2015 Sanrio 卡通人物選舉結果

一年一度嘅 Sanrio 卡通人物選舉又有結果喇！今年賽果又係爆大冷呀！大家姐 Hello Kitty 唔單只三甲地位不保，連頭五名都不入呀，只係得個第七名咋，相信都係有史以嚟，排名最低嘅一次喇！



頭五名得三位係比較熟悉，其餘兩位嘅『人氣』，真係有咁高咩？有 d 懷疑 Sanrio 係有計劃地將佢地來年『力捧』嘅對象，推到前十名嘅位置，以便谷起佢地嘅『人氣』，以增加銷量囉...




跟住嘅第六至第十位，都唔好得幾多，除咗其中兩名之外，其餘三位又係唔多認識囉！真係好難唔令人懷疑呢個選舉有『造馬之嫌』....

 

我至愛嘅 Pekkle，今年只得第三十九名，排名一年比一年低喇！不過如果根據佢地 Sanrio 嘅『玩法』，於 1990 年面世嘅 Pekkle，都真係應該要 fade out 好耐嫁喇，能夠排得到三十九位，都算叫有交代...

日本 Sanrio 2015 年最受歡迎卡通人物選舉 (Sanrio Character Ranking 2015)

眨下眼又一年喇，每年一度嘅日本 Sanrio 最受歡迎卡通人物選舉又開始接受投票喇！

今年嘅主題係 "海盜"，所有『候選人』均裝扮成一個海盜嘅模樣，坐咗喺隻海盜船上嚟一張大合照...



宣傳版面上，Pekkle 尚且可以出現喺主角 My Melody 附近，不過當入到去投票嘅版面時，一艘海盜船就分為三艘，Pekkle 就被『迫遷』咗去左手邊嘅死角位處，好可憐呀！一定係上年 Pekkle 嘅排名較低嘅緣故啦！



投票形式與去年相若，都係要求投票人填寫基本嘅個人資料，每人每日只可以投同一位卡通人物一票，多過一次就會作廢。



今年 Pekkle 嘅『參選』編號係 56 號，希望佢今年嘅成績可以係頭二十名之內啦！

一田購物優惠日 2015 (21/5/2015 - 25/5/2015)

半年一度嘅一田購物優惠日又開始喇！一如以往，我梗係第一時間睇下有冇 Pekkle 先啦！搵勻全份單張，就只有一樣貨品有 Pekkle，仲要係兩年前〔2013年11月〕已經推出過咗旅行喼，好失望囉....



等我搵日收工去巡一巡，睇下有冇咩『漏網之魚』先得~

AEON 夏日大割引〔16/5/2015 - 20/5/2015〕

每年嘅五月同十一月，都係各大百貨公司做促銷嘅日子，千色店、Sogo、永安、先施、一田...等等輪住嚟減價，咁 AEON 又點會執輸呢？

睇到單張，今期促銷產品竟然有 Pekkle 新貨喎，唔買都要去捧下場啦！




其實呢 d 家居服，Pekkle 間唔中都會推出一、兩款，如果款款都買哂，就算唔破產，屋企要搵地方擺都難啦！所以我好『理智』地冇見一套、買一套嘅，就好似幾個月之前出嘅呢一款，因為覺得唔係咁特別，價錢又唔係好抵，短袖衫、短褲都要 $139 一套，所以結果我都係冇買到...



到今次促銷又推出咗另外一款，今次做特價 $100 一套，喺促銷期內仲照價有八折喎，幾十蚊一套衫，唔買又好似對唔住 Pekkle 咁，所以結果就帶咗佢番屋企喇！

日本手信

都已經打定輸數，喺日本應該都唔會買到咩 Pekkle 產品，全賴我家人幫我細心搜羅，咁都比佢地發現到兩款 Pekkle 產品，雖然兩款精品都係什錦公仔款式，不過我都已經好滿足嫁喇！

第一款係用嚟儲存草莓雜誌嘅 binder，我唸大家都略略估到呢個 binder 會有幾大個啦！家人話係『月下貨』，所以賣得好平嫁咋....




zoom 近 d Pekkle 比大家睇下先，就係之前出過嘅啤牌造型 Pekkle 呀！



第二樣 Pekkle 手信，就係 mt crossover Sanrio 嘅 masking tape，2014 年嘅出品，最重要係原裝 Made in Japan 嫁！好難得呀！因為只係得一卷嘅關係，唔捨得拆開。唔知喺呢 10m 長度嘅 masking tape 入面，Pekkle 一共出現咗幾次呢？又唔知呢卷 masking tape 係咩質地嘅呢？係紙造？定係膠呢？

 

 

 

Pekkle 好似張郵票咁，仲要有埋郵戳，好認真喎...