記得從前 Pekkle 曾經都出過相類似既電話繩，售價大概係四十幾蚊，當時既我，總係猶猶豫豫咁，覺得貴左少少，所以遲遲都冇買，拖拉左大半年，終於都『的』起心肝去買，可惜天意弄人，偏尋不果！當時非常之後悔，並立下〝誓言〞，將來再比我〝重遇〞此電話繩，我必定不假思索就會將佢買下..... 
終於，係幾年後既今日，係一個好偶然既機會底下，比我係沙田一間精品店〝重遇〞番佢，當刻就走入店內問價，店員回覆 - $78 
，我遲疑左幾秒，店員見我略有保留既神態，即刻落力硬 sell，又話係日本番貨、又話咩限量發行..... 其實我個心只係係度自我安慰咁唸：幾年時間，咪當係通脹囉！都係咁上下啦..... 隻手同時亦已經拎定銀包出黎，準備比錢 lu.... 
失而復得既感覺，真係令人開心~ 
一眾阿森 fans 望穿秋水、千呼萬喚始出來既阿森一族大電影，由 1997 年開始構思，終於等到 2007 年都成功上畫啦~~
2007年8 月11日〔星期六〕一早就去到又一城 AMC 睇早場既英文版，聽講呢 D 幕後配音既主角，配一集已經收十幾二十萬美金，可想而知，阿森一族既外國既受歡迎程度！
睇既係 10:30 早場，不過都有八、九成滿座，可能地區同英文版既關係，一半以上都係外國人加 ABC，只有少數係我呢 D 本地人！其實英文程度有限既我，再加上極少睇卡通既關係，其實都唔係睇得十分明，不過我位 hard core The Simpsons fans 既朋友指定要睇英文版，先覺得原汁原味，唯有〝就範〞啦！不過從周圍觀眾既笑聲可知，呢套戲應該都幾搞笑既！聽朋友講，仲話入面好多橋段，係玩緊第二 D 猛片既劇情，真係要電影發燒友先留意到咯~~
睇完呢場英文版，我地拿拿聲就落左旺角既朗豪坊，因為果度搞左個阿森一族大電影既 show，唔只有有獎遊戲玩，仲有個搭建既模擬戲院，比人同 d 主角影下相咁...
對於一向玩遊戲白痴既我黎講，原來玩拋圈都唔係一件易事，兩次參加遊戲資格，一共十二次機會，都只係中左一個！！只係獎得手搖紙扇兩把！！好過冇啦.....
玩完之後，打算去朗豪坊睇埋 17:40 既廣東話版，見仲有時間，又去多一轉九龍灣 Mega Box，為既都係因為有 The Simpsons 既 figures 賣！！
睇完 figures，拿拿聲又坐番地鐵去朗豪坊睇廣東話版，唔知係因為太頻撲、定係對卡通既興趣始終唔大、定係岩岩朝早先睇完一場既關係，睇廣東話版既時候，忍唔住訓著左.... 幾個字咁多啦... hahaha....
片中除左黃偉文、I love you boy'z 同埋張錦程把聲係認得出之外，其餘既角色把聲都冇辦法辨認到，相比起佢地平時既聲音，都好似有好大既出入！
因為係 UA 會員既關係，收到 email 知道 The Simpsons 既兩位主角：Homer 同 Bart 會係特定時間同觀眾影相留念。所以完場之後，又即時番入戲院等 Homer 同 Bart 既出現！
同 Homer & Bart 影左唔少相之後，與阿森一族既一日旅程終於都畫上圓滿既句號！！
2007年8月10日〔星期五〕一個突如其來既八號風球，打亂左我既安排，相信都打亂左好多人既安排。
上晝七點幾先掛起一號波，仲未到食晏既時候，已經改掛左三號風球。岩岩坐低食緊飯既時候，就接到家人、朋友既電話，話天文台宣佈 3:30p.m 前會改掛八號風球！！2:00p.m. 係回 office 既路途中，已經見到好多同事匆忙咁向住火車站方向離開。心唸：唔洗咁有效率下嘛？點知番到 office，都未開始完成第一件工作，天文台已經宣佈改掛八號風球，原本仲想係 office 留多一陣做下野既，點知老細行出黎我個位兩次，起勢咁催我離開，迫於無奈底下，唯有離開啦！番到屋企先 4:00p.m.。唸住可以小睡片刻、休息一下既，點知係八號風球既日子底下，我家姐一家三口，依然係〝不辭勞苦〞咁山長水遠入黎我屋企食飯！不過都難怪既，八號風球對我住果區黎講，可以話係全無影響！！唔單只對出海面風平浪靜，完全冇白頭浪，連雨勢都細到可以唔洗開遮！更加冇狂風啦！！
一個額外既半日假期，就係咁樣浪費左 lu~
時間飛逝........ 尚餘半個月的日子，我已在同一個工作崗位上，工作了接近六個年頭。說長不長、話短不短，回想這六年裏，最大得著還是認識到一群年輕貌美的好同事。
至於在工作方面，說實話，真的沒有什麼大作為！感覺像原地踏步...... 
當然，我不會否認在這六年內，一丁點新知識都沒有學會，可惜，那些新知識並非〝我那杯茶〞..... 
上星期，看過『星期日檔案』，不禁自覺亦已步入老年一族，記得節目中一位長者說，跟年輕一輩的同學無法合作，他一句〝我地係『急驚風』，佢地就係『慢郎中』〞，一語道破我現在工作的處境！我自問亦非一位盡責任的人，但求符合基本要求而已.... 殊不知，周遭的人和事卻令我無所適從，所有人做事都〝隨心而發〞，所有〝制度〞都變得〝朝令夕改〞.... 真不知怎麼可再獃下去.... 
每天早上起床梳洗，望著鏡中漸漸白頭的我，恍惚無法可預見自己的將來.... 一個沒有學識、沒有才華、沒有長處、並已過中年的我，究竟能否仍在商業社會立足呢？
前路茫茫，希望仍會有一線生機吧~ 
新既一年已經開始左一個月喇...
最近都係無事忙，再加上，又好似冇乜特別野可以寫，所以對上一次既 blog 原來已經係 2006 年 11 月既事 lu！真係時光飛逝....
新既一年，許下新年願望先....
最緊要既野當然就係身體健康啦，希望自己、同埋自己關心既人都可以健健康康！其次，就係想快 d 可以搵到份好工跳槽，呢樣野，好想實現到，但又真係有 d 力不從心既感覺.... 唉，希望新既一年，呢個心願，可以達成啦！
