一既好處就係都算有香濃既朱古力味囉！當然，相比係食 Valrhona 既 plain dark chocolate，就算冇 70% 既濃度，都比呢個蛋糕更香濃囉！不過對於一 d 唔多喜歡略帶甘苦既 dark chocolate 味既人黎講，呢個蛋糕就岩岩好囉！ 

呢個蛋糕我結果要分三日，仲要撥開哂 d cream 先可以食得哂！最後一次食時，蛋糕既邊位已經開始變硬，口感比第一次食時仲要差 d...

百四蚊一個蛋糕都唔算貴，對於我呢個朱古力怪黎講，都叫做『完』左個心願啦！如果對於一 d 鍾意食朱古力，但又唔喜歡太濃可可味既人黎講，都可以一試既！

Pekkle 2009 年最新縮骨遮

早幾日一收到喪 Vi 通知出左 Pekkle 縮骨遮，個心就掛住掛住咁，咁岩之前我用開果把 Pekkle 縮骨遮又退左役，正好依家可以買番把新既黎補上，可惜一田既 Manis counter 又冇呢把遮，『受盡煎熬』咁終於都等到假期喇！仲唔第一時間仆出去買咩！

一把儲、一把用！

打開把遮，感覺上好似比之前果 d 縮骨遮大把 d...

一把遮，八張布共三款 pattern...

今年既設計比較破格，用上左 Pekkle 比較少用既紅色，仲要係遮邊綑上紅邊，叫做有 d details 位咁啦！

呢格暗花造型，唔知會唔會好似係 2003 年出果把深藍色縮骨遮咁，即係當濕左水之後，公仔位置會凝住小水點，其餘位置就係跣水既，所以當你遠望時，就形成左一個一個 Pekkle 形狀既水點公仔凝住係把遮上面嫁喇！好得意嫁！唔知一眾 Pekkle fans 之前有冇留意到呢？

呢把就係我頭先所講 2003 年出既縮骨遮喇！

 

特別消息：之前鴨會龍頭喪 Vi 話會出既複古版 Pekkle Memo Pad，我今日係征服世界見到實物啦！原來比我想像中大本，約 4R 既 size 左右，封面有塊膠卡，入面既 memo 紙七彩繽紛咁，好靚嫁！可惜職員強調話呢 d 只係版，唔會公開賣住，最快都要 20 號左右先有得賣喎！定價 $25。好期待呀！

Pekkle 背心、短褲套裝

好多 Pekkle fans 一早都已經買左既背心、短褲套裝，我終於都買左喇！

因為知道自己 "冇本事" 著呢 d 衫，所以都唔急住要即刻買，結果就可以用一個比征服世界要平既價錢買到，所以話呢 --- 『遲』人一步，理想達到嘛...

係唔係望上去好似好大件咁呢？梗係啦！我咁大份，梗係要買 XL 啦！就算明知自己唔會著都好，我都唔會扮瘦買細碼既...

\

件背心既公仔雖然冇乜特別，不過都總好過條褲，完全冇公仔，好心係褲腳印個 Pekkle 頭都好啦！唔洗咁孤寒呀？

學 Korean Pekkle 話齋，有乜可能個個公仔都有一款兩色選擇，係得 Pekkle 得一種色咁偏心嫁？個老板太唔識唸啦！為左慳番少少錢，就只係為 Pekkle 出一種色，佢未免太睇少我地呢班 Pekkle fans 既 "購買力".... 希望佢真係會 "從善如流"，今年會出番正牌既 Pekkle 冬季睡衣啦！

『慢』人一步、理想達到...

Pekkle 潛水造型公仔已經出左一段日子，一路以黎都猶豫緊買唔買好... 就係上個星期日行百貨公司，無意中見到 Gift Gates 做 promotion，全店正價貨品八折，原價 $139.9 既 Pekkle 潛水公仔，百二蚊都唔洗就可以買到 lu....

正面〔因為唔想拆包裝袋整污糟 Pekkle，落閃光又反哂光睇唔到，無落閃光之下影既相，係比較黑左 d...〕

背面

始終覺得 Pekkle 出現係平面 products 上，設計同造型都比較像真同得意... 一轉到立體難免會有少少失真...

連貨品條碼都有 Pekkle 個嘜頭，睇下平面上既 Pekkle 幾得意...

仍然係香港既『作品』，唔知 Sanrio 日本總公司幾時先會考慮再次生產 Pekkle 既產品呢？

我今次雖然比一眾 Pekkle fans 遲左咁多先可以擁有呢個公仔，但係價錢又平左 20%，呢 d 仲唔係叫做：『慢』人一步、理想達到？

La Maison du Chocolat ice-cream & Gelare ice-cream

我呢個朱古力雪糕怪又出動 lu...

係奧海城睇完戲，無意中發現開左間新既雪糕店，其實好耐之前都已經係雜誌睇過介紹呢間雪糕店的，不過一路都就唔岩時間，就算後來呢間雪糕店係旺角開新分店，都總係冇機會試過，今次反而無心插柳....

呢間雪糕店係澳洲既過江龍，佢地雪糕既賣點係集合左美式同意式雪糕既特點，以我個人既意見，美式雪糕代表 "甜" 及 "膩"、意式雪糕代表 "低空氣" 及 "全天然"。我對美式雪糕一向都唔多大興趣，不過又好想試下呢間雪糕店混合左兩個完全唔同 style 造法之後，會係咩感覺....

呢種名為 "Chocolate Overload" 既雪糕，睇起上黎已經覺得好香濃，當場係不作他選，我一定係揀呢種味啦！果然朱古力都好香濃，因為佢標榜係 "零空氣"，所以感覺係好黏稠、好煙靭，d 雪糕雖然係好滑，朱古力味亦都好濃郁，不過食完一杯都真係幾膩，"非我杯茶"... 呢種澳洲雪糕果然係名副其實既『美式加意式雪糕混合體』，兩者雪糕既特色都可以係呢杯雪糕中搵到...

知道呢間朱古力店係中環開新店，仲要引入自家品牌雪糕已經有大半個月既時間，終於都係上個週末去左 "朝聖"...

自從試過呢間朱古力店既朱古力之後，佢即刻成為我心目中既 "Best Chocolate Shops" 首位，佢地自家品牌既雪糕、雪葩種類繁多，都唔知揀邊款好.... 結果都係買左以下呢兩種口味...

Chocolate Sorbet〔朱古力濃度可媲美 Chocoate XTC〕

Dark Chocolate Ice-cream〔有 d 似 Godiva 既 Milk Chocolate Ice-cream〕

估唔到 Sorbet 既朱古力濃度比 Dark Chocolate Ice-cream 更強，而 Ice-cream 就比較幼滑同奶味較重... 以個人口味黎講，因為朱古力濃度較高，所以我會比較喜歡食 Sorbet 多過 Ice-cream...

難得去到中環，忍唔住又行左去 IFC，其實係想食多 round i-Scream 既 Dark Chocolate gelato... 點知店員傳黎一個 "噩耗"，佢話短期內唔會再有 Dark Chocolate，只會賣普通 Chocolate，對於我黎講，簡直就係晴天霹靂！！唉，以後要食濃郁朱古力味既 gelato，又少左一個選擇。

題外話，當日行經 IFC，見之前 Leonidas 既舖位將會由 La Maison du Chocolat 取代，相信呢間新店應該都會引入自家品牌既雪糕，不久既將來，想食 La Maison du Chocolat 既雪糕唔洗一定要去太子大廈 lu...