草莓雜誌 - 2015 年 9 月號

終於都等到 Pekkle 喺草莓雜誌嘅贈品再次出現...



一如以往，每次最受歡迎人物選舉結果公佈之後嗰一期嘅草莓雜誌，都會用呢個話題作月刊嘅主題，雖然冇乜新意，不過因為咁，我又再可以等到 Pekkle 出現喺呢本官方刊物...

今期贈品係一個同 A5 size 差唔多大細嘅膠袋仔，呢款係雜錦卡通公仔款，所以先有 Pekkle 咋.... 膠袋仔嘅前、後面一次過影哂比大家睇，唔知你地搵唔搵到 Pekkle 嘅蹤影呢？






zoom 近 d 睇唔睇到呀？



再 zoom 近 d 啦，無錯喇，就係粒『拍鈕』附近嘅位置呀...



除咗份贈品之外，由於呢期雜誌嘅主題係最受歡迎卡通人物選舉，咁內頁梗係會有介紹嘅，排第三十九位嘅 Pekkle，都有手指甲咁大嘅篇幅介紹嘅...



假假地，Pekkle 都有 18,287 票嫁！雖然，總投票人數就有成 3,765,250 咁多...



反觀第一位嘅布甸狗，有成 270,837 票喎，有冇咁多呀？係唔係『買票』嫁...



選舉結果一覽表，咁多卡通人物好似睇熱鬧咁睇，其中有個背影好熟面口喎...



無錯喇，係 Pekkle 呀！睇佢 pat pat『突突』咁，唔洗睇正面都覺得佢好 cute 呀！



今期內頁仲有介紹咁多年以嚟，喺選舉之中排第一名嘅卡通人物，一望埋去，唔洗數，都知道到大家姐出現嘅次數係最多啦！所以真係好難想像今年大家姐只係得第七名囉...



而中間大頁就係雜錦卡通人物 poster，竟然咁都有 Pekkle 份喎！



 

2015 Sanrio 卡通人物選舉結果

一年一度嘅 Sanrio 卡通人物選舉又有結果喇！今年賽果又係爆大冷呀！大家姐 Hello Kitty 唔單只三甲地位不保，連頭五名都不入呀，只係得個第七名咋，相信都係有史以嚟，排名最低嘅一次喇！



頭五名得三位係比較熟悉，其餘兩位嘅『人氣』，真係有咁高咩？有 d 懷疑 Sanrio 係有計劃地將佢地來年『力捧』嘅對象，推到前十名嘅位置，以便谷起佢地嘅『人氣』，以增加銷量囉...




跟住嘅第六至第十位，都唔好得幾多，除咗其中兩名之外，其餘三位又係唔多認識囉！真係好難唔令人懷疑呢個選舉有『造馬之嫌』....

 

我至愛嘅 Pekkle，今年只得第三十九名，排名一年比一年低喇！不過如果根據佢地 Sanrio 嘅『玩法』，於 1990 年面世嘅 Pekkle，都真係應該要 fade out 好耐嫁喇，能夠排得到三十九位，都算叫有交代...

日本 Sanrio 2015 年最受歡迎卡通人物選舉 (Sanrio Character Ranking 2015)

眨下眼又一年喇，每年一度嘅日本 Sanrio 最受歡迎卡通人物選舉又開始接受投票喇！

今年嘅主題係 "海盜"，所有『候選人』均裝扮成一個海盜嘅模樣，坐咗喺隻海盜船上嚟一張大合照...



宣傳版面上，Pekkle 尚且可以出現喺主角 My Melody 附近，不過當入到去投票嘅版面時，一艘海盜船就分為三艘，Pekkle 就被『迫遷』咗去左手邊嘅死角位處，好可憐呀！一定係上年 Pekkle 嘅排名較低嘅緣故啦！



投票形式與去年相若，都係要求投票人填寫基本嘅個人資料，每人每日只可以投同一位卡通人物一票，多過一次就會作廢。



今年 Pekkle 嘅『參選』編號係 56 號，希望佢今年嘅成績可以係頭二十名之內啦！

一田購物優惠日 2015 (21/5/2015 - 25/5/2015)

半年一度嘅一田購物優惠日又開始喇！一如以往，我梗係第一時間睇下有冇 Pekkle 先啦！搵勻全份單張，就只有一樣貨品有 Pekkle，仲要係兩年前〔2013年11月〕已經推出過咗旅行喼，好失望囉....



等我搵日收工去巡一巡，睇下有冇咩『漏網之魚』先得~

AEON 夏日大割引〔16/5/2015 - 20/5/2015〕

每年嘅五月同十一月，都係各大百貨公司做促銷嘅日子，千色店、Sogo、永安、先施、一田...等等輪住嚟減價，咁 AEON 又點會執輸呢？

睇到單張，今期促銷產品竟然有 Pekkle 新貨喎，唔買都要去捧下場啦！




其實呢 d 家居服，Pekkle 間唔中都會推出一、兩款，如果款款都買哂，就算唔破產，屋企要搵地方擺都難啦！所以我好『理智』地冇見一套、買一套嘅，就好似幾個月之前出嘅呢一款，因為覺得唔係咁特別，價錢又唔係好抵，短袖衫、短褲都要 $139 一套，所以結果我都係冇買到...



到今次促銷又推出咗另外一款，今次做特價 $100 一套，喺促銷期內仲照價有八折喎，幾十蚊一套衫，唔買又好似對唔住 Pekkle 咁，所以結果就帶咗佢番屋企喇！