Manis 2014 聖誕及 2015 新年 catalogue

兩大公司，每次都總係會鬥個『你死我活』，Gift Gate 出咗 catalogue，又點會少得 Manis 呃？

Manis 嘅 catalogue 都印製得好有心機，不過最重要嘅梗係有 Pekkle 份啦！




雖然只係什錦公仔，但係都好過冇啦，不過呢張地毯嘅呎吋怪怪地咁，又長又窄，唔知點擺先啱呢？



除咗地毯，仲有賀年產品喎，產品雖然唔多，而且多數仲要係什錦公仔款，但都算係好難得喇！



catalogue 嘅款式其實都唔齊，仲有另外嘅款式，其實我都已經入咗貨，下篇再作詳細介紹啦！= )

Gift Gate 2014 聖誕及 2015 新年 catalogue

今次本 catalogue 印刷得好精美，可惜由頭搵到底，再由底睇番上前，都係冇一樣 Pekkle 嘅新產品呀！

Kitty fans 見到呢份 catalogue 一定好開心啦！因為隨 catalogue 附上賀年產品推介，靚到可以當揮春貼...

可惜嘅係，連賀年產品都一樣係冇 Pekkle 份... =-=

Pekkle 睡衣

實在係太耐冇寫 blog 喇，雖然依家既工作量確係比以前多咗好多，再加上 Pekkle 都已經冇乜新貨推出，冇乜嘢可以 update，不過呢 d 都只係藉口，其實最主要都係因為懶囉... =P

所以我之前已經同自己講咗，喺 2014 年完結之前，我一定要 update 下呢個 Pekkle blog，先對得住 Pekkle 嫁嘛...

買咗都有一段時間既 Pekkle 睡衣，可能有好多 Pekkle fans 都已經見過，甚至已經著緊添，不過唔緊要啦，有心唔怕遲呃嘛....




個 pattern 好靚呀！仲要係開胸唔係過頭笠，一見到都已經忍唔住手要買！





我買嘅時候已經做緊八折，但係早幾日我再去 Aeon 時，發覺個價錢已經再調低到七折... 我都仲未開就已經貶值咗 10%....

草莓雜誌 - 2014 年 11 月號

因為買咗上期草莓雜誌嘅關係，所以一早都已經知道今期會送 D 咩嘢贈品，雖然贈品幅圖好細張，但係只要有 Pekkle 嘅影蹤，我又點會錯過？所以今個月好早就已經打咗電話去征服訂書，不過唔知咩原因，今期草莓雜誌比平時遲咗番，所以我都要等到今日先拎到本雜誌...

咁難得有 Pekkle 份，所以一次過就訂咗兩本！






今期贈品係透明拉鍊袋...

個袋仔其實唔係好大個，唔知裝到 D 乜，而且膠製品擺得耐好易會氧化而裂開、易爛，不過有 Pekkle 份喎，又點可以唔捧場呀？

意外收鑊 --- 以為只係得個贈品有 Pekkle 啦，原來中間大頁都有 Pekkle 份喎，心水清嘅 Pekkle fans，唔知你地搵唔搵到 Pekkle 出嚟呢？



肥鴨 pat pat 咁易認，唔會認唔出卦？^_^

Pekkle 2015 年年曆產品

眨下眼咁快又一年喇.... 2015 年 Pekkle 嘅座檯月曆、掛曆同埋 date book 都已經推出哂喇。呢 d 有時間性嘅產品，我依然係只會每款買一件，因為每年嘅年尾到第二年年頭嘅時間，呢 d 賣唔出嘅年曆、月曆，就會割價傾銷，如果有須要作收藏之用嘅話，留待到時先再買都未遲... ^_^

〔一〕座檯月曆






〔二〕小掛曆，一如以往，呢個小掛曆係有三種『功能』，既可以掛牆，亦都可以座檯，更附有磁石，可供貼喺雪櫃、鐵櫃嘅之用。





〔三〕Date book





好可惜今年 Pekkle 冇再出大嘅掛曆，睇嚟喺寫字樓同埋屋企預留嚟掛 Pekkle 大月曆嘅鈎，都係時候拆番落嚟喇！: (