一田購物優惠日 2015 (26/11/2015 - 30/11/2015)

一年兩次嘅一田購物優惠日今個星期四又開始喇！


 
睇哂整份宣傳單張，Pekkle 就只有一款新貨，睇嚟到時都要落場睇吓，執唔執到其他 Pekkle 平嘢先~

原本呢套家居服都唔錯嘅，除咗 Pekkle 之外，仲有齊 Pekkle 嘅女友同朋友，可惜，我個人真係唔太喜歡著過頭笠嘅睡衣，如果呢個 pattern 係開胸款式就好喇，一定會買，依家就會睇咗實物先再決定買唔買囉...

Sanrio Characters - 日版 A4 單行簿

最近日本又出咗一系列 Sanrio characters 嘅文具，有鉛芯筆、擦膠、筆袋同埋 A4 單行簿，pattern 都係一樣嘅，不過由於係雜錦公仔嘅關係，梗係『親疏有別』嘅，所以 Pekkle 只可以喺筆袋同埋 A4 單行簿中『亮相』。

筆袋要成百幾蚊，只係得一個 Pekkle 喺個筆袋嘅背面，好似唔係好值咁，依家仲考慮緊買唔買好...

而呢本 A4 單行簿咁平，再加上封面封底都有 Pekkle，梗係唔洗唸，即買啦！

封面



封底



zoom 近 d 封面嘅 Pekkle



close up 封底嘅 Pekkle



真正 Made in Japan，$22，抵買喇！



可惜內頁普通咗 d 囉，只係得單行線，完全冇印任何公仔，如果唔係就更加 perfect，貴 d 都買得過！

全新 2016 年 Pekkle 月曆產品

又係推出 2016 年年曆、月曆、記事簿嘅時候喇，好彩 Pekkle 來年將維持有座檯月曆、迷你掛曆同埋 Date book。Pekkle 嘅產品明顯已經買少見少，出年仲可以維持到有三款年曆產品，都算叫有交代啦！

座檯月曆

封面



封底



一月份 - Pekkle 學人溜冰，結果跌到死死下... ^^



二月份 - 走唔甩，梗係農曆新年啦！Pekkle 個口仲乜有一撻紅色？唔通係食緊 Pekkle 自己揸喺手入面嘅『冰糖葫蘆』？



三月份 - 唔知仲乜，Pekkle 無啦啦變咗 bb，仲要係咬住奶咀嘅 Pekkle 喎！Pekkle 明明都已經廿幾歲啦，大個仔喇嘛，仲要咬奶咀？@@

 

四月份 - 郊遊樂，仲要帶埋隻樹熊去野餐添喎，雖然 Pekkle 係嚟自澳洲，但係 Pekkle 身邊好似從來都冇樹熊出現嫁喎....

 

五月份 - 咁忙碌煮飯嘅？唔通係準備緊母親節餐飯？

 

六月份 - 下雨天？依家天氣反常，六月嘅香港都唔見得好多雨水...

 

七月份 - 同 Ruby 撐檯腳、食西瓜、飲凍飲，好開心咁喎...

 

八月份 - 大熱天時，梗係碧波暢泳啦！



九月份 - 一年容易又中秋...

 

十月份 - 梗係萬聖節啦！

 

十一月份 - 秋天，黃葉落~

 

十二月份 - 普天同慶聖誕節！

 

告示牌 - 放假中

 

告示牌 - 忙碌中

 

當然唔少得嘅梗係一整頁嘅貼紙啦！我真係有用嫁，唔好嘥嘛... ^^

 

2016 年 Date book，水手造型，呢種藍色同呢款字體幾靚，我就好鍾意喇！而 Date book 內頁每個月嘅主題係同座檯月曆一樣，所以唔再影喇！

Date book 封面



Date book 封底



迷你掛曆，同以前一樣，呢款掛曆，既可以座檯，亦都附有磁石，可以『貼』喺鐵櫃、雪櫃門上。三種用法，悉隨尊便。



迷你掛曆每個月嘅主題同座檯月曆又係一樣嫁，所以唔多作介紹喇！



細心睇下迷你掛曆個封面，Pekkle 似唔似喺度 selfie 梗呢？



2016 年嘅月曆產品設計上，整體都幾滿意，只係以下呢幅 Pekkle 嘅造型好似怪怪咁囉，望埋去好有『老翻』feel 呀... @@



仲有呢個 Pekkle『晴天公仔』個樣好詭異呀... 人地嘅『晴天公仔』係好可愛嫁嘛，呢個有少少恐怖囉...



下一輪就係熱切期待 2016 年農曆新年會有 Pekkle 新嘅賀年產品推出！

草莓雜誌 - 2015 年 9 月號

終於都等到 Pekkle 喺草莓雜誌嘅贈品再次出現...



一如以往，每次最受歡迎人物選舉結果公佈之後嗰一期嘅草莓雜誌，都會用呢個話題作月刊嘅主題，雖然冇乜新意，不過因為咁，我又再可以等到 Pekkle 出現喺呢本官方刊物...

今期贈品係一個同 A5 size 差唔多大細嘅膠袋仔，呢款係雜錦卡通公仔款，所以先有 Pekkle 咋.... 膠袋仔嘅前、後面一次過影哂比大家睇，唔知你地搵唔搵到 Pekkle 嘅蹤影呢？






zoom 近 d 睇唔睇到呀？



再 zoom 近 d 啦，無錯喇，就係粒『拍鈕』附近嘅位置呀...



除咗份贈品之外，由於呢期雜誌嘅主題係最受歡迎卡通人物選舉，咁內頁梗係會有介紹嘅，排第三十九位嘅 Pekkle，都有手指甲咁大嘅篇幅介紹嘅...



假假地，Pekkle 都有 18,287 票嫁！雖然，總投票人數就有成 3,765,250 咁多...



反觀第一位嘅布甸狗，有成 270,837 票喎，有冇咁多呀？係唔係『買票』嫁...



選舉結果一覽表，咁多卡通人物好似睇熱鬧咁睇，其中有個背影好熟面口喎...



無錯喇，係 Pekkle 呀！睇佢 pat pat『突突』咁，唔洗睇正面都覺得佢好 cute 呀！



今期內頁仲有介紹咁多年以嚟，喺選舉之中排第一名嘅卡通人物，一望埋去，唔洗數，都知道到大家姐出現嘅次數係最多啦！所以真係好難想像今年大家姐只係得第七名囉...



而中間大頁就係雜錦卡通人物 poster，竟然咁都有 Pekkle 份喎！



 

2015 Sanrio 卡通人物選舉結果

一年一度嘅 Sanrio 卡通人物選舉又有結果喇！今年賽果又係爆大冷呀！大家姐 Hello Kitty 唔單只三甲地位不保，連頭五名都不入呀，只係得個第七名咋，相信都係有史以嚟，排名最低嘅一次喇！



頭五名得三位係比較熟悉，其餘兩位嘅『人氣』，真係有咁高咩？有 d 懷疑 Sanrio 係有計劃地將佢地來年『力捧』嘅對象，推到前十名嘅位置，以便谷起佢地嘅『人氣』，以增加銷量囉...




跟住嘅第六至第十位，都唔好得幾多，除咗其中兩名之外，其餘三位又係唔多認識囉！真係好難唔令人懷疑呢個選舉有『造馬之嫌』....

 

我至愛嘅 Pekkle，今年只得第三十九名，排名一年比一年低喇！不過如果根據佢地 Sanrio 嘅『玩法』，於 1990 年面世嘅 Pekkle，都真係應該要 fade out 好耐嫁喇，能夠排得到三十九位，都算叫有交代...