7-11 x Hello Kitty & Friends Sweet Delight 公仔 - 第六週戰績

好幸運第一次換公仔就已經比我換到兩個心儀嘅＂啫喱 Pekkle＂，所以喺呢段時間我都冇再換公仔，只係 keep 住儲印花。亦都係因為咁，唔經唔覺原來我已經停左三個星期冇 update 呢個『系列』嘅 blog！不過，聽日就係第二期公仔上市嘅大日子，梗係要 update 一下目前我儲印花嘅『成績』喇！

經過呢三個星期嘅努力，印花嘅數量一共增加咗 142 個，依家已經累積到有 274 個印花喇！

一共有 15 張貼滿 16 個印花嘅印花卡。聽日可唔可以再下一城，即時換到＂朱古力 Pekkle＂，就係靠哂呢 15 張印花卡喇！

仲有一張未貼滿嘅印花卡...





當然，最緊要就係我唔捨得用嘅 Pekkle 印花啦！

希望唔洗出動到我呢 d 私伙 Pekkle 印花，就可以比我順利換到＂朱古力 Pekkle＂啦！聽日開始，我又要『繼續努力』喇！

Pekkle Uji 雪狐絨披肩

尋日漫無目的咁行街，竟然比我有意外發現.... 勁靚！

從未見過嘅 Pekkle 雪狐絨披肩，柔軟、輕巧... 正！

披肩『全相』...

前幅 - 反領兼有三粒鈕

後幅





呢件披肩簡直就係『中』哂我對 Pekkle 精品嘅要求，包括：我至愛嘅藍色、有大堆頭嘅 Pekkle、同埋唔太阻地方！咁正，又點忍得手唔買呀？同款布料除左呢件披肩之外，仲有一件晨褸，不過件晨褸要成三百幾蚊，自己又冇著晨褸嘅習慣，所以最終都只係買咗呢件披肩就算數！

草莓雜誌 - 2013 年 1 月號

一早知道今期草莓雜誌嘅贈品係賀卡，而其中一款雜錦賀卡係有 Pekkle 份，不過因為 Pekkle 實在細得可憐，所以都冇專登打電話去征服訂購，唸住番咗貨之後，都係隨緣睇下買唔買到...

番咗貨之後，行咗三間征服都賣哂雜錦嗰款草莓雜誌，都打定輸數買唔到... 點知無意之中，又比我係一間 Gift Gate 搵到喎，無心插柳之下，一個完全唔識日文嘅我，又因為一個小得可憐嘅 Pekkle 公仔而買咗本草莓雜誌...

今期贈品 - 賀卡，一共有五款，每款都有兩個設計，每個設計都有三張。即係話，買一本草莓雜誌就可以有六張賀卡。

兩款雜錦卡就係咁樣嘅 -





賀卡正面及背面設計





賀卡正面





Pekkle 實在太細個喇... 要用放大鏡先睇到咁滯...

成本草莓雜誌就只有兩處地方有 Pekkle 嘅出現...

又係要用放大鏡先睇得到嘅 Pekkle，仲要係背影添... 雖然係咁，但係又點逃得出我呢個 Pekkle fans 嘅『法眼』呢？

7-11 x Hello Kitty & Friends Sweet Delight 公仔 - 第三週戰績

全賴幸運之神眷顧，上個星期第一次換公仔就可以一次過抽中兩隻 Pekkle，連搶手貨嘅聖誕版，喺星期五黃昏時間，都仲可以比我一次過抽中一對！

所以我依家已經只儲印花，唔再換購，留番 d 彈藥到 16/1/2013〔星期三〕時再 "發力" 換購第二期，希望到時可以喺最短嘅時間之內，換齊一對『啫喱 Pekkle』同埋『朱古力 Pekkle』啦！

再一次多謝屋企人嘅全力支持，扣除上星期換購公仔時用咗嗰 80 個印花，依家『賬面盈餘』為 132 個！！

No. 2 啫喱 Ahiru No Pekkle

終於都忍唔住要換公仔，就趁換聖誕版時一併換埋。一係就唔換，一係就一次過用咗 80 個印花換咗 2 個聖誕版同 3 個普通版！

懷住戰戰兢兢嘅心情去開嗰 3 個普通版，初時就算剪開咗個黑色膠袋，都仲係未睇到係邊個公仔，唯有將開口向下咁倒出嚟，第一眼就見到個橙紅色半球型『物體』... 係喇！係喇！仲唔係你？！啫喱 Pekkle？！即刻開心到大叫咗出嚟，仲笑咗出聲添... 一不離二，仲要開完一隻又一隻都係 Pekkle，真係開心到我癲，好彩當時係屋企，都係得我媽咪見到我咁失控嘅表現咋！

竟然有朋友同我講，佢事前係唔知道呢個公仔係可以用嚟儲物嘅，印象之中，7-11 嘅宣傳中好似有提及過嫁喎...

不過每款公仔可以儲物嘅容量都唔同，有 d 款式係比較大，而呢款 Pekkle 可儲物嘅地方就比較細少囉... 睇相大概可以知道，直徑就只可以容納到一個 Pekkle charms 咁上下...

每款公仔就好似 2010 年換購嘅 Crystal Charms 一樣，印咗嗰款公仔嘅全名同埋出產年份！

close up 睇清楚啦！

今次換公仔比上次換 Crystal Charms 時順利好多，一開始就已經換到兩個 Pekkle，我會將其中一個放喺屋企，而另外一個就會擺喺 office。依家開始，我亦暫停唔再換住，留番 d『彈藥』到下個月換第二期嘅『朱古力 Pekkle』喇！